Left arrow Go Back

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Malta tirreġistra wieħed mill-akbar avvanzi fl-ugwaljanza bejn il-ġeneri fl-UE

PR261938
Date Icon 17/11/2026

Il-Ministru Rosianne Cutajar tilqa’ l-progress irreġistrat minn Malta

 

Malta rreġistrat wieħed mill-akbar avvanzi fl-ugwaljanza bejn il-ġeneri fl-Unjoni Ewropea, skont l-Indiċi tal-Ugwaljanza bejn il-Ġeneri 2026 ippubblikat mill-Istitut Ewropew għall-Ugwaljanza bejn il-Ġeneru (EIGE).

 

Malta kisbet punteġġ ta’ 59.6 minn 100, żieda ta’ 9.8 punti mill-2020 u ta’ 0.9 punti fuq is-sena ta’ qabel. Malta bħalissa tinsab fis-17-il post fost l-Istati Membri tal-UE filwaqt li d-distakk mill-medja Ewropea kompla jonqos.

 

Ġie rreġistrat progress partikolarment qawwi fil-qasam tax-xogħol, fejn Malta tinsab fit-3 post fl-UE b’77.6 punti. Malta tinsab fl-ewwel post fl-UE fis-segregazzjoni u l-kwalità tax-xogħol, b’punteġġ ta’ 75.6 punti. Mill-2025 biss, il-punteġġ ta’ Malta fil-qasam tax-xogħol żdied b’4.8 punti, filwaqt li meta mqabbel mal-2020 żdied bi 12.4 punti.

 

Żviluppi pożittivi jidhru wkoll fil-parteċipazzjoni tan-nisa fit-teħid tad-deċiżjonijiet fis-suq tax-xogħol. In-nisa issa jokkupaw 41% tal-karigi maniġerjali f’Malta, żieda ta’ erba’ punti perċentwali fuq is-sena ta’ qabel u aktar mill-medja tal-UE ta’ 36%.

 

Nifhmu d-distakk bejn il-ġeneri fil-pensjonijiet f’Malta

 

L-Indiċi jirrapporta wkoll distakk ta’ 37% bejn il-ġeneri fil-pensjonijiet f’Malta, meta mqabbel mal-medja tal-UE ta’ 24%. Dan id-distakk naqas b’punt perċentwali wieħed meta mqabbel mas-sena ta’ qabel. Madankollu, dan l-indikatur irid jiġi interpretat fil-kuntest tar-riformi fil-pensjonijiet f’Malta.

 

F’dawn l-aħħar snin, Malta introduċiet id-Deficient Contributory Bonus, li jipprovdi appoġġ lil persuni li ma kellhomx biżżejjed kontribuzzjonijiet tas-sigurtà soċjali biex jikkwalifikaw għal pensjoni kontributorja. Dan għandu effett statistiku importanti. Meta persuni li qabel ma kienux jirċievu l-ebda pensjoni kontributorja, li ħafna minnhom huma nisa bi snin ta’ kontribuzzjoni iqsar jew interrotti, jibdew jirċievu benefiċċju marbut mal-pensjoni ta’ valur aktar baxx, il-qagħda finanzjarja tagħhom titjieb. Madankollu, l-inklużjoni ta’ dawn il-pagamenti aktar baxxi fil-kalkolu tista’ tnaqqas id-dħul medju tan-nisa mill-pensjonijiet meta mqabbel ma’ dak tal-irġiel u, konsegwentement, iżżid id-distakk imkejjel bejn il-ġeneri fil-pensjonijiet.

 

Ta’ min jinnota wkoll li mis-sena d-dieħla se tibda titwettaq il-wegħda elettorali tat-trasferiment ta’ kontribuzzjonijiet tas-sigurtà soċjali bejn konjugi li jkollu pensjoni għal konjugi li ma jkollhiex pensjoni, u b’hekk aktar nisa miżżewġa se jiġu intitolati għal pensjoni. Mill-2021 ‘il hawn, permezz ta’ diversi miżuri, madwar 4,000 nisa miżżewġin bdew jirċievu pensjoni għall-ewwel darba. B’din il-miżura l-ġdida, se jgawdu madwar 3,200 mara miżżewġa u b’hekk madwar 7,000 mara miżżewġa saru jew se jsiru pensjonanti għall-ewwel darba.

 

Impenn kontinwu biex jitnaqqsu d-distakki bejn il-ġeneri

 

Il-Ministeru għall-Ugwaljanza u d-Drittijiet Ċivili jilqa’ l-progress irreġistrat minn Malta filwaqt li jtenni l-impenn tiegħu li jindirizza l-inugwaljanzi strutturali li għad fadal permezz tal-integrazzjoni kontinwa tal-perspettiva tal-ġeneru, parteċipazzjoni ekonomika aktar b’saħħitha, qsim aktar ekwu tar-responsabbiltajiet ta’ kura, u miżuri li jappoġġaw l-indipendenza ekonomika tan-nisa tul il-ħajja kollha. Dawn se jkomplu jiġu indirizzati permezz tal-implimentazzjoni tal-Istrateġija u l-Pjan ta’ Azzjoni ta’ Malta għall-Ugwaljanza bejn il-Ġeneri u l-Integrazzjoni tal-Ġeneru 2022–2027, kif ukoll fid-diskussjonijiet dwar il-qafas strateġiku li jmiss.

 

L-Indiċi tal-Ugwaljanza bejn il-Ġeneri 2026 juri li Malta miexja fid-direzzjoni t-tajba u rridu nkomplu nibnu fuq dan il-progress u niżguraw li t-titjib fl-impjieg u fil-parteċipazzjoni ekonomika jissarraf f’ugwaljanza dejjiema għan-nisa u l-irġiel f’kull stadju tal-ħajja.

 

Ritratt (MER)

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Malta tirreġistra wieħed mill-akbar avvanzi fl-ugwaljanza bejn il-ġeneri fl-UE
Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦAL GĦAWDEX  ŻiguŻajg jirritorna Għawdex għat-tielet darba bil-produzzjoni ‘What’s Missing’ għall-istudenti

PR261939

STQARRIJA MILL-MINISTERU GĦAL GĦAWDEX ŻiguŻajg jirritorna Għawdex għat-tie...

PRESS RELEASE BY THE MINISTRY FOR EQUALITY AND CIVIL RIGHTS Malta records one of the strongest improvements in gender equality in the EU

PR261938en

PRESS RELEASE BY THE MINISTRY FOR EQUALITY AND CIVIL RIGHTS Malta records o...

More Press Releases Right arrow