Left arrow Go Back

FL-EWWEL GĦAXART IJIEM TAS-CVA JIDĦLU L-BELT AKTAR KAROZZI INDIVIDWALI MILLI KELLHOM IL-V LICENCE

PR0684
Date Icon 10/05/2007

Illum il-Ħamis, fl-għaxar jum tas-sistema ta’ kontroll ta’ l-aċċess tal-karozzi għall-Belt Valletta daħlet it-33,000 karozza individwali fil-Belt Valletta. Dan ifisser li għaxart ijiem wara l-abolizzjoni tal-V Licence u l-ftuħ tal-Belt Valletta għal żjarat minn kwalunkwe karozza, inqabeż il-limitu l-antik ta’ kemm jistgħu jidħlu karozzi l-Belt. 

Dan seħħ waqt li kien qed isir ukoll tnaqqis kbir fil-konġestjoni tat-traffiku fil-Belt Valletta tant li fi kwalunkwe ħin tal-lejl jew nhar f’dawn l-għaxart ijiem kien hawn fil-Belt minimu ta’ madwar 350 spazju għal persuni deħlin minn barra l-Belt.

Bejn it-Tnejn, 30 t’April 2007 (l-aħħar ġurnata tas-sistema tal-V Licence) u t-Tlieta 8 ta’ Mejju 2007, il-Belt rat tnaqqis ta’ 57.2% fin-numru ta’ karozzi li damu fil-Belt aktar minn 5 siegħat. Karozzi li damu l-Belt aktar minn 8 siegħat naqsu bi 68.9%. 

L-ispazji li ħallew vojta dawn il-karozzi (madwar 500) intużaw aktar minn darba waħda mill-karozzi li ġew għal żjarat qosra. Fil-fatt il-karozzi li żaru l-Belt għal anqas minn siegħa nhar it-Tlieta 9 ta’ Mejju kienu 181.6% aktar milli ġew għal anqas minn siegħa nhar it-Tnejn, 30 ta’ April 2007. Il-karozzi li ġew il-Belt għal bejn siegħa u ħames siegħat nhar it-Tlieta 9 ta’ Mejju kienu 47% aktar milli ġew il-Belt għall-istess tul ta’ ħin karozzi fit-30 ta’ April 2007. 

Tendenzjalment żjarat ta’ ħames siegħat jew aktar (apparti tar-residenti) jkunu ta’ persuni li jiġu l-Belt għal raġunijiet ta’ xogħol waqt li żjarat ta’ ħames siegħat jew anqas ikunu għal xiri, żjarat lill-qraba jew qadi ieħor fil-Belt. 

Dan juri li l-ippjanar ta’ din is-sistema u l-oġġettivi tagħha ntlaħqu tant li l-prezz ta’ 35ċ fis-siegħa ħajjar aktar nies jiġu l-Belt biex iżuruha u jixtru minnha waqt li l-ispiża ta’ Lm2.80 għal ipparkjar ta’ aktar minn 8 siegħat ħajjar lil min kien jiġi hawn kuljum iċaqlaq il-karozza tiegħu għall-periferija jew juża mezzi oħra ta’ trasport. Fil-fatt fl-ewwel tlett ijiem tas-CVA ġiet reġistrata żieda ta’ ftit anqas minn 1% fl-użu tat-trasport pubbliku. Dan hu perċentwal tal-vjaġġi kollha tat-trasport pubbliku u m’hux unikament fil-ħin tal-bidu u t-tmiem tas-siegħat tax-xogħol. 

Dawn huma ċifri inkoraġġanti għall-aħħar u jxejnu għal kollox il-kritika ta’ l-Oppożizzjoni li qalet li l-Gvern ma ppjanax sew ir-riforma fl-immaniġġjar tat-traffiku tal-Belt. 

Ġurnata wara l-oħra din l-iskema qed toħloq opportunità għal min ilu ma jżur il-Belt jew jixtri mill-ħwienet tagħha biex issa jibdew jagħmlu hekk. Sehem sostanzjali mill-karozzi individwali li żaru l-Belt f’dawn l-għaxart ijiem kienu jappartjenu għal sidien li ma kellhomx il-V Licence f’April li għadda u li allura sa ġimgħatejn ilu l-anqas kieku riedu ma setgħu jidħlu fil-Belt. 

Dan sar waqt li tjiebet għall-aħjar il-ħajja tar-residenti tal-Belt li qed ukoll igawdu minn aċċessibilità għal djarhom minħabba li qed isibu wieħed mill-minimu ta’ 350 spazju għall-parkeġġ jistennihom f’kull ħin li jidħlu lura fi djarhom. 

Il-Gvern itenni l-impenn tiegħu li jkompli jsegwi l-maturazzjoni ta’ din l-iskema u kif it-traffiku jevolvi biex jadatta għal dan it-tibdil. Hu ċar iżda li t-tnaqqis tal-konġestjoni u t-titjib fl-aċċessibilità tal-Belt kienu oġġettivi ambizzjużi li ntlaħqu b’riżultat ta’ ppjanar serju u konsultazzjoni estensiva mal-partijiet kollha interessati.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-EDUKAZZJONI U L-ISPORT  Il-Ministru Byron Camilleri jirrikonoxxi s-suċċess storiku tat-timijiet Maltin tal-golf fil-Kampjonati Ewropej

PR261962

STQARRIJA MILL-MINISTERU GĦALL-EDUKAZZJONI U L-ISPORT Il-Ministru Byron Ca...

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSUMER PROTECTION  Malta brings together 15 startups from 12 countries to advance innovation in circular electronics

PR261961en

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...

More Press Releases Right arrow