STQARRIJA MILL-MINISTERU GĦALL-AMBJENT, L-ENERĠIJA U L-INTRAPRIŻA INWETTQU FLIMKIEN: Fi 12-il xahar, il-Malta Enterprise tapprova 103 proġett b’investiment ta’ €75 miljun
103 proġett lokali u ta’ investiment dirett barrani li se joħolqu iktar minn 1,000 karriera ġdida
Fl-aħħar 12-il xahar, il-Malta Enterprise approvat 103 proġett lokali jew ta’ investiment dirett barrani li flimkien ser ifissru €75 miljun f’investiment ġdid fl-ekonomija Maltija. It-twettiq ta’ dawn il-proġetti se jfisser il-ħolqien ta’ aktar minn 1,000 karriera ġdida.
Dan tħabbar mill-Ministru għall-Ambjent, l-Enerġija u l-Intrapriża, Miriam Dalli, u mill-Kap Eżekuttiv tal-Malta Enterprise, Kurt Farrugia, waqt żjara fuq is-sit ta’ Torrent Pharma f’Ħal Far, kumpanija ġdida fil-qasam tal-farmaċewtika li f’Marzu tas-sena l-oħra ħabbret li ser tiftaħ il-bażi tagħha għall-operat fl-Unjoni Ewropea, f’pajjiżna b’investiment ta’ €22 miljun.
Fi ftit xhur minn mindu ħabbret li ser tinvesti f’Malta, din il-kumpanija diġà wettqet 30 fil-mija tax-xogħol tagħha fuq il-faċilità li minnha Torrent Pharma se tirrilaxxa miljuni ta’ prodotti mediċinali fis-sena għas-suq Ewropew.
“L-investiment minn Torrent Pharma Malta huwa biss wieħed mill-investimenti ta’ kwalità li kburin li qed nattiraw lejn pajjiżna. Dan il-proġett multimiljunarju huwa eżempju ieħor tal-kwalità tal-investimenti li nfittxu għal Malta u Għawdex. Grazzi għall-Malta Enterprise, fl-aħħar 12-il xahar ġew approvati €75 miljun f’investiment minn kumpaniji Maltin u barranin,” qalet il-Ministru Miriam Dalli.
Spjegat li l-gvern qed jaħdem biex jiffaċilita l-investiment minn kumpaniji Maltin u barranin, biex jinħolqu postijiet tax-xogħol ta’ kwalità u li joffru wkoll liż-żgħażagħ karriera ta’ kwalità.
“Il-viżjoni tagħna hi li nkomplu niddiversifikaw l-ekonomija ta’ pajjiżna u nattiraw lil dawk il-kumpaniji fil-bijoteknoloġija, teknoloġija medika u farmaċewtika, dawk f’setturi diġitali bħal AI u VR u dawk li joperaw fl-ekonomija blu u ħadra.”
Dwar dan tkellem ukoll il-Kap Eżekuttiv tal-Malta Enterprise, Kurt Farrugia. “Iċ-ċifra tal-investiment approvat hija waħda b’saħħitha, daqskemm huma importanti ċ-ċifri ta’ 1,000 impjieg ġdid. Karrieri li se jkunu qed jinħolqu fi professjonijiet u oqsma varji, minn xjentisti fil-laboratorji, għal speċjalisti tal-intelliġenza artifiċjali, minn dawk li jiktbu l-code għal-logħob diġitali għal dawk li qed jaħdmu fuq robots li jintużaw fil-marittimu.”
Kruċjali għall-attrazzjoni ta’ dawn l-investimenti huma skemi varji mħaddma minn Malta Enterprise, bħal Bstart, Startup Finance, INVEST, Microinvest u l-iskema Smart and Sustainable, fost l-oħrajn.
Intant, il-Viċi President ta’ Torrent International, Amul Agrawal, irringrazzja lill-Gvern Malti, lill-Malta Enterprise u lill-awtoritajiet regolatorji f’pajjiżna għall-impenn tagħhom biex dan l-investiment qed isir realtà.
“F’isem il-maniġment ta’ Torrent, nixtiequ nirringrazzjaw lill-Gvern Malti li laqagħna f’pajjiżu. Impressjonati bis-sapport li rċivejna mingħand l-Awtorità tal-Mediċina Maltija u minn Malta Enterprise. Kunfidenti li l-operat f’Malta se jikkontribwixxi bi sħiħ lejn it-tkabbir ta’ Torrent fl-Ewropa, u nħarsu ’l quddiem biex nagħmlu f’Malta ċ-ċentru tal-operat tagħna fl-Ewropa,” qal il-Viċi President Amul Agrawal.
Il-konferenza tal-aħbarijiet kienet indirizzata wkoll mid-Direttur Maniġerjali ta’ Torrent Pharma Malta, Frederick Schembri, li qal li, “Il-proġett ta’ Torrent Malta qed jagħti rikonoxximent lit-talent lokali. Għalhekk huwa verament proġett Malti, b’periti, b’inġiniera u b’ħaddiema lokali li huma involuti f’kull stadju tal-proġett. Id-disinn huwa wieħed uniku u innovattiv għall-industrija tal-manifattura Maltija fejn iħares lejn is-sostenibbiltà bi ħsieb, lejn il-vertikalizzazzjoni. Fi spazju ta’ 3,800 metru kwadru qed nibnu bejn wieħed u ieħor 9,000 metru kwadru ta’ faċilità, fejn b’hekk qed nużaw l-ispazju kollu tal-art.”
Stqarrijiet Oħra:
PR261939
STQARRIJA MILL-MINISTERU GĦAL GĦAWDEX ŻiguŻajg jirritorna Għawdex għat-tie...
PR261938en