Left arrow Go Back

FTEHIM MAL-PBS DWAR PROGRAMMI B’KONTENUT KULTURALI

PR874
Date Icon 25/05/2004

FTEHIM MAL-PBS DWAR PROGRAMMI B’KONTENUT KULTURALI


Meta attenda għall-iffirmar ta’ kuntratt bejn il-Gvern u l-Public Broadcasting Services (PBS) dwar l-immaniġġjar mill-PBS ta’ l-Obbligu ghal Servizz Pubbliku, il-Ministru għat-Turiżmu u Kultura Francis Zammit Dimech qal li l-Politika Nazzjonali dwar ix-xandir kienet tistipula li jkun hemm kuntratt bejn il-Gvern u l-PBS dwar il-kontenut ta’ servizz pubbliku li l-Gvern ikun irid li jixxandar bi ħlas. Hu qal li skond l-Att dwar ix-Xandir, bħala Ministru responsabbli mill-kultura, kien assenjat ir-responsabbilta’ għall-politika dwar ix-xandir u għalhekk il-Ministeru għat-Turiżmu u l-Kultura kien se jkun responsabbli mill-Extended Public Service Obligation, li hu definit bħala programmi b’kontenut li l-Gvern, minħabba obbligazzjonijiet internazzjonali u lokali, irid li jkunu trasmessi mill-PBS u li għalihom il-Gvern irid iħallas.

Francis Zammit Dimech qal li dak li jikkonċerna lill-Gvern huma dawk l-obbligazzjonijiet li huma ta’ natura ta’ servizz pubbliku, għaliex huma dawn l-obbligazzjonijiet li jridu jiġu finanzjati mill-Gvern. Hu qal li kien importanti li dawn l-obbligazzjonijiet jiġu identifikati u dettaljati u hu anke importanti li r-relazzjoni bejn il-Gvern u l-PBS tkun tali li tagħti trasparenza u accountability. Hu qal li dan kollu jwassal biex ikun hemm kuntratt bejn il-Gvern u x-Xandar għal servizz pubbliku li fih ikun dettaljat il-kontenut li l-Gvern ikun irid lill-PBS tittrasmetti u li għalih titħallas. Hu qal li dawn il-programmi huma dawk orjentati kulturalment, edukattivi u soċjali – programmi li normalment ma jattirawx avviżi.

Il-Ministru għat-Turiżmu u Kultura qal li l-Gvern jemmen li l-extended public service obligationsgħandhom ikopru dawn il-programmi:

1.       it-trasmissjoni ta’ avvenimenti ta’ karattru nazzjonali kif determinat mill-Gvern minn żmien għal żmien;

2.       Trasmissjoni bir-radju tal-Parlament;

3.       Avviżi pubbliċi;

4.       programmi ta’ ġrajjiet kurrenti li jkopru topics soċjali, kulturali, edukattivi, industrjali u ta’ natura politika;

5.       programmi li jitrattaw topics reliġjużi u t-trasmissjoni tal-quddiesa fil-Ħdud u festi kmandati;

6.       programmi li jkollhom it-tfal bħala l-udjenza ewlenija;

7.       programmi bażati fuq drama oriġinali bil-Malti;

8.       programmi li huma fin-natura tagħhom kulturali iżda l-aktar dawk li  jgħollu il-lingwa Maltija u l-kultura;

9.       programmi fuq Għawdex u b’mod partikolari li joħorġu s-soċjeta’, il-kultura u l-mod kif jgħixu l-Għawdxin;

10.  programmi li jiffukaw fuq il-komunitajiet Maltin barra l-pajjiż;

11.  programmi ta’ informazzjoni ġenerali; u

12.  programmi li huma fin-natura tagħhom edukattivi.

Il-Ministru għat-Turiżmu u l-Kultura qal l-kuntratt fih 25 klawsola li fost affarijiet oħra jittrattaw l-għoti ta’ kuntratt lill-PBS dwar il-Public Service Obligation (PSO) biex ikun jista’ jiġi operat dan is-servizz, l-obbligazzjonijiet għal servizz pubbliku, is-servizzi li jridu jingħataw bħala parti mill-extended PSO, metodi ġodda biex jiġu pprovduti s-servizzi, il-perijodu tal-kuntratt, servizzi li jridu jingħataw skond il-liġi u kumpens finanzjarju għas-servizzi.

Francis Zammit Dimech tkellem imbagħad dwar kif ser jaħdem il-kuntratt bejn il-Gvern u l-PBS. Hu qal li

·        Il-Gvern ser iħabbar l-allokazzjoni għall-kuntratt tal-PSO fl-estimi ta’ kull sena;

·        Il-Ministeru responsabbli mill-Kultura, wara konsultazzjoni, igħid x’inhuma r-rekwiżiti tiegħu ghas-sentejn li jkunu ġejjin. Dawn jinkludu t-tip ta’ programmi, kemm ikunu twal, kemm jixxandru spiss.

·        Il-PBS tistma l-ispiża biex tissodisfa dawn ir-rekwiżiti;

·        Il-PBS iżżomm dettalji dwar l-infiq għal kull programm;

·        Jekk programm taħt dan il-kuntratt ikollu dħul mill-pubbliċità, nofs dan id-dħul irid jibqa’ fil-programm u jitnaqqas mill-allokazzjoni tal-Gvern;

·        Jekk fl-aħħar tas-sena l-PBS tispiċċa minn fuq minħabba li daħlu aktar riklami, il-PBS iżżomm nofs il-qligħ, kwart tal-qligħ imur lura għand il-Gvern u kwart jiżdied ma’ l-allokazzjoni għall-PSO tas-sena ta’ wara.

Il-Ministru Francis Zammit Dimech qal li kien jemmen li dawn ir-riformi kienu se jwasslu biex ikun hemm qabża fil-kwalita’ tal-programmi u li l-element edukattiv u kulturali ikun wieħed għoli. Hu qal li wieħed mill-effetti tas-sħubija ta’ Malta fl-Unjoni Ewropea kien li kiber l-interess fil-kultura u l-arti. Hu qal li dan ir-rinaxximent kulturali u artistiku ridna nżommuh u nkattruh għaliex il-kultura kienet tagħżilna minn nazzjonijiet oħra u kienet mezz importanti biex inżommu l-identita’ tagħna. Hu qal li l-kontribut li seta’ jagħti l-PBS f’dan ir-rinaxximent kien wieħed kbir u importanti u l-Gvern kien se jagħmel ħiltu biex fis-sehem li se jagħti bħala parti mill-obbligazzjoni tiegħu għal servizz pubbliku,  ikun hemm enfasi qawwija fuq l-kultura u l-arti.

DOI - 25.05.2004

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSUMER PROTECTION Malta hosts the second INNEXA International Summit to foster new innovation partnerships

PR261937en

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...

STQARRIJA MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZZJONI TAL-KONSUMATUR Jittella’ t-tieni summit internazzjonali INNEXA biex jitrawmu sħubijiet ġodda fl-innovazzjoni

PR261937

STQARRIJA MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZ...

More Press Releases Right arrow