Left arrow Go Back

IL-PROĠETT TAL-MILI BIR-RAMEL TAL-BAJJA TA’ SAN ĠORĠ JITLESTA SAL-ĠIMGĦA D-DIEĦLA

PR861
Date Icon 24/05/2004

IL-PROĠETT TAL-MILI BIR-RAMEL TAL-BAJJA TA’ SAN ĠORĠ JITLESTA SAL-ĠIMGĦA D-DIEĦLA

Il-Ministru għat-Turiżmu u Kultura Francis Zammit Dimech qal li kien ta’ sodisfazzjon għalih jara li l-proġett għall-mili tal-bajja ta’ San Ġorġ f’San Ġiljan, tlesta fi żmien qasir ta’ tmint ijiem. Hu qal li b’kollox ġew impurtati 5,000 metru kubu, jew 7,000 tunnellata ta’ ramel, biex issa l-bajja għandha ramla ikbar li se titgawda mill-Maltin u t-turisti.

Il-Ministru kien qed jitkellem waqt zjara li ghamel fil-bajja ta’ San Gorg, f’San Giljan. Huwa qal li r-ramel li kien impurtat għadda minn testijiet rigorużi biex tkun assigurata l-kwalita’ tiegħu. Hu qal li għal dan l-iskop kienet tqabbdet kumpannija li tivverifika l-kwalita’ speċifikament biex tissorvelja il-produzzjoni tar-ramel qabel dan jitgħabba fuq il-vapur. L-eżerċizzju kollu kien segwit ukoll minn rappreżentant tekniku lokali tal-proġett li ntbagħat apposta l-Ġordan.

Il-Ministru għat-Turiżmu u Kultura qal li l-5,000 borża tar-ramel kienu ittestjati individwalment, issiġġillati u numerati, biex ikunu żgurati l-ogħla livelli u biex kull ramla tkun ħielsa mill-kontaminazzjoni.

Il-Ministru Zammit Dimech qal li filwaqt li x-xogħlijiet se jkunu weqfin għas-sajf se niffinalizzaw il-pjanti dettaljati tal-promenade il-ġdid. Fil-proċess se jkunu konsultati l-partijiet interessati. Hu qal li x-xogħol jerġa’ jibda fl-aħħar tas-Sajf biex titlesta t-tieni fażi, li tinkludi xogħlijiet estensivi għal sistema ta’ gandott kbir li se jieħu l-ilma li jinżel mill-inħawi. Din il-parti tal-proġett trid titlesta qabel is-sajf tas-sena d-dieħla.

Il-Ministru għat-Turiżmu u l-Kultura qal li l-Awtorita’ Maltija għat-Turiżmu, permezz tad-Direttorat għall-Ippjanar tal-Prodott u l-Iżvilupp – li hu responsabbli għal dan il-proġett – se tassumi immedjatament ir-responsabbilta’ għall-immaniġġjar tal-bajja, li tinkludi superviżjoni 24 siegħa kuljum. Il-kriterji għal dan l-immaniġġjar se jkunu bbażati fuq il-ħtiġiet tal-‘blue flag’.

Francis Zammit Dimech qal li fi żmien qasir se toħroġ sejħa għal offerta għall-bini u t-tħaddim ta’ faċilita’ tal-‘catering’, li tinkludi ‘showers’, ‘toilets’ pubbliċi u Gazebo li tkun f’nofs il-bajja. Hu qal li l-area kollha se sservi biss bħala żona għall-għawm.

Il-Ministru għat-Turiżmu u Kultura qal li dan kien proġett ieħor maħsub biex itejjeb il-faċilitajiet li qed noffru f’pajjiżna għall-Maltin u t-turisti. Hu qal li f’dawn l-inħawi, fejn hemm għadd kbir ta’ lukandi, stabbilimenti ta’ l-ikel u ta’ divertiment twettqu, qed jitwettqu proġetti ta’ tisbiħ. Hu qal li diġa kien tlesta proġett ta’ tisbiħ tul it-triq li mill-bajja ta’ San Ġorġ twassal għat-triq ewlenija li tisbokka fi Triq Reġjonali. Francis Zammit Dimech qal li bħalissa kienet għaddejja ħidma kbira u intensiva biex jitlesta l-proġett ta’ tisbiħ f’Paceville.

Il-Ministru Francis Zammit Dimech qal li l-Gvern, permezz ta’ ħidma ta’ diversi ministeri, kien qed jagħmel ħiltu biex jagħti dehra dejjem isbaħ u aktar moderna lil pajjiżna. Hu qal li f’din il-ħidma l-Gvern kien jistenna l-kooperazzjoni ta’ kulħadd biex il-proġetti li jitwettqu, jitgawdew billi jinżammu fi stat tajjeb.

DOI – 24.05.2004
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSUMER PROTECTION Malta hosts the second INNEXA International Summit to foster new innovation partnerships

PR261937en

PRESS RELEASE BY THE MINISTRY FOR EUROPEAN FUNDS, SOCIAL DIALOGUE AND CONSU...

STQARRIJA MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZZJONI TAL-KONSUMATUR Jittella’ t-tieni summit internazzjonali INNEXA biex jitrawmu sħubijiet ġodda fl-innovazzjoni

PR261937

STQARRIJA MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZ...

More Press Releases Right arrow