Left arrow Mur Lura

OPRA F’ĠIEĦ IL-KOMPOŻITUR CHARLES CAMILLERI

PR0658
Date Icon 07/05/2007

L-Orkestra Nazzjonali flimkien mal-Management tat-Teatru Manoel se jtellgħu l-Opra ‘Il-Wegħda’, kompożizzjoni ta’ Charles Camilleri fuq il-librett ta’ Joe Friggieri. L-Opra ‘Il-Wegħda’ qed tittella’ f’ġieħ l-istess Charles Camilleri li għalaq 75 sena f’Settembru tas-sena l-oħra. 

L-ewwel produzzjoni ta’ ‘Il-Wegħda’ saret fil-Ġonna ta’ San Anton fl-10 ta’ Awissu 1984 bħala parti mill-Maltafest, festival sajfi tal-performing arts. Din hi l-ewwel opra b’librett Malti li tiġbor taħlita ta’ kanzunetti, żfin u xogħol ieħor tal-palk fl-isfond ta’ villaġġ tradizzjonali Għawdxi. 

L-opera ‘Il-Wegħda’ hi produzzjoni ta’ Joe Friggieri li fiha ser jieħu sehem il-kor Jubilate Deo Choir taħt it-tmexxija ta’ Christopher Muscat. L-Orkestra Nazzjonali ser tkun taħt id-direzzjoni ta’ Joseph Debrincat b’Marcelline Agius bħala leader. Il-koreografija ser tkun f’idejn Ms Clarissa Borg ta’ Creative Dance Studio. Il-kast jinkludi lil Rosabelle Bianchi bħala Marì, Charles Vincenti bħala Nikol, Albert Buttigieg bħala Sidor, Noel Galea bħala l-Kappillan u Sophie Grech bħala il-Ġara. Il-partijiet mitkellma ser isiru minn Teresa Micallef, Ninette Micallef u Marlene Schranz bħala seksieka u minn Martin Gauci u Teresa Gauci bħala l-buffi. 

Il-Ministru għat-Turiżmu u Kultura Francis Zammit Dimech meta nieda din l-Opra Maltija qal li kien xieraq li Charles Camilleri, l-aqwa kompożitur kontemporanju Malti, jingħata ġieħ f’għeluq il-75 sena tiegħu. Hu qal li Charles Camilleri għamlilna unur mhux biss f’pajjiżna iżda wkoll barra minn xtutna u għalhekk kien xieraq li l-Orkestra Nazzjonali u t-Teatru Manoel jgħaqqdu l-isforzi tagħhom biex itellgħu din l-opra li l-istess Camilleri kkompona. 

“F’dawn l-aħħar snin l-Orkestra Nazzjonali flimkien mat-Teatru Manoel kienu qed jagħmlu kull sforz biex itellgħu xogħol ta’ kompożituri Maltin. Hu qal li fl-aħħar ftit xhur ittellgħu xogħlijiet ta’ Nicolò Isouard, Vassalli, Carlo Diacono u Charles Camilleri. Dan kien sforz fid-direzzjoni t-tajba għaliex permezz tax-xogħlijiet ta’ dawn il-kompożituri kbar Maltin qed nuru li Malta għandha ħafna x’toffri fejn tidħol l-kompożizzjoni u l-eżekuzzjoni tal-mużika,” tenna l-Ministru Zammit Dimech. 

Il-Ministru għat-Turiżmu u Kultura qal li l-kunċerti li qed tagħti l-Orkestra Nazzjonali saru parti essenzjali mill-kalendarju kulturali tagħna. Hu qal li fl-istess waqt it-Teatru Manoel hu bejta ta’ attivita’ kulturali li qed tikber aktar ma qed jiżdiedu l-faċilitajiet fil-kumpless ta’ dan it-Teatru Nazzjonali. 

Il-Ministru Zammit Dimech qal li kemm l-Orkestra Nazzjonali kif ukoll it-Teatru Manoel jagħtu wkoll is-sehem tagħhom lejn is-settur turistiku u lejn l-isforzi li qed isiru biex ngħollu u ntejjbu l-prodott li noffru. Hu tenna li fi żmien meta Malta qed tintagħżel minn eluf ta’ barranin bħala vaganza ta’ esperjenza sew l-Orkestra Nazzjonali, kif ukoll it-Teatru Manoel kellhom kontribut qawwi x’jagħtu. 

Is-Segretarju Parlamentari Tonio Fenech, li kien preżenti wkoll għall-konferenza ta’ l-aħbarijiet, qal li n-National Lotteries Good Causes Fund qed jgħin finanzjarjament sabiex tkun tista’ tittella’ din l-Opra. Huwa qal li dan il-Fond qed igħin b’mod attiv lill-aspett kulturali ġewwa pajjiżna, u huwa ta’ pjaċir għalih li qed jgħin sabiex tittella’ Opra li hija xogħol kompożitur Malti. 

Il-Ministru Francis Zammit Dimech u s-Segretarju Parlamentari Tonio Fenech ferħu lil Charles Camilleri f’għeluq il-75 sena tiegħu u awgurawlu ħafna aktar snin ta’ ħidma favur il-kultura tal-mużika f’pajjiżna.
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MILL-MINISTERU GĦALL-EDUKAZZJONI U L-ISPORT  Il-Ministru Byron Camilleri jirrikonoxxi s-suċċess storiku tat-timijiet Maltin tal-golf fil-Kampjonati Ewropej

PR261962

STQARRIJA MILL-MINISTERU GĦALL-EDUKAZZJONI U L-ISPORT Il-Ministru Byron Ca...

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSUMER PROTECTION  Malta brings together 15 startups from 12 countries to advance innovation in circular electronics

PR261961en

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...

Aktar Stqarrijiet Right arrow