Left arrow Go Back

​ STQARRIJA MIS-SEGRETARJAT PARLAMENTARI GĦAS-SAJD, L-AKWAKULTURA U D-DRITTIJIET TAL-ANNIMALI Skema ta’ restawr għal bastimenti tradizzjonali tas-sajd

pr230500
Date Icon 06/04/2023

Għall-ħames sena konsekuttiva, il-Gvern permezz tad-Dipartiment tas-Sajd u l-Akwakultura, nieda skema ta’ restawr biex jinvesti fil-flotta tas-sajd tradizzjonali Maltija. 

Din hija skema fejn madwar 215-il sajjied ser jibbenefikaw minn massimu ta’ €2,700 f’fondi lura, wara li jkunu għamlu l-manutenzjoni meħtieġa u ħadmu b’mod professjonali fuq dawn il-bastimenti tradizzjonali tas-sajd. 

Dan l-investiment qed jikkontribwixxi wkoll biex ikompli jixpruna t-turiżmu fiż-żoni tal-port, hekk kif dawn id-dgħajjes għandhom valur kulturali li jiġġenera interess fost it-turisti li jżuru pajjiżna.

Is-Segretarju Parlamentari għas-Sajd, l-Akwakultura u d-Drittijiet tal-Annimali Alicia Bugeja Said spjegat kif l-istorja tas-sajd f’pajjiżna nbniet fuq l-użu ta’ dawn il-bastimenti tradizzjonali u li dawn il-bastimenti mhumiex biss għodda essenzjali għal mijiet ta’ sajjieda f’pajjiżna iżda “huma wkoll parti integrali mit-tessut storiku, soċjali u kulturali ta’ pajjiżna; element li jeħtieġ inkomplu ninvestu fih.”

“Nemmnu wkoll li dawn id-dgħajjes m’għandhomx biss jiġu ppreservati u jinżammu fuq l-art. Bħal kull dgħajsa oħra, m’hemmx post isbaħ għal-luzzu u għall-kajjikk milli fil-baħar, użati ta’ kuljum mis-sajjieda ħabrieka tagħna,” tenniet is-Segretarju Parlamentari Bugeja Said. 

L-applikazzjoni ntbagħtu bil-posta lis-sajjieda rreġistrati bħala MFA jew MFB u li għandhom dgħajsa tal-injam, taħt il-kategorija ta’ luzzu, firilla, frejgatina u kajjik. L-għajnuna li se tingħata hija relatata mal-materjal li jinxtara biex jirrestawraw dawn it-tip ta’ dgħajjes. 

Dawn il-Formoli tal-Applikazzjoni għandhom jintbagħtu bil-posta u jiġu indirizzati lil Projects Unit fi ħdan id-Dipartiment tas-Sajd u l-Akwakultura bejn l-24 ta’ April u t-8 ta’ Mejju 2023. L-applikazzjonijiet jistgħu jintbagħtu bil-posta f’diversi uffiċini tal-ħatt madwar Malta u Għawdex sad-data indikata.

Għal aktar informazzjoni dwar din l-iskema wieħed jista’ jikkuntattja lid-Dipartiment tas-Sajd u Akwakultura billi jċempel fuq 23397113/23397118.

​ STQARRIJA MIS-SEGRETARJAT PARLAMENTARI GĦAS-SAJD, L-AKWAKULTURA U D-DRITTIJIET TAL-ANNIMALI Skema ta’ restawr għal bastimenti tradizzjonali tas-sajd
​ STQARRIJA MIS-SEGRETARJAT PARLAMENTARI GĦAS-SAJD, L-AKWAKULTURA U D-DRITTIJIET TAL-ANNIMALI Skema ta’ restawr għal bastimenti tradizzjonali tas-sajd
Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦAL GĦAWDEX  ŻiguŻajg jirritorna Għawdex għat-tielet darba bil-produzzjoni ‘What’s Missing’ għall-istudenti

PR261939

STQARRIJA MILL-MINISTERU GĦAL GĦAWDEX ŻiguŻajg jirritorna Għawdex għat-tie...

PRESS RELEASE BY THE MINISTRY FOR EQUALITY AND CIVIL RIGHTS Malta records one of the strongest improvements in gender equality in the EU

PR261938en

PRESS RELEASE BY THE MINISTRY FOR EQUALITY AND CIVIL RIGHTS Malta records o...

More Press Releases Right arrow