Left arrow Mur Lura

DISKORS TAL-MINISTRU TAS-SAHHA, L-ONOR. DR. LOUIS DEGUARA WAQT SEMINAR DWAR IS-SIGURTA` TA` L-IKEL – IL-QAWRA – NHAR L-ERBGHA 20 TA NOVEMBRU 2002

PR1640
Date Icon 20/11/2002

Meta sentejn ilu kelli l-opportunita` nindirizza okkażjoni simili, kont sħaqt fuq il-fatt li dan il-Gvern huwa kommess biex jagħmel dak kollu li hu meħtieġ biex iħares is-sigurta` ta’ l-ikel. Naħseb li meta nħarsu lura tul dawn l-aħħar sentejn nirrealizzaw kemm tabilħaqq ilħaqna l-għan tagħna u għaldaqstant ma jidhirlix li hemm bżonn ta’ wisq provi. Ir-riżultati miksuba jitkellmu waħidhom.

Ovvjament, l-Att dwar is-Sigurta` ta` l-Ikel li ġie fis-seħħ f’nofs Settembru li għadda, huwa pass kruċjali. Din il-liġi kienet saret urġenti minħabba d-dħul ta’ Malta fl-Unjoni Ewropea. Iżda l-bżonn reali tagħha qiegħed fil-fatt li l-Maltin jixirqilhom l-aħjar anke fejn jidħol l-ikel u x-xorb. Ma jixirqilhom xejn inqas mill-Ewropej u kienet liġi meħtieġa anke li kieku ma kellna l-ebda intenzjoni li nsiru membri ta’ l-Unjoni Ewropea. L-Ewropa kienet biss l-ixprun biex tajna priorita` lil din il-liġi. B’sodisfazzjon ngħid li din il-liġi qablet magħha l-oppożizzjoni wkoll.

Din il-liġi hi importanti ukoll minħabba r-rwol kbir li għandha l-industrija turistika fl-ekonomija Maltija. Bħal ma kont għedt sentejn ilu inċident li għal pajjiż kbir ikun biss gidma ta’ nemusa għal pajjiż żgħir bħal Malta jista’ jkun diżastru li ndumu s-snin biex nirkupraw minnu.

Kulħadd jiftakar id-daqqa ta’ ħarta li ħadet l-industrija taċ-ċanga minħabba l-biżgħa mill-marda ta’ ġenn il-baqar. Kemm għal xhur sħaħ marru ħażin il-bdiewa u l-bejjiegħa tal-laħam. Kienet tbatija u nkwiet għal xejn. Mill-ewwel konna għedna li l-periklu kien minimu u li ħadna l-prekawzjonijiet kollha meħtieġa. Dakinhar ħaddieħor deherlu li għal skopijiet tiegħu kellu għalfejn jallarma. Il-ħsara flok saret lill-gvern saret lill-kredibbilta` tiegħu. Ħasra li minħabba din il-pika batew il-bdiewa, tal-laħam u tar-ristoranti u tnissel ħafna nkwiet bla bżonn għall-konsumatur.

Issa li din il-liġi daħlet fis-seħħ għandna dimensjoni ġdida u moderna f’dak li jirrigwardja l-ħarsien tas-sigurta` f’l-ikel. Għaliex qiegħed ngħid dan? Nafu li bħalma ma jeżistix zero risk fejn tidħol il-preparazzjoni ta’ l-ikel, daqstant ieħor ma jista’ qatt ikun hemm infurzar kontinwu mija fil-mija, f’kull operazzjoni ta’ l-ikel f’Malta. Għalhekk din il-liġi ħasbet biex l-infurzar isir mill-operatur innifsu, dak li wieħed isejjaħlu self control. L-iskop ta’ l-awtoritajiet qed iqarreb kull ma’ jmur lejn awditjar. Nafu li għadna ’l bogħod, imma persważ li bl-għajnuna ta’ kull wieħed minnkom li qegħdin f’dan ix-xogħol, dan it-tip ta’ infurzar ser naslu għalih u b’hekk aħna bħala regolaturi ser inkunu nistgħu nużaw ir-riżorsi tagħna fejn l-aktar hemm bżonn. Napprezza li kull min qed jattendi llum għandu l-għan li jtejjeb l-operazzjoni tiegħu u għalhekk huwa l-pjaċir tiegħi li nindirizza din it-tip ta’ ġemgħa. Iżda daqstant ieħor naf li għad hawn ħafna operaturi li qed jonqsu f’dan id-dmir tagħhom.

Kien għalhekk li aħna dehrilna li kellna nieħdu passi biex intejbu s-sigurta’ ta’ l-ikel anke qabel ma ġie pubblikat l-Att dwar is-Sigurta’ fl-ikel. Hekk insibu li sena ilu dehrilna li kellna nippubblikaw żewġ regolamenti importanti. L-ewwel wieħed dwar ir-reġistrazzjoni ta’ l-istabbilimenti ta’ l-ikel u miegħu regolamenti oħra dwar ir-reġistrazzjoni ta’ min jipprepara l-ikel. Dawn ir-regolamenti daħlu fis-seħħ ferm qabel l-Att ewlieni, imma tant huma ta’ importanza li ridna nħaffu l-proċess għalihom. Bir-raġun għandkom mnejn tistaqsu għaliex dawn ir-regolamenti huma daqstant importanti. Jien persważ li l-kelliema ta’ warajja f’dan is-seminar ser jispjegaw aktar fid-dettal dwar il-kontenut u l-bżonn ta’ dawn il-liġijiet, imma kull operatur, kbir kemm hu kbir għandu jifhem li dan il-Gvern mhux ser joqgħod lura milli jħares lill-konsumatur minn xi riskju ta’ mard mill-ikel.

Waqt li nerġa’ nirreferi għal dawn iż-żewġ regolamenti li semmejt, għandkom tifhmu li fl-ewwel każ ma jista’ qatt ikollna waħda mill-aktar elementi importanti fil-ħarsien ta’ l-ikel, dik ta’ traceability tul il-katina ta’ l-ikel kollha, jekk bħala awtorita’ ma nafux bl-operazzjonijiet li jeżistu f’pajjiżna. Dan jispjega l-bżonn tar-regolamenti dwar ir-reġistrazzjoni ta’ l-istabillimenti tal-ikel. Daqstant ieħor, jekk mhux aktar ta’ importanza, huwa l-bżonn li kull min jimmaniġja l-ikel, fi kwalunkwe mod, għandu jkollu livell għoli biżżejjed ta’ tagħlim dwar l-iġjene ta’ l-ikel. Għalhekk nerġa’ ngħid li dan il-Gvern ħaseb biex hawn ukoll ikun hemm regolamenti biex iħarsu dan. Dan kollu juri l-impenn qawwi ta’ dan il-Gvern f’dan ir-rigward. U hawn nassigurakom li jien bħala Ministru tas-Saħħa u għalhekk responsabbli għall-ħarsien ta’ l-ikel, m’hux ser noqgħod lura milli naċċerta li kull persuna fil-produzzjoni ta’ l-ikel qiegħda toffri ikel li ma jkunx ta’ detriment għas-saħħa tal-konsumatur.

Dawn il-liġijiet li semmejt kienu biss il-bidu għax kelli l-opportunita’, anzi d-dover li dan l-aħħar iffirmajt diversi regolamenti oħra nkluż dawk dwar l-iġjene ta’ l-ikel. Qed insemmi din il-liġi għax għandha tkun il-gwida ġenerali għall-operaturi ta’ l-ikel biex jifhmu aħjar ir-responsabbiltajiet tagħhom. Deherilna iżda li għalkemm nsostnu fejn għandha taqa’ r-responsabbilta’, kienet tkun irresponsabbilta’ min-naħa tagħna kieku ma tajniex l-għodda biex, speċjalment dawk l-operaturi żgħar ikunu jistgħu joħolqu gwidi għall-operazzjoni tagħhom. Jien infurmat li f’dan ir-rigward l-Awtorita’ Maltija għall-Istandards qiegħda ’l quddiem biex tipproduċi dawn il-gwidi. Ta’ dan nirringrazzjahom bħalma nirringrazzja wkoll il-Kummissjoni għas-Sigurta’ ta’ l-Ikel, li jien waqqaft ferm qabel il-pubblikazzjoni ta’ l-Att dwar is-Sigurta’ ta’ l-Ikel għax verament emmint il-bżonn u l-potenzjal ta’ din il-kummissjoni u bix-xogħol imwettaq s’issa jirriżulta li kelli raġun. Din il-kummissjoni għandha l-għan li waqt li ma tinfurzax direttament il-liġijiet ta’ l-ikel, tassigura li l-liġi qiegħda tiġi infurzata. Għalhekk kull awtorita’ fil-ħarsien ta’ l-ikel għandha tkun accountable għall-infurzar tagħha. Din il-Kummissjoni li għandha rappreżentazzjoni mill-awtoritajiet kollha kkonċernati għandha d-dmir ukoll li tassessja r-riskju fl-ikel, kif ukoll tikkomunika kwalunkwe’ riskju. Tant din il-kummissjoni kienet meħtieġa li tibda x-xogħol tagħha kmieni li twaqqfet qabel is-seħħ tal-liġi. Issa qegħdin fil-proċess li npoġġuha fuq bażi permanenti.

Ma kienx b’kumbinazzjoni li d-Dipartiment tas-Saħħa Pubblika, li jaqa’ taħt ir-responsabbilta’ diretta tal-Ministeru tiegħi, ħass li kellu jagħmel ristrutturazzjoni sħiħa fl-ispettorat tiegħu. Oltre minn hekk inbidlet drastikament is-sistema ta’ spezzjonijiet fl-istabbilimenti ta’ l-ikel. L-ispezzjonijiet saru jsiru aktar b’mod xjentifiku, fattur importanti biex l-ispezzjonijiet jinbidlu għal awditjar. Nxtara ukoll diversi apparat biex jgħin lill-ispetturi tas-saħħa fil-ħidma tagħhom. Nemmnu iżda li dan l-infurzar għandu kullma jmur jiżdied u għalhekk qiegħdha tiġi ppjanata għall-futur qrib, sistema komputerizzata aktar effiċjenti u xiri ta’ aktar apparat. Infurmat ukoll li f’dawn l-aħħar ġranet l-amministrazzjoni ta’ l-ispettorat tas-saħħa ppubblikat diversi gwidi għall-ispetturi biex fost l-oħrajn l-ispezzjonijiet isiru b’aktar uniformita’ w effiċjenza. B’hekk tirrealizzaw li l-bidla hija għal kullħadd.

Bi spejjeż kbar qed issir ukoll ristrutturazzjoni fil-laboratorji tas-Saħħa Pubblika. Iżda konvint li din l-ispiża ser tgħin mhux ftit fil-ħarsien tas-sigurta’ ta’ l-ikel, kif ukoll biex dan il-laboratorju jingħata finalment l-akkreditazzjoni, ferm bżonjuża f’dawn iż-żminijiet.

Ma nixtieqx nieħu wisq aktar ħin minn dan is-seminar li persważ ser ikun ta’ għajnuna għal kull minn veru għandu s-sigurta’ ta’ l-ikel għal qalbu. Nagħlaq billi nfakkarkom li kull min jonqos mid-dover tiegħu li joffri l-ogħla livell, mhux biss jkun qed jipperikola s-saħħa tal-konsumatur iżda jkun qed jipperikola wkoll l-industrija ta’ l-ikel. B’hekk għandkom tkunu intom stess li dduru dawra madwarkom u tiżguraw li dawn it-tip ta’ operaturi jiġu identifikati għall-ġid ta’ kulħadd.

Nirringrazzjakhom ta’ din l-istedina u nawguralkom li jkollkom suċċess f’dan is-seminar.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME  Malta Miegħek: Funding increased for music education in band clubs and voluntary organisations working with youths

PR261930en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI  Malta Miegħek: Jiżdiedu l-għotjiet għat-tagħlim tal-mużika fil-każini tal-banda u għall-għaqdiet volontarji li jaħdmu fost iż-żgħażagħ

PR261930

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI T...

Aktar Stqarrijiet Right arrow