STQARRIJA MILL-MINISTERU GĦALL-EKONOMIJA, IT-TEKNOLOĠIJA U L-PROĠETTI STRATEĠIĊI

L-Oppożizzjoni għal darb'oħra qabdet ċifra waħda u tatha interpretazzjoni skorretta, filwaqt li injorat l-istampa sħiħa tal-istħarriġ. Għal darb'oħra qed tagħżel li tikkritika kollox, mingħajr ma tippreżenta alternattivi jew soluzzjonijiet kredibbli.

Il-fatti huma ċari: dawk li qalu li mhux żmien tajjeb biex jinvestu naqsu minn 32% għal 22%, filwaqt li żdied in-numru ta' dawk li jqisu li issa huwa żmien tajjeb għall-investiment. Dan jikkonferma titjib ċar fis-sentiment tan-negozji lejn l-ekonomija Maltija, skont l-istess stħarriġ li fuqu qed tirreferi l-Oppożizzjoni.

Il-Gvern jirrikonoxxi li dejjem hemm lok għal titjib u għalhekk qed ikompli jaħdem biex itejjeb il-kwalità tal-ħajja, isaħħaħ il-kompetittività tan-negozji u jmexxi l-ekonomija lejn produttività ogħla u aktar valur miżjud, kif stabbilit fil-Viżjoni Malta 2050.

Dan qed isir permezz ta' miżuri konkreti, fosthom l-iskema MicroInvest, li tappoġġja wkoll żidiet fil-pagi; investiment ta' €100 miljun fis-sena fl-awtomazzjoni, id-diġitalizzazzjoni, l-intelliġenza artifiċjali u t-taħriġ; kif ukoll l-iskemi ta' Malta Enterprise, li jgħinu lin-negozji jinvestu fit-teknoloġija, iżidu l-produttività u jnaqqsu d-dipendenza fuq xogħol ta' valur baxx. Fl-istess waqt, BusinessFirst qed tkompli tipprovdi gwida u assistenza lin-negozji żgħar u medji.

Ir-riżultati ta' dawn il-miżuri qed jidhru fit-tip ta' investiment li Malta qed tattira f'setturi ta' valur miżjud, fosthom il-medtech, is-semikondutturi, il-microchips, l-esports u l-industriji diġitali. Malta se tkompli tgawdi minn ekonomija b'saħħitha u reżiljenti, b'aktar impjiegi ta' kwalità u tkabbir ekonomiku sostenibbli, kif rikonoxxut ukoll minn istituzzjonijiet internazzjonali bħall-IMF u l-Bank Ċentrali Ewropew.

Il-Gvern jappella lill-Oppożizzjoni biex, flok tikkritika sempliċement biex tikkritika, taħdem id f'id magħna fl-interess tal-familji Maltin u Għawdxin. Fi żmien ta' sfidi ekonomiċi globali, pajjiżna jeħtieġ serjetà, responsabbiltà u sens ta' għaqda nazzjonali.