STQARRIJA MILL-MINISTERU GĦALL-ĠUSTIZZJA, IR-RIĊERKA U L-INNOVAZZJONI Tkompli tissaħħaħ is-sistema ġudizzjarja b’ħatra ta’ 9 medjaturi oħra fil-Qorti tal-Familja

Il-Ministru għall-Ġustizzja, ir-Riċerka u l-Innovazzjoni Clifton Grima llum ħatar 9 professjonisti oħra li se jiffurmaw parti mil-lista ta’ medjaturi li jkunu maħtura mill-Qorti abbażi ta’ roster biex jagħmluha ta’ medjaturi fi kwistjonijiet tal-familja.

Waqt messaġġ li għadda lil dawn il-professjonisti meta qassmilhom il-warrant, il-Ministru Grima enfasizza l-importanza tal-medjazzjoni bħala komponent ċentrali tas-sistema tal-ġustizzja, intiża li tiffaċilita d-djalogu bejn il-partijiet u tippromwovi soluzzjonijiet li jagħtu prijorità lill-benesseri tal-familji, speċjalment tat-tfal.

“Din il-ħatra mhijiex sempliċiment żieda fin-numru ta’ medjaturi, iżda hija miżura konkreta li tirrifletti l-impenn tagħna li nkomplu ntejbu s-servizzi offruti mill-Qorti tal-Familja u, fuq kollox, li nagħmlu l-proċess tal-medjazzjoni aktar effettiv u effiċjenti,” stqarr il-Ministru Grima.

Huwa fakkar li fil-bidu tax-xahar li għadda daħlu fis-seħħ il-maġġoranza tar-Regolamenti tal-Proċeduri tal-Qorti tal-Familja 2026 u l-Att tal-2026 li Jemenda Diversi Liġijiet Relatati mal-Istabbiliment tal-Qorti tal-Familja. Dispożizzjonijiet li introduċew riformi sostanzjali fil-mod kif jitmexxew il-proċedimenti tal-familja. Dan, flimkien mal-ħatra ta’ 10 medjaturi oħra, juri l-impenn tal-Gvern f’dan is-settur. Il-ħatra ta’ aktar medjaturi jixhed rikonoxximent tar-rwol kruċjali li għandhom il-medjaturi fil-ħidma li għaddejja lejn sistema ta’ ġustizzja aktar effettiva.

Il-Ministru Grima stqarr li l-Qorti tal-Familja tittratta sitwazzjonijiet li ħafna drabi jkunu sensittivi u kumplessi, u li jolqtu direttament il-ħajja personali u familjari tal-individwi involuti. Huwa enfasizza li f'ħafna każijiet, ikun hemm ukoll tfal li l-interessi tagħhom għandhom dejjem jibqgħu ċ-ċentru tal-attenzjoni.

“Għalhekk nappella lill-professjonisti kollha fil-qasam tal-liġi tal-familja, inkluż avukati, ħaddiema soċjali, u esperti oħra, biex ikomplu jippromwovu l-medjazzjoni bħala l-aħjar mezz biex jinstabu soluzzjonijiet għall-kunflitti tal-familja”, qal il-Ministru Clifton Grima, “Iż-żieda ta’ għaxar medjaturi ġodda se tippermetti li jkollna aktar riżorsi disponibbli, aktar kapaċità biex jiġu indirizzati t-talbiet li jitressqu u, fuq kollox, titjib fil-ħinijiet ta’ stennija.”

Il-ministru qal li aspett ieħor importanti huwa l-ħtieġa li jiġu onorati t-termini stabbiliti fid-dispożizzjonijiet tal-liġi. It-termini legali mhumiex sempliċiment dati fuq kalendarju, iżda garanzija li l-proċeduri jimxu b’ċertezza, b’serjetà u mingħajr dewmien mhux meħtieġ. “Din iż-żieda fir-riżorsi hija wkoll intiża sabiex l-amministrazzjoni tkun tista’ tippjana u torganizza aħjar ix-xogħol tagħha, tindirizza l-volum ta’ xogħol b’mod aktar effettiv u tiżgura li l-proċess tal-medjazzjoni jitwettaq fil-parametri ta’ żmien previsti mil-leġiżlazzjoni,” kompla l-Ministru Grima.

 “L-Aġenzija għas-Servizzi tal-Qrati għandha rwol essenzjali sabiex tiżgura li l-infrastruttura, ir-riżorsi u l-appoġġ amministrattiv ikunu adegwati għall-ħtiġijiet ta’ sistema ġudizzjarja li qed tevolvi kontinwament” temm jgħid il-Ministru Clifton Grima.

Preżenti għaċ-ċerimonja kien hemm ukoll il-Kap Eżekuttiv tal-Aġenzija għas-Servizzi tal-Qrati, Dr Vanessa Grech.