FTUĦ TAT-TIELET EDIZZJONI TAL-GOZO TRADE FAIR
It-tielet edizzjoni tal-fiera kummercjali t’Għawdex, organizzata mill-Kamra tan-Negozju għal Għawdex fil-Kumpless Sportiv, giet inawgurata llum waqt attivita’ li fiha hadet sehem l-Onor. Giovanna Debono, Ministru għal Għawdex.
Din l-edizzjoni tal-fiera hija l-ikbar waħda sa mill-bidu tagħha fl-2002, bis-sehem ta’ 66 partecipant, u għall-ewwel darba b’dimensjoni nternazzjonali.
F’diskors ta’ l-okkażjoni, il-Ministru Debono qalet li matul iż-żminijiet, Għawdex, bħall-bqija tal-pajjiżi tal-madwar, beda jibdel il-forma ta’ żvilupp ekonomiku li jgħaddi minnu. Hija qalet li Għawdex beda jersaq eqreb tar-realtajiet ekonomiċi ta’ pajjiżi ġirien tagħna u jżid l-investiment f’oqsma li jirrendu xi ftit iktar bħal dak tas-servizzi. L-ekonomija ta’ Għawdex m’għadhiex tiddependi b’mod qawwi fuq is-settur tal-manifattura tradizzjonali, imma qed toqrob dejjem iktar lejn il-manifattura ta’ prodotti speċjalizzati u l-għoti ta’ servizzi, marbuta wkoll mal-qasam ta’ l-informatika.
Il-Ministru Debono rreferiet għall-ħidma kontinwa tal-Ministeru għal Għawdex u l-Malta Enterprisebiex f’Għawdex jiżdied l-investiment. “Kontinwament, fil-ħidma tagħna, niltaqa’ ma’ investituri barranin li, permezz tal-provvediment ta’ skemi mill-Gverntaħt il-Business Promotion Act, ikunu qed jikkunsidraw lil Għawdex bħala l-post fejn jinvestu l-attivita’ ekonomika tagħhom, li tirriżulta f’iktar opportunitajiet ta’ xogħol għall-Għawdxin f’Għawdex stess. Dan huwa marbut ukoll mal-koperazzjoni kostanti li l-Ministeru għal Għawdex għandu mal-Malta Enterprise”.
Il-Ministru għal Għawdex tkellmet dwar il-ħaddiem Għawdxi u l-karatteristici tiegħu. Hija qalet li f’Għawdex l-investitur isib riżors prezzjuż. “Għandna l-bniedem li hu ħerqan għax-xogħol, lest li jinvesti fih innifsu, jitgħallem iktar, jitħarreġ iktar, sabiex ikollu l-għodda f’idejh u jużahom għall-benefiċċju tiegħu stess. Għandna r-rieda li nissuperaw il-livelli u l-istandards li nkunu lħaqna u nimmiraw dejjem ogħla. Għandna l-prodott artiġġjanali u dak maħdum lokalment, prodotti ta’ kwalita’ imfittxija sew mill-barranin li jkunu fostna u mill-Maltin stess. Għandna niċeċ li nistgħu nisfruttaw u nispeċjalizzaw fihom biex finalment, it-trademark tal-prodott Għawdxi jkun wieħed ta’ l-ogħla kwalita’.
Il-Ministru Debono qalet li l-ġejjieni li għandna quddiemna, issa li Malta hi membru ta’ l-Unjoni Ewropea, huwa wieħed mimli opportunitajiet li jekk nagħrfu nisfruttawhom bil-għaqal jirrendu bl-iktar mod vantaġġjuż għal Għawdex.
Il-Ministru Debono temmet id-diskors tagħha billi rringrazzjat lill-Kamra tan-Negozju għal Għawdex, b’mod partikolari lis-sotto-kumitat tal-artiġġjanat fi ħdan il-Kamra, ghall-organizzazzjoni ta’ din il-fiera annwali. Hija esprimiet it-tama li anke din l-edizzjoni tkun success għall-bejjiegħa Maltin, Għawdxin u barranin li ħatfu din l-opportunita’ u esponew il-prodotti u s-servizzi li joffru.
Lejn tmiem l-inawgurazzjoni, il-Ministru għal Għawdex flimkien mal-Kunsill Lokali ta’ l-Għarb, il-Kamra tan-Negozju għal Għawdex u l-Assoċjazzjoni Għawdxija tat-Turiżmu iffirmaw ftehim ta’ koperazzjoni ma’ tlett aġenziji Taljani: Comunita’ Montana Valle dell’Aniene, Agenzia Sviluppo Provincia di Roma u Colline Romane spa. Dan bil-għan li tinħoloq struttura fejn kollaborazzjoni bejn Għawdex u l-Italja tissarraf fi proġetti li joħolqu iktar xogħol u allura iktar impjiegi għall-Għawdxin f’Għawdex stess.
Il-Gozo Trade Fair ser tibqa miftuħa sa nhar it-Tnejn filgħaxija.
Other Press Releases:
PR261937en
PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...
PR261937