STQARRIJA MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZZJONI TAL-KONSUMATUR L-MCCAA tniedi servizz ġdid ImportaMT: Għodda konkreta ta’ verifika qabel l-importazzjoni favur in-negozji u l-ħarsien tal-konsumatur

Il-Ministru għall-Fondi Ewropej, id-Djalogu Soċjali u l-Protezzjoni tal-Konsumatur Keith Azzopardi Tanti, flimkien maċ-Chairperson tal-Awtorità ta’ Malta għall-Kompetizzjoni u għall-Affarijiet tal-Konsumatur (MCCAA) Carmen Ciantar, nieda fil-Port Ħieles f’Birżebbuġa s-servizz ġdid ImportaMT. Din l-inizjattiva, li hija wegħda tal-manifest u li twettqet fl-ewwel mitt jum tal-Gvern, tagħti lill-importaturi l-possibbiltà li jivverifikaw minn qabel id-dokumentazzjoni ta’ konformità ta’ prodott, ferm qabel ma l-merkanzija tintbagħat lejn Malta.

ImportaMT huwa maħsub biex jappoġġja b’mod attiv lis-settur kummerċjali billi jgħin lill-importaturi jidentifikaw nuqqasijiet fid-dokumentazzjoni qabel il-konsenja. B’dan il-mod, jitnaqqas b’mod drastiku r-riskju li jinqalgħu problemi jew dewmien meta l-merkanzija tkun diġà waslet fil-fruntiera, jew agħar minn hekk, wara li l-prodott ikun diġà daħal fis-suq. Permezz ta’ dan is-servizz diġitali, l-importatur jissottometti talba waħda għal kull prodott b’miżata ta’ €50, fejn l-MCCAA tirrevedi d-dokumentazzjoni skont matriċi ta’ konformità li tkopri l-leġiżlazzjoni ta’ armonizzazzjoni tal-Unjoni Ewropea dwar is-sikurezza tal-prodotti. Fi żmien massimu ta’ ħamest ijiem tax-xogħol mill-ħlas - jew għaxart ijiem meta tkun meħtieġa kjarifika - l-applikant jirċievi deċiżjoni uffiċjali ta’ 'VERIFIKAT' jew 'MHUX VERIFIKAT'.

Fl-indirizz tiegħu, il-Ministru Keith Azzopardi Tanti saħaq fuq l-importanza ta’ soluzzjonijiet prattiċi għall-intrapriżi u stqarr li, “ImportaMT huwa eżempju ta’ kif impenn jista’ jinbidel f’servizz konkret li jagħmel differenza għan-negozji u għall-konsumaturi. Billi nagħtu lill-importaturi l-possibbiltà li jidentifikaw kwistjonijiet qabel ma jibagħtu l-merkanzija, inkunu qed innaqqsu r-riskju ta’ dewmien u spejjeż bla bżonn, filwaqt li nsaħħu l-konformità u nagħmlu użu aktar effiċjenti mir-riżorsi regolatorji tagħna. Għodda bħal din hija importanti ħafna u għalhekk għamilna fiċ-ċert li tiġi varata fl-ewwel mitt jum ta’ din il-leġiżlatura.”

Min-naħa tagħha, iċ-Chairperson tal-MCCAA, Carmen Ciantar, esprimiet is-sodisfazzjon tagħha għat-twettiq ta’ din l-inizjattiva u stqarret li, “Bnejna ImportaMT biex ikun servizz ċar, prattiku u trasparenti. Irridu nagħtu lin-negozji għodda li tgħinhom jagħmlu l-affarijiet sew mill-bidu nett, filwaqt li nibqgħu ċari dwar il-portata tas-servizz.” Is-Sinjura Ciantar żiedet ukoll li dan is-servizz joffri approċċ modern li jsaħħaħ il-protezzjoni tal-konsumatur permezz ta’ regolamentazzjoni preventiva u effiċjenti. 

Din l-inizjattiva intlaqgħet tajjeb ukoll mill-President tal-Malta Chamber of SMEs, Paul Abela u faħħar il-fatt li permezz tagħha ser jitnaqqas il-ħin tad-dewmien biex jinħareġ il-prodott mill-Freeport ta’ Malta u awgura lill-MCCAA għall-ħidma tagħhom biex din l-inizjattiva tidħol fis-seħħ.

Min-naħa ta’ The Malta Chamber, Alistair Grima spjega, “ImportaMT huwa pass tajjeb ħafna ta’ kif nistgħu ngħinu lill-kumpaniji tagħna joperaw bl-aħjar mod, u li l-kumpaniji tagħna għandhom dejjem jingħataw l-għajnuna neċessarja biex itejbu l-livelli tagħhom.”

Dwar il-funzjonament tas-sistema, ġie spjegat li meta d-dokumentazzjoni tiġi vverifikata, id-deċiżjoni tiġi ppubblikata f’indirizz uniku fuq l-internet u tinħareġ irċevuta uffiċjali b’kodiċi QR li tkun tista’ tiġi vverifikata mid-Dwana. Ir-rikonoxximent ta’ dawn l-irċevuti mid-Dwana qed jitmexxa ’l quddiem b’mod konġunt sabiex prodotti akkumpanjati minn irċevuta valida ma jkollhomx għalfejn jiġu riferuti lura għand l-Awtorità għall-istess verifika dokumentarja, filwaqt li prodotti magħżula mid-Dwana permezz tal-valutazzjoni tar-riskju tagħha jibqgħu jiġu riveduti mill-MCCAA mingħajr ħlas addizzjonali. Fejn japplika aktar minn att leġiżlattiv wieħed tal-UE għall-istess prodott, is-servizz japplika checklist konsolidata biex il-proċess jibqa’ ssimplifikat. L-MCCAA tenfasizza li ImportaMT huwa servizz ta’ verifika dokumentarja; deċiżjoni pożittiva tikkonferma l-korrettezza tad-dokumenti sottomessi, iżda ma tikkostitwixxix ċertifikazzjoni sħiħa tal-prodott, ma teżentax il-merkanzija mis-sorveljanza tas-suq u ma tirrappreżentax garanzija awtomatika ta’ rilaxx mid-Dwana.

Il-Ministru Azzopardi Tanti temm jgħid li l-impenn tal-Gvern favur il-faċilitazzjoni tal-kummerċ u s-suċċess tal-operaturi ekonomiċi jibqa’ prijorità ċentrali. Filwaqt li rringrazzja lill-ħaddiema u l-entitajiet kollha involuti fit-twettiq ta’ din il-miżura, huwa ħeġġeġ lill-komunità tal-kummerċ biex tagħmel użu minn din il-faċilità. L-importaturi, l-aġenti doganali u l-freight forwarders jistgħu jiksbu aktar informazzjoni dwar ImportaMT, kif ukoll jissottomettu t-talbiet tagħhom, billi jżuru www.importa.mt.