STQARRIJA MILL-MINISTERU GĦALL-INKLUŻJONI U L-VOLONTARJAT, MILL-MINISTERU GĦALL-EDUKAZZJONI U L-ISPORT U MINN SPECIAL OLYMPICS MALTA

Malta ser tospita l-ewwel Special Olympics European Swimming Open f’Settembru 2026

Special Olympics Malta nediet uffiċjalment l-Ispecial Olympics European Swimming Open Malta 2026, l-ewwel avveniment tal-għawm ta’ Special Olympics organizzat fuq livell internazzjonali. Il-logħob se jsir bejn l-10 u l-14 ta’ Settembru 2026 fil-Pixxina Nazzjonali f’Tal-Qroqq, bis-sehem ta’ aktar minn 400 atleta minn 40 pajjiż.

Waqt it-tnedija tħabbar ukoll programm ta’ inizjattivi paralleli, fosthom villaġġ sportiv b’kompetizzjoni tal-Boċċe għal aktar minn 200 atleta, programm ta’ screening Healthy Athletes mifrux fuq sitt dixxiplini, u festival tal-Motor Activity Training Program (MATP), b’kollaborazzjoni ma’ Aġenzija Sapport, għal madwar 500 atleta.

Dr Lydia Abela, President ta’ Special Olympics Malta, spjegat il-viżjoni wara dawn il-logħob u tenniet kif, bil-messaġġ ‘Beyond the Wave’, iridu jwasslu messaġġ pożittiv u mimli tama lill-atleti li, minkejja l-isfidi li jiffaċċjaw ta’ kuljum, hemm ġejjieni mimli opportunitajiet. Dr Abela tenniet li jridu juru wkoll li, jekk is-soċjetà tingħaqad f’forza waħda, jistgħu jiksbu aktar, jistgħu jbiddlu, u jistgħu jibnu soċjetà inklużiva li toffri opportunitajiet ugwali għal kulħadd.

Il-Ministru għall-Inklużjoni u l-Volontarjat Julia Farrugia saħqet li Special Olympics Malta hija xhieda ċara ta’ kif l-inklużjoni tinbena permezz ta’ azzjoni konkreta u mhux biss bil-kliem. Hija rrimarkat li l-Gvern kompla jinvesti f’opportunitajiet li jagħtu s-setgħa lill-persuni b’diżabilità biex jipparteċipaw bis-sħiħ fil-ħajja sportiva u soċjali, filwaqt li enfasizzat li Malta qed tkompli tissaħħaħ bħala mudell ta’ inklużjoni fuq livell Ewropew u internazzjonali. Il-Ministru rringrazzjat lil Special Olympics Malta, lill-atleti, lill-familji tagħhom u lill-voluntiera kollha għad-dedikazzjoni tagħhom, filwaqt li awgurat kull suċċess lill-atleti Maltin u Għawdxin għall-kompetizzjonijiet li ġejjin.

Il-Ministru għall-Edukazzjoni u l-Isport Byron Camilleri qal li, “Filwaqt li nieħdu gost bil-midalji, jien inqis dan tagħkom bħala moviment li jibdel il-ħajjiet għall-aħjar. L-isport għandu setgħa unika biex jibni l-kunfidenza fl-individwu u jgħin lill-persuni jkunu reżiljenti. Huwa għalhekk li nemmen bis-sħiħ fil-valur tal-ħidma li qed twettqu u fl-appoġġ li rridu nkomplu nagħtu lil Special Olympics Malta.”

David Evangelista, Kap Eżekuttiv ta’ Special Olympics, irringrazzja lill-Gvern Malti mhux biss talli Malta ser tkun qed tospita l-ewwel avveniment tax-xorta tiegħu fuq livell internazzjonali, iżda wkoll tas-sostenn kontinwu li Malta tagħti bħala parti mill-koalizzjoni internazzjonali favur l-inklużjoni fis-soċjetajiet tagħna.

Il-pubbliku huwa mistieden iżur is-sit www.specialolympicsmalta.org għal aktar informazzjoni, kif ukoll biex jissieħeb bħala parti mit-tim ta’ voluntiera għal waqt dawn il-logħob.