Left arrow Go Back

PROĠETT TAL-KNŻ GĦAL AKTAR PARTEĊIPAZZJONI TAŻ-ŻGĦAŻAGĦ FIL-KUNSILLI LOKALI

PR1058
Date Icon 23/06/2004

Il-Kunsill Nazzjonali taż-Żgħażagħ (KNŻ) nieda proġett pilota bl-iskop li jibdew joperaw kunsill lokali taż-żgħażagħ.  Il-proġett pilota huwa primarjament wieħed edukattiv intiż biex iżid l-għarfien tal-proċess demokratiku fost iż-żgħażagħ u jħarriġhom f’dan l-istess proċess.  Il-proġett huwa mmirat li jiġbed il-parteċipazzjoni ta’ żgħażagħ bejn 14 u 18-il sena biex fost affarijiet oħrajn jħeġġeg:

Ċittadinanza Attiva: li ż-żgħażagħ jieħdu interess fil-ħajja tal-lokalità tagħhom, fil-problemi li din taffaċja u l-isfidi li għandha, u jkunu kapaċi jieħdu rwol pro-attiv fit-titjib tal-lokalità fl-aspetti varji tagħha.

Parteċipazzjoni fil-proċess Demokratiku: li ż-żgħażagħ jagħrfu li l-demokrazija taħdem bil-parteċipazzjoni ta’ kulħadd fl-istadji varji tal-proċess kollu; fid-diskussjoni u fl-ideat, fit-tmexxija, fit-teħid ta’ deċiżjonijiet u fil-konsultazzjoni ma’ l-awtoritajiet. Li jaraw kif b’mod konkret dan il-proċess iwassal għat-twettiq tal-proposti, frott id-diskussjoni miftuħa.

Djalogu: li ż-żgħażagħ jaraw fil-prattika l-importanza tad-djalogu fil-proċess demokratiku u kif huma bħala ċittadini għandhom id-dritt li jwasslu l-ħsibijiet tagħhom lil min qiegħed jirrappreżentahom.

Tmexxija: li ż-żgħażagħ jiffurmaw ruħhom bħala mexxejja fost sħabhom u b’hekk ikollhom l-opportunità jtejbu l-kwalitajiet tagħhom u joffruhom għas-servizz tas-soċjetà.

Rikonoxximent: li bħala membri tal-komunità lokali, iż-żgħażagħ jingħataw ir-rikonoxximent bħala msieħba fil-komunita’ u fuq livell nazzjonali.

Ugwaljanza: li ż-żgħażagħ jgħożżu l-fatt li f’soċjetà demokratika kulħadd għandu l-istess dritt li jsemma’ leħnu.

Il-Kunsill diġa kellu laqgħat ta’ informazzjoni mal-Kunsilli Lokali u ġew identifikati 11-il kunsill li se jipparteċipaw fil-proġett pilota.  Il-Kunsilli identifikati huma: Balzan, Birkirkara, Fgura, Raħal il-Ġdid, Pieta`, San Ġwann, San Ġiljan, San Pawl il-Baħar, Xgħajra, Żejtun u Żurrieq

Fl-ewwel parti tal-proġett se titlaqqa’ l-Assemblea Ġenerali f’kull lokalita li qed tieħu sehem fil-proġett. Waqt l-Assemblea jiġu diskussi l-kwistjonijiet ewlenin li fil-fehma taż-żgħażagħ jolqtu lil-lokalità.  Dawn imbagħad jiddeċiedu li jinqassmu f’workshops, li jiltaqgħu ftit taż-żmien wara, bejn Lulju u Awissu.

Il-Kunsill għandu jaħtar Sindku (Junior Mayor) li xogħolu/ha jkun li jmexxi l-laqgħa tal-Kunsill Lokali taż-Żgħażagħ. Matul Settembru/Ottubru, il-Kunsill Lokali taż-Żgħażagħ ikollu tlett affarijiet importanti x’jagħmel:  L-ewwel, li jiddiskuti il-prioritajiet ta’ l-oqsma li jkunu ġew identifikati matul il-workshops;  it-tieni li jattendi seminar ta nofs ta’ nhar għal dawk kollha li jkunu jiffurmaw Kunsill Lokali taż-Żgħażagħ u li matulu jkun hemm sessjonijiet dwar is-sehem taż-żgħażagħ fis-soċjetà u l-proċess demokratiku u ċ-ċittadinanza attiva u għajnuna prattika għat-tfassil tal-proposti lill-Kunsill Lokali;  u t-tielet li jitlob laqgħa mal-Kunsill Lokali biex jiġu ppreżentati l-proposti u jkun hemm skambju ta’ ideat dwar il-lokalità, il-proġetti eċċ

F’Ottubru (lejn l-aħħar) jew Novembru terġa titlaqqa’ l-Assemblea Ġenerali, li għaliha jerġgħu jkunu mistiedna ż-żgħażagħ kollha tal-lokalità.  Matulha ssir preżentazzjoni mill-Kunsill Lokali taż-Żgħażagħ dwar l-esperjenza tagħhom.  Il-Kunsill Lokali (Sindku u Kunsilliera) jkunu mistiedna jattendu wkoll u jikkumentaw fuq il-proġett.  Imbagħad issir sessjoni qasira li matulha jsir eżerċizzju ta’ djalogu bejn iż-żgħażagħ u l-Kunsill Lokali.  F’Novembru jew Diċembru issir laqgħa organizzata mill-Kunsill Nazzjonali taż-Żgħażagħ (KNŻ) biex jiġi evalwat il-proġett u biex jiġi diskuss il-futur tiegħu. Għal din il-laqgħa jkunu mistiedna dawk kollha li kienu nvoluti fil-proġett.

Waqt it-tniedija tal-proġett Louis Galea, Ministru ta’ l-Edukazzjoni, Żgħażagħ u Xogħol, faħħar lill-Kunsill Nazzjonali taż-Żgħażagħ għall-inizjattiva li ħadu biex ikomplu jsaħħu l-proċess demokratiku li jeżisti f’pajjiżna.  Il-Ministru Galea faħħar ukoll l-impenn tal-Kunsilli Lokali li mill-ewwel wrew interess għal din l-inizjattiva u dan juri li dawn il-kunsilli huma verament interessati fl-opinjonijiet u l-kontribut li jistgħu jagħtu ż-żgħażagħ fil-komunita’.

Waħda mill-funzjonijiet tal-KNŻ hi li jippromwovi parteċipazzjoni akbar taż-żgħażagħ fil-ħajja politika u soċjali ta’ pajjiżna u jemfasizza dejjem iktar il-bżonn li leħen iż-żgħażagħ jingħata iktar widen fil-fora u fil-livelli kollha fejn jittieħdu d-deċiżjonijiet. Għalkemm il-Kunsill huwa kompost minn għaqdiet taż-żgħażagħ, il-KNŻ għandu d-dmir li jaħdem ukoll fl-interessi u għall-ħtiġijiet taż-żgħażagħ li mhumiex assoċjati f’xi għaqda.  Il-Kunsill għandu wkoll l-iskop li jġib ‘il quddiem il-formazzjoni u l-parteċipazzjoni taż-żgħażagħ u li jippromwovi spirtu ta’ ko-operazzjoni, pluraliżmu u ugwaljanza fost iż-żgħażagħ Maltin u Għawdxin, kif ukoll maturità ta’ ħsieb u azzjoni

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-AKKOMODAZZJONI U L-ARTIJIET  Żjara fuq il-lant ta’ proġett ta’ 55 unit residenzjali ġdid f’Ħaż-Żebbuġ għal familji vulnerabbli

PR261940

STQARRIJA MILL-MINISTERU GĦALL-AKKOMODAZZJONI U L-ARTIJIET Żjara fuq il-la...

STQARRIJA MILL-MINISTERU GĦAL GĦAWDEX  ŻiguŻajg jirritorna Għawdex għat-tielet darba bil-produzzjoni ‘What’s Missing’ għall-istudenti

PR261939

STQARRIJA MILL-MINISTERU GĦAL GĦAWDEX ŻiguŻajg jirritorna Għawdex għat-tie...

More Press Releases Right arrow