STQARRIJA MILL-MINISTERU GĦALL-MOBBILTÀ SOSTENIBBLI Malta Miegħek: Titnieda l-Istrateġija Nazzjonali għaċ-Ċikliżmu 2026–2036

Il-Ministeru għall-Mobbiltà Sostenibbli nieda l-Istrateġija Nazzjonali għaċ-Ċikliżmu 2026–2036, bil-għan li r-rota ssir għażla aktar sigura, prattika u aċċessibbli għall-ivvjaġġar ta’ kuljum f’Malta u Għawdex. L-istrateġija tifforma parti mill-viżjoni usa’ ta’ Malta in Motion sabiex il-pubbliku jkollu aktar għażliet ta’ trasport.

L-istrateġija hija mibnija fuq ħames pilastri ewlenin li jindirizzaw l-iżvilupp ta’ infrastruttura konnessa għar-roti, it-titjib tal-faċilitajiet għaċ-ċiklisti, is-sigurtà u l-infurzar fit-toroq, l-edukazzjoni u l-għarfien, kif ukoll miżuri li jħeġġu aktar nies jużaw ir-rota. Fil-qalba tagħha hemm il-ħolqien ta’ Network Nazzjonali ta’ Rotot għar-Roti, li għandu jgħaqqad aħjar iż-żoni residenzjali, l-iskejjel, il-postijiet tax-xogħol u l-punti tat-trasport pubbliku.

Il-Ministru għall-Mobbiltà Sostenibbli Chris Bonett sostna li l-għan tal-Gvern mhuwiex li jimponi mezz wieħed ta’ trasport, iżda li joħloq il-kundizzjonijiet biex in-nies ikollhom aktar alternattivi. “Il-futur tat-trasport f’pajjiżna ma jistax jitkejjel biss minn kemm nibnu toroq jew minn kemm karozzi jkunu jistgħu jgħaddu minnhom. Irridu nkejluh ukoll minn kemm in-nies ikollhom għażliet reali biex jaslu fejn għandhom bżonn,” qal il-Ministru Bonett.

Il-Ministru Bonett għamel referenza wkoll għall-viżjoni tal-Gvern kif riflessa fil-Budget 2027 li tpoġġi l-ħtiġijiet tan-nies u l-kwalità tal-ħajja fiċ-ċentru tal-ħidma tiegħu. Huwa sostna li l-Istrateġija Nazzjonali għaċ-Ċikliżmu hija pass ieħor f’din id-direzzjoni, hekk kif il-Gvern qed ikompli jaħdem biex joħloq aktar għażliet ta’ trasport li jkunu siguri, prattiċi u sostenibbli.

Permezz ta’ din l-istrateġija, il-Gvern qed jistabbilixxi pjan fit-tul li jmur lil hinn mill-ħolqien ta’ korsiji ġodda għar-roti, billi jindirizza wkoll il-ħtieġa ta’ konnessjonijiet aħjar, aktar sigurtà u faċilitajiet adegwati. Dan sabiex aktar nies ikunu jistgħu jikkunsidraw ir-rota bħala mezz ta’ trasport għall-vjaġġi tagħhom ta’ kuljum.

Min-naħa tagħha, Stephanie Bonello, Kap tal-Pjan Malta in Motion, enfasizzat l-importanza li jinħolqu l-kundizzjonijiet meħtieġa biex aktar nies ikunu jistgħu jagħżlu r-rota.

“Jekk irridu li aktar nies jużaw ir-rota, irridu l-ewwel noħolqu l-kundizzjonijiet biex jagħmlu dan b’mod sigur. Din hija r-raġuni wara l-Istrateġija Nazzjonali għaċ-Ċikliżmu. Irridu nibnu network ta’ rotot konnessi, intejbu l-faċilitajiet, insaħħu s-sigurtà u norbtu aħjar iċ-ċikliżmu mat-trasport pubbliku. Iżda importanti daqs l-infrastruttura huwa r-rispett reċiproku bejn dawk kollha li jużaw it-toroq tagħna. Il-mira tagħna mhijiex sempliċiment li jkollna aktar korsiji għar-roti, iżda li nagħmlu ċ-ċikliżmu għażla reali u sigura għall-vjaġġi ta’ kuljum,” qalet Dr Bonello.

Fost il-miżuri previsti fl-istrateġija hemm faċilitajiet aħjar għall-parkeġġ tar-roti, konnessjonijiet mat-terminals tat-trasport pubbliku, programmi ta’ taħriġ għat-tfal u għall-adulti, kif ukoll proġett pilota biex studenti jkunu jistgħu jmorru l-iskola flimkien bir-rota. L-istrateġija tipprevedi wkoll l-iżvilupp ta’ linji gwida għall-infrastruttura taċ-ċikliżmu adattati għall-kundizzjonijiet tat-toroq Maltin.

L-implimentazzjoni tal-istrateġija se titmexxa minn Malta in Motion u Transport Malta, b’kollaborazzjoni mal-entitajiet governattivi, il-kunsilli lokali u l-partijiet interessati, sabiex iċ-ċikliżmu jsir parti aktar integrata mis-sistema tat-trasport f’pajjiżna.