Left arrow Go Back

L-EWWEL STUDENTI TA' L-MCAST JIGGRADWAW

PR1609
Date Icon 15/11/2002

L-MCAST qed jieħu l-miżuri meħtieġa biex f'Settembru 2003 jiftaħ numru ta' Istituti oħra għal edukazzjoni u taħriġ vokazzjonali fl-oqsma ta' l-inġinerija elettrika, l-inġinerija mekkanika, l-agri-kummerċ, u ta' servizzi komunitarji. Pjan ta' Żvilupp Strateġiku mifrux fuq numru ta' snin bħalissa qed jiġi diskuss mill-Bord tal-Gvernaturi bl-iskop li l-MCAST jilħaq il-miri li poġġa quddiemu il-Gvern li jsir strument ewlieni għall-iżvilupp tar-riżorsa umana li qed tiġi bżonn l-ekonomija Maltija. Dan ħabbru l-Ministru ta' l-Edukazzjoni, Dr Louis Galea, meta il-bieraħ indirizza studenti, għalliema u ġenituri waqt l-ewwel sessjoni ta' l-ewwel Gradwazzjoni li qed jorganizza l-MCAST. Fiċ-ċerimonja ta' Gradwazzjoni tkellmu wkoll Victor Scicluna, President tal-Bord tal-Gvernaturi, u Roy Snelling, il-Prinċipal tal-Kulleġġ. Student ta' l-Istitut ta' l-Arti u d-Disinn, Damian Buġeja, għamel id-diskors f'isem l-istudenti tal-Kulleġġ.

Tul il-jumejn ta’ Gradwazzjoni ser jieħdu ċertifikati u diplomi 333 ġuvintur u tfajliet. 85 minnhom ħadu diplomi tekniċi fl-Elettronika Industrijali, fid-Disinn Industrijali u fil-Computing. 180 ħadu ċertifikati tekniċi wara korsijiet ta' sentejn u oħrajn ta' erba’ snin fl-oqsma ta' l-elettronika, l-inġinerija tal-bini u l-kostruzzjoni, business u kummerċ, u arti u disinn. 68 student ħadu ċertifikati wara li għamlu Foundation Courses. 125 studenti ser ikomplu l-istudji tagħhom fl-MCAST.Numru minn dawn l-istudenti kienu bdew il-korsijiet taghhom fl-iskejjel taħt id-Divizjoni ta' l-Edukazzjoni.

Il-Ministru Louis Galea fisser l-impenn tal-Gvern li, minbarra l-Universita`, jagħti liż-żgħażagħ u lill-adulti nisa u rġiel istituzzjoni oħra ta' edukazzjoni u taħriġ vokazzjonali ta' l-ogħla livell b'ċertifikati, diplomi u degrees li għad iridu jiġu rikonoxxuti sew mill-Universita` ta' Malta kif ukoll barra minn Malta. Fl-ewwel sena li l-MCAST ilu jopera diġa' beda jistabilixxi ruħu bħala Kulleġġ li ż-żgħażagħ isibu fih opportunitajiet għall-futur tagħhom. Il-Gvern flimkien mal-Bord tal-Gvernaturi qed jaħdem biex f'Settembru li ġej il-Kulleġġ iħaddan fih numru ta' Istituti ġodda fl-oqsma ta' l-inġinerija elettrika u mekkanika, l-agri-kummerċ u ta' servizzi komunitarji.

"Fix-xhur li ġejjin inkunu qed naħdmu l-ewwel biex inkomplu niżviluppaw is-sitt Istituti li diġa` ġew inkorporati fil-Kulleġġ. L-Istitut tat-Teknoloġija tal-Informatika u l-Kommunikazzjoni, dak ta' l-Inġinerija Elettronika u dak ta' Arti u Disinn qed jimmiraw li jibdew korsijiet ġodda għall-Livell 4 tal-Higher National Diploma. It-tieni ser naraw li jkun hemm aktar edukazzjoni u taħriġ inter-dixxiplinari bejn l-Istituti kollha billi tkompli tinfirex is-sistema modulari. It-tielet, ix-xogħol li kien isir s'issa mill-iskejjel tad-Diviżjoni ta' l-Edukazzjoni (l-Istitut Mikelanġ Sapiano, l-iskola Carmen Carbonaro, l-iskola Mother Theresa, il-Pre-School Education Course, u l-Kulleġġ ta' l-Agrikoltura Guże` Micallef ) mis-sena d-dieħla jibda jsir mill-MCAST. Wara li din is-sena ftaħna f'Għawdex il-Gozo MCAST Centre, ser naħdmu biex insaħħuh ħalli ż-żgħażagħ Għawdxin ukoll ikollhom opportunitajiet ta' edukazzjoni u taħriġ u b'hekk nassiguraw li l-ekonomija Għawdxija ikollha n-nies imħarrġa għall-opportunitajiet ta' xogħol li jinħolqu mhux biss f'Malta iżda wkoll f'Għawdex," fisser Louis Galea.

Il-Ministru Louis Galea qal li fl-ewwel sena li l-MCAST ilu jopera diġa' beda jistabilixxi ruhu bħala Kulleġġ li ż-żgħażagħ isibu fih opportunitajiet għall-futur tagħhom. Fil-fatt din is-sena applikaw 1,753 student, iżda 334 student li bagħtu għalihom spiċċaw biex ma marrux għaliex jew daħlu l-Universita` jew għazlu linja oħra ta' studju jew xogħol. Mill-1426 student li zammew l-applikazzjoni tagħhom il-Kulleġġ din is-sena seta` jdaħħal 1100. Ħdax-il kors li qed isiru huma korsijiet ġodda li nħolqu kemm ilu li fetaħ l-MCAST. Il-Gvern qed jaħseb biex għas-sena d-dieħla isaħħaħ l-investiment biex jitjiebu l-faċilitajiet u l-workshops, jiżdied ammont ieħor ta' spazju, u jinħolqu s-servizzi għall-istudenti li hemm bżonn.

Louis Galea sostna li l-MCAST jeħtieġ ikun kulleġġ speċjali, miftuħ minn filgħodu sa filgħaxija, b'korsijiet full-time u oħrajn part-time, flessibbli skond il-bżonnijiet taż-żgħażagħ, tan-nisa u l-irġiel, sew jekk qed jaħdmu u sew jekk qiegħdin id-dar. Il-Gvern irid li il-Kulleġġ ikollu viżjoni wiesgħa ta' x'inhi l-edukazzjoni u t-taħriġ vokazzjonali biex ikun tassew rilevanti għad-dinja tal-lum. Il-Ministru Galea saħaq li s-suċċess tal-Kulleġġ irid jitkejjel minn kemm jirnexxielu jipperswadi l-employers jiġru wara in-nies li jkunu għaddew mill-korsjiet ta' l-MCAST. Huwa għalhekk li minbarra standards b'saħħithom fl-oqsma speċifici tat-taħriġ, il-Kulleġġ irid ikun b'saħħtu ħafna biex jassigura li kull student ikollu bażi tajba ta' litteriżmu, ta' I.T., ta' hila komunikattiva, ta' inizjattiva, jaf isolvi l-problemi, jaħdem f'team u b'attitudni favur l-intrapriża.

"Aħna rridu li l-Kulleġġ jinvesti fiż-żgħażagħ u fil-ħaddiema tagħna biex jagħtihom żvilupp uman sħiħ, konxji tal-kwestjonijiet soċjali, ambjentali u politiċi, kapaċi jkunu ċittadini attivi u responsabbli. Dan hu l-aqwa inċentiv li nistgħu nagħtu biex nattiraw l-aqwa investiment għal aktar xogħol u prosperita'," temm jgħid Louis Galea.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME  Malta Miegħek: Funding increased for music education in band clubs and voluntary organisations working with youths

PR261930en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION O...

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI  Malta Miegħek: Jiżdiedu l-għotjiet għat-tagħlim tal-mużika fil-każini tal-banda u għall-għaqdiet volontarji li jaħdmu fost iż-żgħażagħ

PR261930

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI T...

More Press Releases Right arrow