STQARRIJA MILL-MINISTERU GĦALL-INKLUŻJONI U L-VOLONTARJAT Jitħabbru d-dettalji dwar il-Community Support Scheme (CSS): skema ġdida li tikkumplimenta l-fondi tal-Programm LEADER tal-Unjoni Ewropea

Ġie mħabbar li, nhar l-Erbgħa 29 ta’ Ottubru 2025, ser tkun qed tiftaħ għall-ewwel darba l-Community Support Scheme (CSS). Din l-iskema ġdida se tindirizza l-ħtiġijiet ta’ 900 għaqda volontarja, 21 kunsill lokali u 4 kunsilli reġjonali li jinsabu f’lokalitajiet li ma jikkwalifikawx għall-Programm LEADER tal-Unjoni Ewropea. Il-baġit allokat għal din l-iskema huwa ta’ €800,000.

Din it-tħabbira saret mill-Ministru għall-Inklużjoni u l-Volontarjat, Julia Farrugia, waqt żjara fl-Għaqda Filarmonika Prince of Wales Own tal-Birgu, fil-preżenza tal-Kap Eżekuttiv tal-Kunsill Malti għas-Settur tal-Volontarjat (MCVS), Mauro Pace Parascandalo, u s-Sindku tal-Birgu, John Boxall.

Matul is-snin, il-Programm LEADER tal-Unjoni Ewropea ġie rikonoxxut bħala suċċess u huwa mod innovattiv ta’ kif jgħin fl-iżvilupp ta’ żoni rurali. Madanakollu, dawn il-fondi huma indirizzati speċifikament għal proġetti li jitwettqu f’lokalitajiet meqjusa rurali u, għaldaqstant, numru ta’ lokalitajiet f’Malta ma jistgħux jibbenefikaw minn dawn il-fondi. Għaldaqstant, din l-iskema se tindirizza din is-sitwazzjoni u tappoġġja lil dawk l-organizzazzjonijiet volontarji li huma bbażati f’lokalitajiet li mhumiex eliġibbli taħt il-programm LEADER.

Għall-Community Support Scheme ser ikunu eliġibbli l-kunsilli lokali u reġjonali, kif ukoll għaqdiet volontarji minn 21 lokalità f’Malta. Dawn il-lokalitajiet huma Ħal Balzan, Birkirkara, Bormla, Ħal Tarxien, il-Belt Valletta, il-Birgu, il-Fgura, il-Furjana, il-Gżira, il-Ħamrun, l-Imsida, l-Isla, il-Marsa, Paola, Pembroke, San Ġiljan, San Ġwann, Santa Venera, Tal-Pietà, Tas-Sliema u Ta’ Xbiex.

Is-sejħa għall-proposti bit-termini tinsab fil-portal tal-MCVS vofunding.org.mt, flimkien ma’ linji gwida u għajnuna għall-għaqdiet sabiex jiġu megħjuna jissottomettu l-applikazzjonijiet tagħhom. 

Il-Ministru Julia Farrugia qalet kif “din l-iskema ġdida se tagħti ċans lil kull lokalità biex tikber u tiżviluppa skont il-bżonnijiet tagħha, anke f’dawk iż-żoni li s’issa ma setgħux jibbenefikaw mill-fondi Ewropej LEADER. Permezz ta’ din l-iskema qed noħolqu aktar spazji għal kollaborazzjoni, għal ideat ġodda u għal proġetti li jsaħħu s-soċjetà ċivili tagħna. L-inklużjoni tfisser li ħadd ma jitħalla lura, u dan hu eżattament dak li rridu niksbu b’din l-inizjattiva, billi nagħtu s-saħħa lill-kunsilli u lill-għaqdiet biex ikomplu jservu lill-komunitajiet tagħhom b’ħeġġa u viżjoni.”

Mauro Pace Parascandalo, il-Kap Eżekuttiv tal-MCVS, qal li “din l-iskema ser tkun qed tingħaqad ma’ kullana sħiħa ta’ servizzi u fondi li l-Kunsill Malti għas-Settur tal-Volontarjat jipprovdi kontinwament lill għaqdiet.” Huwa ħeġġeġ lill-għaqdiet u l-kunsilli li huma eliġibbli sabiex jidħlu fil-portal vofunding.org.mt u minn hemm isibu l-informazzjoni u l-għajnuna li għandhom bżonn ħalli jkomplu jwettqu proġetti għall-ġid tal-kommunitajiet tagħna.

L-għaqdiet li japplikaw għall-fondi jeħtieġ li jkunu rreġistrati u konformi mal-Kummissarju għall-Organizzazzjonijiet Volontarji. L-applikazzjonijiet ser jintlaqgħu sal-Erbgħa 10 ta’ Diċembru 2025.