RISPOSTA GHAL RAPPORTI LI DEHRU FIL-MEDIA DWAR IT-TAX COMPLIANCE UNIT
B’referenza għal rapporti li dehru fl-istampa ta’ nhar il-Ġimgħa, 7 ta’ April wara laqgħa tal-GRTU għall-hairdressers, hemm bżonn li jiġu ċċarati xi punti kif kienu rrapurtati fil-gazzetti dwar it-Tax Compliance Unit (TCU)fi ħdan il-Ministeru tal-Finanzi.
1. Ġie rrapurtat li l-hairdressers qed iħossuhom rikattati, mhedda u sfurzati mill-uffiċjali tat-TCU biex jidħlu fi ftehim għall-ħlas tat-taxxa fuq id-dħul u l-VAT. Dan mhux kliem li jintuża fil-konfront ta’ uffiċjali pubbliċi li qegħdin jagħmlu dmirhom skond skema li nieda l-Gvern fl-2002.
2. L-akkużi ta’ sfurzar, theddid, eċċ huma foloz. It-TCU tibgħat biss għal dawk it-taxpayers (hairdressers) li juru interess fl-iskema. Ta’ min jgħid hawn li l-vantaġġ ta’ din l-iskema huwa s-serħan tal-moħħ meta t-taxpayer jiġi biex jimla d-denunzja tat-taxxa. Fl-ewwel laqgħa mat-taxpayer, jiġu spjegati l-kundizzjonijiet ta’ l-iskema u l-vantaġġi, iżda wkoll xi żvantaġġi. Imbagħad kulħadd jitħalla fil-libertà. Ta’ min jgħid hawn li fil-passat, il-GRTU aċċettat din l-iskema għal setturi oħra ta’ self-employed.
3. Il-proċedura użata hi li t-taxpayer jintalab jipproduċi dokumenti tipiċi tan-negozju biex wieħed ikun jista’ jara l-andament tax-xogħol. Ikunu kkunsidrati wkoll spejjeż oħra, anki mingħajr dokumenti, basta dawn ikunu raġonevoli. Minn meta ġiet imħabbra, is-surcharge tad-dawl u l-ilma dejjem kienet, u qed tkun, ikkunsidrata bħala spiża oħra fil-kalkoli. Għalhekk, meta jkun ikkalkulat id-dħul għal kull sena fuq tliet snin bil-quddiem, dan ikun ibbażat fuq il-potenzjal tal-bejgħ preżenti, iżda jkunu kkunsidrati wkoll l-ispejjeż li jistgħu jinqalgħu matul iż-żmien ta’ l-agreement.
4. Kull każ huwa trattat fuq il-merti tiegħu.
5. Kuntrarju għal dak li qed tgħid il-GRTU, tant mhux il-każ li l-impjegati tat-TCU qed jagħmlu pressjoni lil xi ħadd biex jikkonkludi xi agreement, li 27 fil-mija tal-hairdressers li s’issa resqu għal diskussjonijiet taħt l-iskema ma ffirmawx agreement. Meta mbagħad xi ħadd minn dawn jistaqsi x’ jista’ jiġri fil-futur, ir-risposta hija dejjem waħda: il-pożizzjoni tat-taxpayer/hairdresser hija l-istess bħal ta’ kull ċittadin ieħor f’Malta fir-rigward ta’ ħlas ta’ taxxi. Żgur li spjegazzjoni mill-uffiċjali dwar l-obbligi taċ-ċittadini ma tistax tittieħed bħala theddid. Anzi, l-uffiċjal ikun qed jonqos jekk iħalli t-taxpayer fil-għama dwar il-konsegwenzi li jista’ jkun hemm f’każ li xi ċittadin ikun investigat fi kwistjoni li għandha x’taqsam mat-taxxa tad-dħul u l-VAT.
Għaldaqstant l-akkużi li, kif kien irrapurtat fl-istampa, saru waqt il-laqgħa tal-GRTU dwar l-imġieba ta’ l-uffiċjali tat-TCU, huma kompletament bla bażi u ta’ min jikkundannhom, l-aktar għaliex setgħu saru bl-iskop li jinfluwenzaw ħażin l-istess uffiċjali fil-qadi ta’ dmirijiethom.
Stqarrijiet Oħra:
PR261957
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261956