STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Eurodesk Malta tiċċelebra 35 sena ta’ impenn lejn opportunitajiet Ewropej għaż-żgħażagħ - bidliet, sfidi u futur ċar fl-era tal-AI

Waqt iċ-ċelebrazzjoni uffiċjali tal-35 anniversarju ta’ Eurodesk Malta, is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti enfasizza l-valur fundamentali ta’ Eurodesk bħala pilastru ta’ informazzjoni, gwida u opportunità għall-ġenerazzjonijiet żgħażagħ f’pajjiżna. 

Huwa saħaq li Eurodesk, imħaddma permezz ta’ Aġenzija Żgħażagħ u appoġġjata mill-Kummissjoni Ewropea u mill-EUPA, kienet u tibqa’ strumentali biex tagħmel l-Ewropa aktar qrib iż-żgħażagħ. 

Filwaqt li ddiskuta t-tema prinċipali ta’ din is-sena, Youth Information in the Age of AI, is-Segretarju Parlamentari sostna li ż-żgħażagħ illum jinsabu quddiem realtà ġdida fejn l-informazzjoni hija immedjata, vasta u kultant qarrieqa. F’dan il-kuntest, l-irwol ta’ Eurodesk bħala sors affidabbli ta’ informazzjoni u direzzjoni huwa aktar kruċjali minn qatt qabel. Huwa spjega li l-pjattaforma tipprovdi ċarezza f’ambjent mimli storbju diġitali, u tgħin liż-żgħażagħ jieħdu deċiżjonijiet informati u konxji dwar il-futur tagħhom. 

Is-Segretarju Parlamentari Keith Azzopardi Tanti faħħar il-ħidma li saret matul is-snin u qal li, “Eurodesk illum qed tagħti sinifikat ġdid lill-opportunità. Qed toffri spazju sigur u ċar fejn iż-żgħażagħ jistgħu jsibu informazzjoni kredibbli dwar l-Ewropa, jiskopru programmi bħal Erasmus+, ESC, DiscoverEU u traineeships, u jagħmlu għażliet li jibdlulhom ħajjithom. Hija pjattaforma li tassew tgħaqqad lill-Ewropa maż-żgħażagħ u tagħtihom kuraġġ biex jimirħu lil hinn mill-konfini tagħhom.” 

Waqt l-intervent tiegħu, is-Segretarju Parlamentari rrimarka wkoll kif Eurodesk Malta qed twettaq b’mod ċar l-ewwel EU Youth Goal: Connecting the EU with Young People, u li dan id-djalogu kontinwu bejn iż-żgħażagħ u l-Ewropa għandu jissaħħaħ permezz ta’ servizzi ta’ informazzjoni imparzjali, li jistgħu jiġu fdati u li jwieġbu għar-realtajiet kulturali u teknoloġiċi tal-lum. 

Huwa żied li l-Gvern jibqa’ impenjat li jsaħħaħ l-aċċess għal dawn l-opportunitajiet għall-ġenerazzjonijiet kollha, b’mod partikolari għal dawk li jistgħu jiltaqgħu ma’ sfidi jew limitazzjonijiet soċjali, ekonomiċi jew edukattivi. L-għan huwa li l-opportunità tkun viżibbli, reali u inklussiva.

Il-Manager tal-Youth Empowerment Unit ta’ Aġenzija Żgħażagħ, Maria Borg, li taħt il-mandat tagħha topera Eurodesk Malta, stqarret li l-programm jibqa’ mudell ta’ informazzjoni strutturata u ta’ appoġġ kontinwu għaż-żgħażagħ.

Hija qalet li “Eurodesk tibqa’ għodda essenzjali biex iż-żgħażagħ jingħataw l-informazzjoni t-tajba fil-mument it-tajjeb. Għal 35 sena, dan is-servizz fetaħ orizzonti ġodda, kabbar il-kunfidenza taż-żgħażagħ u lil ħafna minnhom saħħaħhom biex jagħmlu l-ewwel pass lejn esperjenzi li biddlulhom ħajjithom.”

Matul l-avveniment intqal ukoll li l-programmi Ewropej mhux biss joffru esperjenza edukattiva imma jistgħu jinbidlu f’karrieri, f’sħubiji internazzjonali u f’sens qawwi ta’ appartenenza Ewropea. Eurodesk Malta tkompli taqdi funzjoni vitali biex dawn l-opportunitajiet isiru aċċessibbli u rilevanti għall- ġenerazzjonijiet preżenti u futuri.

Permezz ta’ din iċ-ċelebrazzjoni, Eurodesk Malta tikkonferma mill-ġdid il-missjoni tagħha: li toffri gwida ċara, aċċess għal opportunitajiet Ewropej u appoġġ kontinwu biex iż-żgħażagħ f’Malta jibqgħu parti integrali mill-istorja, il-kultura u l-futur tal-Ewropa.