STQARRIJA MILL-UFFIĊĊJU NAZZJONALI TAL-VERIFIKA Verifika ta' Effettività: An assessment of capital projects at the University of Malta
L-Awditur Ġenerali, is-Sur Charles Deguara, ippreżenta l-istudju hawn fuq imsemmi lill-President tal-Kamra tad-Deputati, Dr Anġlu Farrugia. Din il-verifika ta' prestazzjoni ffukat fuq żewġ proġetti kapitali tal-Università ta' Malta (UM), li huma s-Sustainable Living Complex (SLC) u l-Campus Hub. L-għan prinċipali tal-Uffiċċju Nazzjonali tal-Verifika (NAO) kien li jiddetermina kemm il-proġetti kapitali qed jissodisfaw il-ħtiġijiet tal-Università b'mod kost-effettiv. L-NAO għażel dawn iż-żewġ proġetti minħabba l-materjalità finanzjarja (€48 miljun u €46.7 miljun rispettivament), l-għanijiet speċifiċi tagħhom fi ħdan l-iżvilupp strateġiku tal-UM, kif ukoll biex tippermetti analiżi komparattiva bejn proġetti kapitali li jiġu ffinanzjati u implimentati kompletament mill-Università, u dawk li huma suġġetti għal arranġamenti ta' kofinanzjament mal-Unjoni Ewropea (UE).
Il-proġett ta' SLC kien konformi mar-rekwiżiti tal-UE, speċjalment fejn jidħlu l-istudji li jikkunsidraw mhux biss l-aspetti finanzjarji iżda wkoll il-ħtiġijiet attwali u futuri tal-UM. Minħabba dewmien ġustifikat, l-Università għażlet li tiddevja minn aspetti tad-disinn oriġinali tal-proġett biex tiggwadanja ż-żmien. Bid-deċiżjoni li ma tiġix estratta aktar ġebla minn fuq il-post tal-kostruzzjoni sabiex tintuża kemm għas-sottostruttura ta' SLC kif ukoll għal xi faċċati, l-UM tilfet l-opportunità li tħaddan aħjar il-prinċipji tal-ekonomija ċirkolari. Madankollu, l-Università għandha l-ħsieb li eventwalment tinkludi diversi elementi sostenibbli oħra fis-SLC.
Evalwazzjoni tal-ippjanar u l-ġestjoni fl-iżvilupp tal-Campus Hub identifikat tliet nuqqasijiet ewlenin. L-ewwel nett, l-UM għamlet il-valutazzjoni tal-fattibilità finanzjarja tal-proġett wara li rċeviet il-proposta tal-kuntrattur għat-Talba għal Proposti (RfP) tagħha, u ma pprovdietx evidenza tal-kalkoli preliminari li setgħu saru. It-tieni, l-Università ħarġet ir-RfP direttament u mhux mid-Dipartiment tal-Kuntratti (DoC). Filwaqt li dan l-approċċ ma kienx irregolari dak iż-żmien, l-Università tilfet l-opportunità li tibbenefika mill-esperjenza tad-DoC kif ukoll espożizzjoni akbar tal-proġett li kienet mistennija twassal għal vantaġġi kompetittivi. It-tielet, kwistjonijiet ta' koordinazzjoni xekklu lill-UM/Gvern milli jiddeterminaw il-bżonnijiet tagħhom fi stadju bikri, preferibbilment qabel il-ħruġ tal-RfP. Dawn iċ-ċirkostanzi affettwaw ir-rilokazzjoni potenzjali tal-Iskola Medika fi ħdan il-Campus Hub, l-ammont ta' spazju li l-UM kellha tikri minn dan il-proġett, u l-ġestjoni tal-parkeġġ.
Mill-perspettiva tal-valur għall-flus, l-NAO nnota li l-ispejjeż tal-iżvilupp tal-SLC huma ġeneralment konformi mal-prezzijiet tas-suq prevalenti fl-industrija tal-kostruzzjoni. Għalkemm l-SLC ġeneralment irnexxielu jżomm l-ispejjeż tiegħu fi ħdan il-baġit, dan jista' jiġi affettwat b'mod negattiv f'każ ta' dewmien sinifikanti peress li l-ispejjeż tal-materjali kif ukoll tax-xogħlijiet dejjem kienu qed jiżdiedu fl-aħħar snin.
Bl-istess mod, il-proġett tal-Campus Hub ukoll jissodisfa l-kriterji finanzjarji u ekonomiċi. Madankollu, din il-verifika tistaqsi jekk l-UM setgħetx tagħmel ftehim aħjar, partikolarment minħabba n-nuqqas ta' involviment tad-DoC u r-rilokazzjoni potenzjali tal-Iskola Medika.
L-istudju tal-NAO wera li dawn iż-żewġ proġetti għandhom il-potenzjal li jsostnu l-ħajja fl-Università. Din il-verifika ta' prestazzjoni kkonfermat li l-qafas amministrattiv tal-UM għandu l-kapaċità neċessarja biex jimplimenta proġetti kapitali ta' kobor sinifikanti, kif ukoll biex jevalwa l-kontribut ta' dawn il-proġetti kapitali f'termini tal-għanijiet strateġiċi tal-Università. Madankollu l-impatt tagħhom f'termini finanzjarji, ekonomiċi u soċjali seta' żdied permezz ta' komunikazzjoni, koordinazzjoni u ppjanar aħjar. F'dan ir-rigward, l-NAO ppropona numru ta' rakkomandazzjonijiet.
Ir-rapport huwa aċċessibbli mill-website tal-uffiċċju www.nao.gov.mt jew mill-paġna ta' Facebook www.facebook.com/NAOMalta.
Stqarrijiet Oħra:
PR261937en
PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...
PR261937