STQARRIJA MILL-UFFIĊĊJU TAL-PRESIDENT Il-President ta’ Malta żżur is-Seminarju Minuri tal-Arċisqof, bħala parti mill-kampanja BOV Piggy Bank

L-Eċċellenza Tagħha Myriam Spiteri Debono, President ta’ Malta, żaret is-Seminarju Minuri tal-Arċisqof, bħala parti mill-kampanja BOV L-istrina Piggy Bank. 

Matul iż-żjara tagħha, il-President kienet akkumpanjata mill-Arċisqof, Monsinjur Charles J Scicluna, u l-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima

Waqt li indirizzat lill-istudenti, il-President ħeġġithom biex huma wkoll ikunu parti minn L-Istrina ta’ din is-sena, billi jikkontribwixxu mill-ftit tagħhom b’risq il-kampanja Piggy Bank.

Il-President spjegat li matul is-sena ltaqgħet ma’ xi studenti li wara l-iskola ma jsibux familja għand min imorru, u oħrajn li qed ibatu minħabba li l-mard ħakem lilhom jew lill-familja tagħhom. Fakkret lill-istudenti li huma dawn in-nies li jsibu wens u għajnuna mill-Malta Community Chest Fund, u li l-flus miġbura bħala parti mill-kampanja Piggy Bank imorru b’dan l-iskop.

L-Eċċellenza Tagħha rreferiet ukoll għall-valuri Insara li huma l-ethos tal-edukazzjoni tas-Seminarju, u ħeġġet lill-istudenti biex iżommu qalbhom u moħħhom miftuħ għall-oħrajn, biex ikunu ta’ spalla meta ħaddieħor jiġi bżonnha. Fissret li dawn il-ġesti żgħar ta’ kuljum ukoll huma importanti biex ikollna soċjetà li tħenn għall-proxxmu u li tiżgura li ħadd ma jibqa’ lura.

Fis-Seminarju Minuri tal-Arċisqof, il-President ħeġġet lill-istudenti biex juru wkoll apprezzament u rikonoxximent lill-edukaturi tagħhom, waqt li rreferiet għall-edukazzjoni bħala l-pedament tat-tħejjija tal-mexxejja tal-futur. Fl-istess waqt, il-President aċċennat li l-mexxejja mhumiex biss l-ogħla awtoritajiet tal-pajjiż, iżda wieħed isib mexxejja f’kull strata tas-soċjetà, fosthom l-istudenti nfushom, li appellatilhom biex huma wkoll ikunu mexxejja fost sħabhom.

L-Arċisqof Charles Scicluna rringrazzja lill-President taż-żjara tagħha fis-Seminarju Minuri tal-Arċisqof, li bil-preżenza u l-inizjattiva tagħha biex ngħinu lil ħutna fil-bżonn permezz tal-Malta Community Chest Fund, “qed tgħallimna li parti mir-rwol ta’ min hu msejjaħ biex jirrappreżenta lill-Istat tagħna huwa li tassew jieħu ħsiebna meta għandna l-iżjed bżonn.”

L-Arċisqof żied jgħid, “Iżjed ma jkollok responsabbiltà, iżjed tikber fik is-sejħa biex lill-proxxmu tieħu ħsiebu, tkun għalih ta’ għożża. Dan hu l-ispirtu tal-Milied li qegħdin niċċelebraw.”

Min-naħa tiegħu, il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima feraħ lill-istudenti li flimkien mal-edukaturi u l-LSEs tagħhom ipparteċipaw bi ħġarhom f’din l-inizjattiva b’risq il-Community Chest Fund. F’messaġġ qasir lill-istudenti, il-Ministru Grima rrefera għall-isem ta’ din l-Istituzzjoni edukattiva ‘Seminarju’, bil-Latin ‘seminarium’, li ġejja mill-kelma żerriegħa. “Fl-istudenti tagħna qed niżirgħu mhux biss il-fidi u l-għarfien, imma wkoll dak kollu li jagħmilkom ċittadini denji ta’ pajjiżna,” qal il-Ministru Grima. Huwa fakkar lill-istudenti li dawn il-ġesti nobbli li qed jipparteċipaw fihom illum huma l-pedament ta’ futur responsabbli, għalihom b’mod individwali u wkoll bħala l-mexxejja ta’ għada.

Fi tmiem iż-żjara tagħha, l-Eċċellenza Tagħha wieġbet għal numru ta’ mistoqsijiet imħejjija mill-istudenti, li permezz tagħhom kellhom iċ-ċans isiru jafu aħjar lill-President, il-valuri u t-tradizzjonijiet li trabbiet fihom, kif ukoll il-ħidma tagħha matul din il-Presidenza.