STQARRIJA MILL-UFFIĊĊJU TAL-PRIM MINISTRU Il-Prim Ministru Robert Abela jinawgura investiment turistiku ta’ €10 miljun f’Buġibba

Il-Prim Ministru Robert Abela u l-Ministru għat-Turiżmu Jo Etienne Abela uffiċjalment inawguraw il-lukanda Innside by Meliá ta’ 4 stilel, f’Buġibba. Dan huwa investiment ta’ aktar minn €10 miljun u li jsegwi dak privat u anke pubbliku li sar fil-lokalità fl-aħħar snin. Il-lukanda għandha 86 kamra u tħaddem mal-50 impjegat.

Waqt din iż-żjara Dr Abela emfasizza l-importanza tal-kwalità fit-turiżmu li jġib investiment. Innota li dan l-investiment huwa mmexxi u sar kollu minn familja Maltija. Innota wkoll li dan l-investiment flimkien ma’ oħrajn fl-aħħar snin juri kemm min jinvesti verament jemmen fi prodott turistiku li joffri l-kumdità, il-kwalità u l-eċċellenza. Il-Prim Ministru qal li dan huwa wkoll sinjal ta’ fiduċja tal-investituri lokali u internazzjonali fil-lokalità ta’ San Pawl il-Baħar innifisha. 

Dr Abela qal li l-Gvern innifsu investa f’Buġibba bi proġett li ttrasforma l-Pjazza ta’ Buġibba, it-toroq tal-madwar u anke l-promenade ta’ maġenb il-pjazza. “Għax nemmnu fil-kwalità implimentajna proġett li ta dehra kompletament ġdida lill-qalba ta’ Buġibba, investiment li din il-lokalità turistika kienet ilha snin ma tara bħalu.”

Milqugħ mill-familja Agius, is-sidien ta’ din il-lukanda, Dr Abela kompla jgħid li r-riġenerazzjoni taż-żona hija ta’ benefiċċju għar-residenti u t-turisti li jżuru Buġibba u jqattgħu ħin jew ġranet ta’ mistrieħ, filwaqt li tibgħat messaġġ ċar favur aktar titjib u aktar turiżmu ta’ kwalità ogħla. “Fl-aħħar snin rajna investituri lokali, bħall-familja Agius u anke internazzjonali jiftħu lukandi, jirriġenerawhom jew inkella jiftħu stabbilimenti ta’ ċerta portata u kwalità f’din il-lokalità”, qal il-Prim Ministru.

Dr Abela qal li minkejja li l-Gvern ikompli jisħaq fuq il-kwalità, daqstant ieħor huma pożittivi l-wasliet tat-turisti din is-sena, bi kważi 1.7 miljun turist jaslu Malta bejn Jannar u Mejju. Dan filwaqt li ċifri ppubblikati mill-Uffiċċju Nazzjonali tal-Istatistika juru li fl-ewwel ħames xhur tas-sena t-turisti ħallew kważi €1.4 biljun fl-ekonomija ta’ Malta.

“Il-Gvern se jkompli jħeġġeġ investiment bħal dan, li jkun ta’ kwalità u ta’ livell li anke jaħdem fuq infrastruttura aħjar, inkluża dik tat-trasport. Fil-fatt f’Mejju l-Gvern beda joffri servizz ta’ fast ferry bejn Tas-Sliema, Buġibba u Għawdex sabiex itejjeb il-mobilità, anke tat-turisti waqt li jkunu f’Malta”, irrimarka l-Prim Ministru.

Dr Abela aċċenna għall-infurzar li sar fl-aħħar ġimgħat u l-leġiżlazzjoni li introduċiet l-on the spot fines kontra mġiba mhux xierqa fil-pubbliku. Fakkar li issa l-Gvern ħa pass ieħor, biċ-ċans saħansitra ta’ tkeċċija mill-pajjiż għal dawk it-turisti li jingħataw multa ta’ aktar minn €200. Dan, kompla jgħid, huwa xhieda ċara ta’ kemm il-Gvern qed jieħu b’serjetà kbira l-ordni pubblika fit-toroq, speċjalment f’lokalitajiet b’konċentrazzjoni għolja ta’ turisti. 

Il-Prim Ministru temm jirringrazzja lill-familja Agius tal-fiduċja li qed juru fl-ekonomija ta’ pajjiżna u talli huma wkoll qed ikunu parti mill-mixja ta’ pajjiżna għal turisti ta’ kwalità aħjar. Huwa wiegħed aktar appoġġ lill-familji u persuni li meta jinvestu, ipoġġu il-kwalità fil-qofol tal-operat tagħhom.