PROGRAMMI U FONDI MILL-UE GĦALL-PROMOZZJONI KULTURALI
PROGRAMMI U FONDI MILL-UE GĦALL-PROMOZZJONI KULTURALI
Meta kien qed jinawgura website dwar Culture 2000 kif ukoll sensiela ta’ Seminars Informattivi dwar Kultura 2000, il-Ministru għat-Turiżmu u Kultura Francis Zammit Dimech qal li l-kultura tagħna tagħżilna minn kull nazzjon ieħor u darba sseħibna fl-Unjoni Ewropea, li tirrispetta l-kulturi u l-identitajiet tal-pajjiżi membri fl-UE, irridu nagħmlu kull sforz biex insaħħu l-kultura tagħna.
Francis Zammit Dimech qal li bħala Ministru għat-Turiżmu u l-Kultura kien jemmen li l-kultura kienet mhux biss tgħinna biex inżommu l-identita’ tagħna iżda tikkontribwixxu ukoll lejn is-settur turistiku. Hu qal li kien jirriżultalu li madwar 200,000 turist fis-sena jżuru pajjiżna għall-wirt kulturali u storiku tagħna. Hu qal li dan kien fid-direzzjoni t-tajba għaliex kienet il-politika tal-Gvern li fil-qasam turistiku – li minnu jiddependi kwart tal-ġid nazzjonali – għandna nippromwovu pajjiżna aktar bħala esperjenza milli bħala destinazzjoni.
Il-Ministru Francis Zammit Dimech qal li f’dawn l-aħħar ġimgħat il-poplu sar aktar konxju mill-kultura ta’ pajjiżna u dan kien qed jesprimieh b’kull mezz. Hu qal li kien ta’ inkoraggiment jinnota l-interess li qiegħed dejjem jikber fil-lingwa Maltija, f’wirjiet kulturali, kunċerti mużikali u f’attivitajiet marbuta ma’ l-istorja millenarja ta’ pajjiżna li tmur lura 7,000 sena.
Francis Zammit Dimech qal li kif diġa’ kien innota l-Unjoni Ewropea kienet tirrispetta d-diversita’ ta’ kultura tal-pajjiżi membri u kienet anke tippromwovi dawn il-kulturi permezz ta’ programmi u finanzjament. Hu qal li programm ta’ l-Unjoni Ewropea, li l-iskop tieghu huwa li jgħin biex tiġi inkoraggita l-kreazzjoni u l-mobilta’ kulturali, l-aċċess tal-kultura għal kulħadd, it-tifrix ta’ l-arti u l-kultura, id-djalogu interkulturali u tagħrif dwar l-istorja tal-popli Ewropej, kien igib l-isem ‘Kultura 2000’, li Malta bdiet tipparteċipa fih mis-sena li ghaddiet.
Il-Ministru Francis Zammit Dimech qal li s-sena l-oħra, l-area ta’ priorita’ kienet il-performing arts u Malta ħadet sehem fi proġett ta’ kooperazzjoni ma’ Ċipru li ġabar fih il-Kavallier ta’ San Ġakbu, it-teatru nazzjonali f’Ċipru u Kneehigh Theatre mir-Renju Unit. Hu qal li għal dan il-proġett kienu allokati 124,623 Euro, bl-ewwel wirja ssir barra fil-Birgu f’Ottubru li għadda. Hu qal li din is-sena, il-priorita’ kien il-Wirt Kulturali fejn diġa’ kienu sottomessi applikazzjonijiet minn 20 organizzazzjoni kulturali Maltin. Hu qal li 18 minn dawn l-20 applikazzjoni kienu fis-settur tal-wirt kulturali. Dan kien jirrifletti mhux biss il-mod kif pajjiżna hu mogħni minn wirt kulturali uniku, iżda anke l-fatt li l-poplu Malti kien qed isir aktar konxju minn dan il-wirt.
Francis Zammit Dimech qal li llum kien qed iniedi l-website tat-Taqsima tal-Programm ta’ l-UE u s-seminars informattivi. Hu qal li l-website kienet se sservi ta’ għodda għal applikanti potenzjali biex ikunu aġġornati mal-programm. Din il-website se jkollha wkoll informazzjoni dwar programmi ta’ l-UE li għalkemm ma jkollhomx il-kultura bħala l-kriterju ewlieni, jikkontribwixxu wkoll għall-fondi kulturali. Dawn jinkludu l-Programmi Leonardo Da Vinci, il-Programm taż-Żgħażagħ u fondi strutturali. Il-website se jkollha wkoll aċċess għal links oħra importanti bħall-EU website.
Il-Ministru għat-Turiżmu u Kultura qal li l-Gvern kien qed iniedi wkoll seminars informattivi dwar ‘Kultura 2000’. Hu qal li dawn kienu l-aktar relevanti għal dawk li jinteressaw rwiehhom f’fondi għal programmi kulturali Ewropej.
Francis Zammit Dimech qal li Malta kienet għaddejja minn rinaxximent kulturali ġdid wara r-rinaxximent kulturali li segwa l-akkwist ta’ l-Indipendenza fl-1964. Hu qal li kull rinaxximent iġib miegħu sforzi ġodda biex nagħrfu l-għeruq tagħna, biex nippromwovu l-arti, il-mużika, il-folklor u dak kollu li jiddistingwina minn kull nazzjon ieħor. Il-Ministru għat-Turiżmu u Kultura ħeġġeġ lill-Maltin u l-Għawdxin biex jaħtfu l-opportunitajiet kbar li qed toffrilna s-sħubija fl-Unjoni Ewropea fil-qasam kulturali. Hu qal li proġetti kulturali mhux biss jikkontribwixxu biex jikber l-għerf fil-pajjiż iżda jgħinu wkoll fl-iżvilupp ekonomiku.
DOI - 25.05.2004
Other Press Releases:
PR261937en
PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...
PR261937