STQARRIJA MILL-MINISTERU GĦAX-XOGĦLIJIET PUBBLIĊI U L-IPPJANAR Inwettqu Flimkien: Investiment favur il-komunitajiet tagħna
Se jiġi restawrat iz-zuntier tal-Knisja Arċipretali ta' San Nikola, fis-Siġġiewi
Il-Ministru għax-Xogħlijiet Pubbliċi u l-Ippjanar Stefan Zrinzo Azzopardi attenda għall-iffirmar ta' Ftehim bejn id-Dipartiment tax-Xogħlijiet Pubbliċi u l-Knisja Arċipretali tas-Siġġiewi sabiex isir xogħol ta' restawr fuq iz-zuntier tal-Knisja Arċipretali ta' San Nikola, fis-Siġġiewi.
“Dan il-proġett, li se jiġi jiswa madwar €1 miljun, huwa proġett ieħor minn kullana ta' proġetti li d-Dipartiment tax-Xogħlijiet Pubbliċi qed iwettaq f'diversi lokalitajiet sabiex, b'kollaborazzjoni mal-parroċċi u l-Kunsilli Lokali, inkomplu nippreservaw il-wirt kulturali tal-lokalitajiet tagħna," spjega l-Ministru Zrinzo Azzopardi.
Il-pjazza tas-Siġġiewi fl-aħħar snin kisbet popolarità bl-attivitajiet li jiġu organizzati f'avvenimenti kulturali u reliġjużi, b'mod partikolari matul il-Ġimgħa Mqaddsa. Għaldaqstant, dan il-proġett se jitgawda mhux biss mil-komunità tas-Siġġiewi iżda mill-ħafna Maltin u turisti li jżuru dan ir-raħal Malti.
Ix-xogħol ta' restawr li se jkun ikkordinat mid-Dipartiment tax-Xogħlijiet Pubbliċi se jibda billi jinqala l-madum tas-siment eżistenti u jitneħħa l-materjal ta' taħt il-madum, titqiegħed ukoll sodda tal-konkos bil-bini ta' pedamenti tal-konkos u tal-ġebel tal-franka taħt it-turġien u t-tqegħid ta' pavimentar ġdid bil-ġebla Pietra di Modica. Finalment, se jkunu qed isiru wkoll żewġ pedestalli biex jintużaw għad-dawl ornamentali bil-materjal tal-istess ġebla.
Il-Ministru Zrinzo Azzopardi spjega wkoll kif ix-xogħol tat-tqattigħ tal-ġebla l-ġdida mhux se jkun qed isir fuq il-post iżda fil-workshop tal-kuntrattur. Dan sabiex jinħoloq l-inqas inkonvenjent possibbli fil-pjazza mingħajr ma tinħoloq problema ta' aċċess għall-knisja. Għal dan l-iskop, anke t-tqegħid tal-pavimentar il-ġdid se jkun qed isir f'fażijiet diversi.
Għall-iffirmar tal-ftehim kien hemm preżenti wkoll l-Arċipriet Fr Joe Mifsud, is-Segretarju Permanenti u uffiċjali għolja mid-Dipartiment tax-Xogħlijiet Pubbliċi u l-Kurja u rappreżentanti tal-Kunsill Lokali tas-Siġġiewi.
Other Press Releases:
PR261940
STQARRIJA MILL-MINISTERU GĦALL-AKKOMODAZZJONI U L-ARTIJIET Żjara fuq il-la...
PR261939