STQARRIJIA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR Madliena Woodlands jingħata l-istatus ta’ Żona għall-Protezzjoni tas-Siġar

Dawn iż-żoni jipprovdu protezzjoni essenzjali minn attivitajiet li jistgħu jolqtu ħażin lil speċi differenti ta' siġar

Iż-żona madwar il-Forti storiku tal-Madliena, fejn matul is-snin tħawlu wkoll mal-1,000 siġra oħra, se jiġi kklassifikat bħala Żona għall-Protezzjoni tas-Siġar, magħrufa bħala Tree Protection Area (TPA). Dan l-istatus jagħti protezzjoni lis-sit minn attivitajiet li jistgħu jħallu impatt negattiv fuq iż-żona.

Iż-żona hija mmexxija mill-Kunsill Lokali tas-Swieqi, wara li l-Ministeru għall-Enerġija, l-Ambjent u r-Riġenerazzjoni tal-Port il-Kbir ipprovda fondi għall-afforestazzjoni permezz tal-Fond għall-Ambjent amministrat mill-ERA.

Permezz tal-klassifikazzjoni mill-ERA, il-Masġar tal-Madliena issa jingħaqad ma' lista ta' 60 Żona għall-Protezzjoni tas-Siġar f'Malta, Għawdex u Kemmuna, li flimkien jiffurmaw parti mill-inventarju nazzjonali ta' siġar u msaġar ta' importanza.

Fil-Gżejjer Maltin hawn madwar 60 speċi indiġena ta' siġar, li 66% minnhom huma rari jew fil-periklu. Iż-Żoni għall-Protezzjoni tas-Siġar jipprovdu protezzjoni essenzjali minn attivitajiet li jistgħu jolqtu ħażin lil dawn l-ispeċi.

“Hawnhekk għandna medda kbira ta' art li se tkun protetta bis-saħħa tal-leġiżlazzjoni li permezz tagħha din iż-żona se tingħata l-istatus ta' Tree Protection Area. Dan ifisser li s-siġar f'din iż-żona se jgawdu minn livell ogħla ta' protezzjoni, filwaqt li l-art kollha kemm hi se tkompli tiġi ndukrata bil-għan li maż-żmien tiżviluppa f'propju masġar."

“Matul is-snin sar ħafna tħawwil ta' siġar, ħidma li bħala pajjiż irridu nkomplu nsaħħu. L-għan tagħna huwa li din iż-żona tiżviluppa f'masġar li jitħares u jitgawda mhux biss mill-ġenerazzjonijiet tal-lum, iżda wkoll minn dawk futuri, għall-ġid tal-lokalità tas-Swieqi u tal-pajjiż kollu," qalet il-Ministru għall-Enerġija, l-Ambjent u r-Riġenerazzjoni tal-Port il-Kbir Miriam Dalli waqt it-tħabbira.

“Bil-protezzjoni ta' dan is-sit, qegħdin inkomplu nżidu l-proporzjon ta' żoni protetti f'Malta u nersqu aktar lejn il-miri nazzjonali u Ewropej, inklużi l-impenji meħuda permezz tal-Istrateġija u l-Pjan ta' Azzjoni Nazzjonali għall-Bijodiversità ta' Malta," qalet Marie Therese Gambin, il-Manager tal-ERA responsabbli mill-Bijodiversità u r-Riżorsi Naturali.

“Is-siġar huma element importanti tal-bijodiversità urbana u rurali. Il-funzjonijiet essenzjali tagħhom għas-sostenn tal-ħajja ħafna drabi jitqiesu bħala xi ħaġa ovvja. Dawn jinkludu r-regolazzjoni naturali tal-klima, l-istabbilizzazzjoni tal-ħamrija, il-kontroll tal-ilma tax-xita, il-ħolqien ta' kenn sigur għall-għasafar u l-insetti, u naturalment id-dell għan-nies. Iż-Żoni għall-Protezzjoni tas-Siġar jgħinuna nipproteġu żoni importanti għal diversi speċi ta' siġar minn attivitajiet li jistgħu jagħmlulhom il-ħsara," żiedet Gambin.

Minħabba l-pożizzjoni elevata tiegħu fuq għolja u l-qrubija mal-Forti tal-Madliena, il-masġar jispikka bħala punt distintiv u viżibbli sew fil-pajsaġġ tal-madwar. Din l-art tinsab barra ż-żona tal-iżvilupp u hija proprjetà tal-Gvern.

Il-masġar huwa magħmul prinċipalment minn siġar maturi tal-prinjol, li oriġinarjament tħawlu fis-snin sebgħin. Fl-2019, Ambjent Malta u l-Kunsill Lokali tas-Swieqi ħawlu madwar 1,000 siġra ta' speċi differenti. Speċi invażivi u aljeni ta' siġar ġew ukoll sostitwiti b'siġar u arbuxelli indiġeni.

Permezz tas-sejħa BELLUS taħt il-Fond għall-Ambjent, amministrat mill-ERA, l-Awtorità allokat ukoll aktar minn €60,000 għar-riġenerazzjoni tal-ġibjun fil-Forti tal-Madliena. Il-ġibjun se jintuża għall-konservazzjoni tal-ilma, għat-tisqija tal-veġetazzjoni tal-madwar u bħala riżorsa f'każ ta' nirien.

Il-Fond għall-Ambjent qiegħed jipprovdi appoġġ finanzjarju għal diversi proġetti li jħaddmu soluzzjonijiet ibbażati fuq in-natura f'żoni urbani, periurbani u rurali. L-għan huwa li jinħolqu aktar spazji ambjentali f'żoni pubbliċi u tittejjeb il-bijodiversità lokali, fost l-oħrajn permezz ta' inizjattivi ta' afforestazzjoni.