JITLESTA L-PROĠETT ALGARDI FIL-KONKATIDRAL TA’ SAN ĠWANN
Minkejja r-responsabbilta’ għall-Konkatidral ta’ San Ġwann għaddiet f’idejn Fondazzjoni xorta waħda il-Proġett għar-Riabilitazzjoni tal-belt Valletta (VRP) baqa’ jappoġġja numru ta’ proġetti li għadhom pendenti. Dan qalu l-Ministru għar-Riżorsi u l-Infrastruttura Francis Zammit Dimech meta żar il-proġett Algardi fil-Konkatidral ta’ San Ġwann.
Hu qal li l-VRP baqa’ jappoġġja ukoll permezz ta’ materjal u spejjeż oħra il-grupp ta’ ħaddiema li qed iwettqu xogħol ta’ manutenzjoni fil-Konkatidral.
Francis Zammit Dimech fakkar li l-proġett Algardi issa tlesta. Hu qal li l-proġett tar-restawr tal-figura ta’ Kristu s-Salvatur ta’ Algardi hu wieħed mill-aktar proġetti importanti ta’ restawr li saru dan l-aħħar minħabba l-importanza kbira ta’ dan l-iskultur Barokk. Hu qal li l-proġett, li sewa mal-Lm10,000, kien finanzjat kollu kemm hu mill-Proġett għar-Riabilitazzjoni tal-belt Valletta fi ħdan il-Ministeru għar-Riżorsi u l-Infrastruttura.
Il-Ministru Zammit Dimech qal li parti mill-proġett hu d-dokumentazzjoni storika ta’ dan il-bronz importanti li sar fl-1693 għal niċċa fix-xatt tal-belt Valletta. Il-proġett ta’ riċerka sar minn Dr Keith Sciberras u Dr Jennifer Montagu.
Il-Ministru Zammit Dimech irringrazzja lil Keith Sciberras, lil Jennifer Montagu kif ukoll lil Ray Bondin li kkoordina dan il-proġett li sar minn Dott Sante Guido bl-għajnuna ta’ Giuseppe Mantella u t-tim tagħhom. Hu irringrazzja ukoll lill-Istituto Centrale di Restauro ta’ Ruma li għamlu parti mir-riċerka.
Il-Ministru għar-Riżorsi u l-Infrastruttura qal li proġett tal-leġiji, li l-VRP ħallas nofs l-ispejjeż għalih, għadu għaddej. Hu qal li l-Proġett għar-Riabilitazzjoni tal-belt Valletta kien qed jippjana li jwettaq proġetti oħra ta’ konservazzjoni fil-Konkatidral ta’ San Ġwann fosthom il-konservazzjoni tal-qabar ta’ La Vallette, il-konservazzjoni tal-Cappella Ardente, ir-restawr tal-Kappella ta’ Portugall fejn għaddejjin diskussjonijiet ma’ sponsors li jistgħu jgħinu fit-twettiq ta’ dan il-proġett.
Francis Zammit Dimech qal li l-Proġett għar-Riabilitazzjoni tal-belt Valletta wettaq numru kbir ta’ proġetti ta’ restawr u riabilitazzjoni fil-kapitali ta’ pajjiżna. Fakkar li bħalissa kien qed isir xogħol fil-Knisja tal-Ġiżwiti fejn tlesta r-restawr ta’ seba’ artali u baqa’ biss tnejn x’jitlestew. Qed isir restawr ta’ tnejn mill-pitturi filwaqt li ’l quddiem se jiġi restawrat il-kampnar ta’ l-istess knisja.
Il-Ministru Zammit Dimech qal li fil-Knisja tal-Vittorja qed isir xogħol ta’ restawr tal-bronz u ta’ l-irħam. Xogħol ieħor ta’ restawr u riabilitazzjoni qed isir fil-Barrakka t’Isfel u fil-Ġonna ta’ Hastings.
Il-Ministru għar-Riżorsi u l-Infrastruttura qal li l-akbar proġett li l-Proġett għar-Riabilitazzjoni tal-belt Valletta kien qed iwettaq fil-kapitali ta’ pajjiżna kien ir-riabilitazzjoni tal-ġonna tal-Barrakka ta’ Fuq. Hu qal li dan il-proġett, li kien se jiswa aktar minn Lm200,000, kien beda u se jinfirex fuq 18-il xahar.
Francis Zammit Dimech qal li l-proġett kien jinkludi l-partijiet kollha tal-ġnien inklużi l-partijiet ta’ fuq u s-saluting battery. Fil-parti ta’ fuq kien se jsir titjib ġenerali li jinkludi landscaping, pavimentar, sistema ġdida ta’ dwal u restawr. Bħalissa qed ikun restawrat il-monument ta’ Edwards. Hu qal li fil-parti ta’ isfel, fis-Saluting Battery, il-proġett hu wieħed ta’ restawr.
Il-Ministru għar-Riżorsi u l-Infrastruttura qal li l-proġetti ta’ restawr u riabilitazzjoni kienu qed jikkontribwixxu bis-sħiħ biex il-kapitali ta’ pajjiżna tiġi riġenerata mhux biss biex insalvaw diversi monumenti storiċi li tul is-snin sofrew danni kbar iżda anke biex ikunu attirati lura lejn il-Belt dawk il-familji li ħarġu. Francis Zammit Dimech qal li l-belt Valletta kienet ċentru ta’ storja u kultura li tinteressa lill-popli kollha tad-dinja li jaraw fil-kapitali ta’ pajjiżna waqfa oħra fl-istorja. Din il-belt, bl-istorja tagħha kienet tagħmilna kburin li aħna Maltin.
Stqarrijiet Oħra:
PR261930en
PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...
PR261930