STQARRIJA MILL-MINISTERU GĦALL-AFFARIJIET BARRANIN U EWROPEJ U MILL-MINISTERU GĦALL-ĠUSTIZZJA, IR-RIĊERKA U L-INNOVAZZJONI Żjara ta’ studju f’The Hague ssaħħaħ il-kooperazzjoni internazzjonali tal-ġudikatura Maltija

Sittax-il membru tal-ġudikatura Maltija, bejn Imħallfin u Maġistrati, ħadu sehem fi żjara ta' studju ta' ġimgħa f'The Hague, l-Olanda, li matulha kellhom l-opportunità jiltaqgħu ma' rappreżentanti ta' qrati, istituzzjonijiet ġudizzjarji u entitajiet speċjalizzati ewlenin fil-qasam tal-ġustizzja internazzjonali.

Iż-żjara kienet organizzata mill-Ambaxxata ta' Malta fl-Olanda flimkien mal-Kumitat għall-Istudji Ġudizzjarji, bl-appoġġ tal-Ministeru għall-Affarijiet Barranin u Ewropej u l-Ministeru għall-Ġustizzja, ir-Riċerka u l-Innovazzjoni. Id-delegazzjoni kienet tirrappreżenta madwar kwart tal-ġudikatura Maltija.

Matul il-programm, id-delegazzjoni żaret fost oħrajn il-Qorti Internazzjonali tal-Ġustizzja, il-Qorti Kriminali Internazzjonali, il-Qorti Permanenti tal-Arbitraġġ, il-Eurojust u l-Europol. Saru wkoll żjarat fil-Kunsill għall-Ġudikatura tal-Olanda, fin-Netherlands Forensic Institute, fil-Kosovo Specialist Chambers, fil-Hague Conference on Private International Law, fl-Organizzazzjoni għall-Projbizzjoni tal-Armi Kimiċi u fil-Kummissjoni Internazzjonali dwar Persuni Nieqsa.

Il-programm inkluda laqgħat ma' uffiċjali għolja u esperti minn dawn l-istituzzjonijiet, fosthom il-President tal-Qorti Kriminali Internazzjonali, l-Imħallef Tomoko Akane, u l-Viċi President tal-Qorti Internazzjonali tal-Ġustizzja, l-Imħallef Julia Sebutinde. Dawn il-laqgħat ippermettew skambju ta' esperjenzi u prattiċi bejn il-membri tal-ġudikatura Maltija u l-kontropartijiet tagħhom.

Parti importanti miż-żjara kienet iddedikata għall-isfidi li qed jiffaċċjaw il-qrati f'ambjent ġudizzjarju dejjem aktar kumpless, fosthom każijiet li jinvolvu aktar minn pajjiż wieħed, il-kooperazzjoni ġudizzjarja, il-kriminalità organizzata u diġitali, il-liġi internazzjonali privata u l-użu tal-evidenza forensika fi proċeduri ġudizzjarji.

Fin-Netherlands Forensic Institute, id-delegazzjoni setgħet tara mill-qrib ix-xogħol xjentifiku u l-proċessi li jintużaw fl-eżamijiet forensiċi. Fil-Kummissjoni Internazzjonali dwar Persuni Nieqsa, il-parteċipanti ġew infurmati dwar l-użu tal-analiżi tad-DNA, sistemi tad-data u metodi forensiċi fl-identifikazzjoni ta' persuni nieqsa u fl-appoġġ għal proċessi ta' ġustizzja u kontabbiltà.

Iż-żjara ħolqot ukoll opportunitajiet għal aktar kuntatti professjonali bejn il-ġudikatura Maltija u l-kontropartijiet tagħha, filwaqt li kompliet issaħħaħ il-kooperazzjoni bejn Malta u l-Olanda fil-qasam tal-ġustizzja.

Din l-inizjattiva tifforma parti mill-ħidma kontinwa favur it-taħriġ u l-iżvilupp professjonali tal-membri tal-ġudikatura Maltija, filwaqt li tkompli tissaħħaħ il-kooperazzjoni ma' qrati, istituzzjonijiet ġudizzjarji u organizzazzjonijiet internazzjonali li jaħdmu fil-qasam tal-ġustizzja u s-saltna tad-dritt.