CHAIRMAN ĠDID GĦALL-KUNSILL MALTI GĦALL-ISPORT
Is-Sur Franco Azzopardi huwa ċ-Chairman il-ġdid tal-Kunsill Malti għall-Isport. Minħabba din il-kariga, is-Sur Azzopardi kellu jirriżenja minn President tat-Traditional Karate Federation of Malta (TKFM), pożizzjoni li kien ilu jokkupa mill-1999. Franco Azzopardi beda jipprattika dan l-isport mill-1983 u stinka ferm biex Malta jkollha isem tajjeb f’dan l-isport.
Illum is-Sur Azzopardi qed jara l-frott tax-xogħol tiegħu permezz ta’ l-għaxar ‘clubs’ li nfetħu madwar Malta kollha, kemm għall-kbar kif ukoll għaz-żgħar, u permezz ta’ diversi midalji tad-deheb, fidda u bronż li ġew akkwistati kemm f’attivitajiet Ewropej kif ukoll fil-World Championships.
Wieħed minn dawn l-atleti promettenti ferm huwa Omar Azzopardi li fl-2001 rebaħ midalja tad-deheb ta’ l-Under 18, kif ukoll midalja tal-bronż flimkien ma’ Iden Azzopardi. Is-sena l-oħra Omar ikkompeta fl-Under 21 fl-attività tal-Kata u rebaħ midalja oħra tal-bronż. F’din l-attività ħadu sehem l-aqwa atleti minn 26 pajjiż ieħor. Bhalissa Omar Azzopardi qed jipprepara għall-Europeans ta’ din is-sena li ser issir fil-Maċedonja u aktar tard fil-World Championships li ser isiru fl-Isvizzera.
Ta’ min jgħid ukoll li s-sena d-dieħla l-European Championships ser isiru Malta. Diversi atleti minn pajjiżi Ewropej ser jieħdu sehem u b’kollox in-numru ta’ atleti li ser jagħtu sehemhom huwa ta’ madwar 200 persuna. Din hi opportunità mill-isbaħ għal Malta għaliex din l-attività ser isservi bħala promozzjoni għal pajjiżna.
Malta kisbet diversi rizultati tajbin f’din l-attivita’ li ssir kull sena, u ħafna drabi atleti Maltin sabu ruħhom fl-ewwel ħames postijiet. It-TKFM tistieden lill-Maltin u l-Għawdxin kollha biex jattendu għal din l-attività u juru l-appoġġ tagħhom għal dawn l-atleti.
Il-Ministru għall-Edukazzjoni, Żgħażagħ u Mpjiegi Louis Galea qal li "attivitajiet bħal dawn huma ta’ inċentiv sabiħ għal kull wieħed u waħda minna mhux biss biex nagħtu l-appoġġ sħiħ tagħna lill-atleti Maltin, iżda biex nitħajru nkunu aktar attivi fil-ħajja tagħna. Xempju ta’ dan huwa ż-żagħżugħ Malti Omar Azzopardi". Il-Ministru awgura lil Omar aktar suċċess fil-karriera tiegħu u rringrazzja lis-Sur Franco Azzopardi tax-xogħol tiegħu f’dan il-qasam, fil-waqt li awguralu għall-promozzjoni li għadu kif ingħata.
Other Press Releases:
PR261938en
PRESS RELEASE BY THE MINISTRY FOR EQUALITY AND CIVIL RIGHTS Malta records o...
PR261938