STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Malta Miegħek: Jiżdiedu l-għotjiet għat-tagħlim tal-mużika fil-każini tal-banda u għall-għaqdiet volontarji li jaħdmu fost iż-żgħażagħ
Matul l-2027, se jiżdiedu l-għotjiet li jingħataw għat-tagħlim tal-mużika fil-Każini tal-Baned u għall-organizzazzjonijiet volontarji li jaħdmu fost iż-żgħażagħ. Dan tħabbar mill-Ministru għaż-Żgħażagħ, il-Benesseri u l-Implimentazzjoni tal-Programm Elettorali Omar Farrugia waqt konferenza mal-istess għaqdiet benefatturi.
Bħala parti mill-Budget 2027, il-Ministeru għaż-Żgħażagħ qed jalloka kważi €3 miljun li se jmorru kollha għall-inizjattivi, programmi, diskussjonijiet u konsultazzjonijiet fost iż-żgħażagħ.
Fir-rigward tal-iskemi ‘Musical Tuition for Youths in Band Clubs’ u l-iskema ‘Boost’, li huma amministrati mill-Aġenzija Żgħażagħ, kien hemm żieda fil-fondi li se jibbenefikaw minnhom dawk li japplikaw b’suċċess għal dawn l-iskemi u dan ikompli jikkonferma l-impenn tal-Gvern li jkompli jsaħħaħ is-settur taż-żgħażagħ.
Il-Ministru Farrugia ħabbar li fl-iskema tat-tagħlim tal-mużika fil-każini tal-baned, l-ammont li se jingħata lil kull għaqda se jirdoppja minn €2,500 għal €5,000. Fl-istess waqt, l-għotja li tingħata lil għaqdiet volontarji li jaħdmu fost iż-żgħażagħ se tiżdied ukoll minn €3,000 għal €3,500 lil kull għaqda.
Il-Ministru Farrugia tkellem dwar is-suċċess miksub minn dawn l-iskemi tant li matul din is-sena, kien hemm 57 każin jew għaqda tal-Banda li kkwalifikaw biex ħadu din l-għajnuna. F’dawk li huma għaqdiet taż-żgħażagħ, kien hemm madwar 130 għaqda li bbenefikaw u fost dawn l-għaqdiet kien hemm diversi friegħi tal-iscouts u l-girl guides, is-St John Ambulance, is-Sea Cadets, għaqdiet tal-armar tal-festi, għaqdiet tal-festi fosthom fratellanzi, kumitati tal-festi esterni u diversi għaqdiet oħra.
Il-Ministru semma kif il-każini tal-baned għandhom irwol importanti fit-tradizzjoni ewlenija tal-festa Maltija u fl-iżvilupp kulturali tal-komunitajiet fl-ibliet u l-irħula Maltin u Għawdxin. Spjega li l-każini tal-banda jużaw il-fondi li jingħataw kemm għat-tagħlim innifsu, kif ukoll biex jinxtraw strumenti jew aċċessorji tal-banda meħtieġa għat-tagħlim.
Min-naħa l-oħra, l-iskema BOOST tappoġġja lill-għaqdiet volontarji li jaħdmu fost iż-żgħażagħ billi tagħtihom fondi ħalli jtejbu l-kwalità tax-xogħol tagħhom. Kien hemm diversi għaqdiet li applikaw u kkwalifikaw għal din l-iskema u dan huwa l-ikbar prova tas-suċċess tagħha. Dawn l-għaqdiet ingħataw appoġġ biex jużaw għodda li tgħinhom jidentifikaw x’miżuri jridu jieħdu, ħalli x-xogħol tagħhom maż-żgħażagħ ikun wieħed adegwat, sostenibbli u li jħalli impatt pożittiv.
Il-Ministru Omar Farrugia temm jgħid li “l-Gvern kommess li jibqa’ jinvesti fl-għaqdiet volontarji sabiex il-proġetti tagħhom isiru realtà u se jibqa’ jinvesti fiż-żgħażagħ li jattendu t-tagħlim tal-mużika sabiex il-futur tagħhom verament ikun wieħed b’saħħtu.”
Min-naħa tiegħu, il-Kap Eżekuttiv tal-Aġenzija Żgħażagħ Jason Zammit qal kif dawn huma skemi li jibbenefikaw minnhom diversi għaqdiet li jaħdmu maż-żgħażagħ li bihom jagħmlu diversi proġetti u jixtru diversi riżorsi biex matul is-sena jwettqu l-proġetti kollha u l-ħolm kollu li jkollhom f’moħħhom.
Preżenti għal din il-konferenza, kien hemm ukoll il-President tal-Għaqda Nazzjonali Każini tal-Banda, Dr Noel Camilleri. Dan ikompli juri s-sinerġija b’saħħitha bejn l-Għaqda nnifisha u l-Aġenzija Żgħażagħ.
Other Press Releases:
PR261930en
PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...
PR261929