STQARRIJA MILL-MINISTERU GĦALL-FONDI EWROPEJ U L-IMPLIMENTAZZJONI TAL-PROGRAMM ELETTORALI Il-Kummissjoni Ewropea tapprova valutazzjoni preliminari pożittiva tat-tielet talba għal pagament ta’ Malta taħt il-Faċilità għall-Irkupru u r-Reżiljenza

Il-Kummissjoni Ewropea ħarġet valutazzjoni preliminari favorevoli tat-tielet talba għal pagament ta’ Malta, li tammonta għal €48.7 miljun, taħt il-Faċilità għall-Irkupru u r-Reżiljenza (RRF) tal-Unjoni Ewropea — l-istrument ċentrali tal-inizjattiva NextGenerationEU. Dan l-iżvilupp jimmarka pass sinifikanti fl-implimentazzjoni tal-Pjan Nazzjonali għall-Irkupru u r-Reżiljenza (RRP) ta’ Malta.  

L-RRP ta’ Malta jammonta għal €328.2 miljun u jinkludi firxa wiesgħa ta’ proġetti mmirati lejn il-bini ta’ ekonomija aktar sostenibbli, aktar diġitali u aktar reżiljenti.

Il-valutazzjoni tal-Kummissjoni, ibbażata fuq is-sottomissjoni ta’ Malta tat-12 ta’ Diċembru 2024, tikkonferma li l-24 stadju importanti u miri kollha meħtieġa għal dan il-pagament intlaħqu b’suċċess. Dawn ikopru taħlita wiesgħa ta’ riformi u investimenti — 15 u 9 rispettivament — immirati lejn it-titjib tal-kwalità tal-ħajja għaċ-ċittadini Maltin u l-appoġġ għat-tranżizzjoni ekonomika tal-pajjiż. Oqsma ewlenin indirizzati jinkludu aċċess imtejjeb għal trasport pubbliku mingħajr ħlas, it-tisħiħ tal-kompetenzi diġitali, u oqfsa msaħħa kontra l-ħasil tal-flus. L-investimenti jimmiraw ukoll lejn il-modernizzazzjoni fil-kura tas-saħħa u l-ġustizzja permezz ta’ għodod diġitali, kif ukoll mobbiltà aktar nadifa permezz tal-akkwist ta’ vetturi elettriċi.

Fost l-inizjattivi prinċipali hemm it-tnedija ta’ programm ta’ skrinjar tas-smigħ tat-trabi tat-twelid imfassal biex jidentifika t-telf ta’ smigħ bikri fit-trabi u biex jipprovdi interventi meħtieġa f’waqthom, u l-bini ta’ skola kważi newtrali f’termini ta’ emissjonijiet tal-karbonju li sservi bħala punt ta’ riferiment għal prattiki ta’ bini sostenibbli fis-settur tal-edukazzjoni. Dan il-proġett skolastiku għandu l-għan li juri approċċi innovattivi għall-kwalità tal-arja, l-effiċjenza fl-użu tal-enerġija, u l-integrazzjoni tal-enerġija rinnovabbli.

“Din l-approvazzjoni hija riżultat ta’ ħidma kontinwa biex isir l-aqwa investiment bil-fondi miksuba mill-Unjoni Ewropea,” qal il-Ministru għall-Fondi Ewropej u l-Implimentazzjoni tal-Programm Elettorali, Stefan Zrinzo Azzopardi. Il-Ministru kompla jgħid li l-Gvern huwa kommess li jara li l-Fondi tal-UE jissarrfu fi proġetti ta’ fejda għall-pajjiżna u l-poplu tiegħu.

Il-Kummissjoni issa rreferiet il-valutazzjoni preliminari tagħha lill-Kumitat Ekonomiku u Finanzjarju (KEF), li huwa mistenni jipprovdi l-opinjoni tiegħu fi żmien erba’ ġimgħat. L-iżborż tal-fondi se jsegwi l-opinjoni tal-KEF u d-deċiżjoni formali sussegwenti tal-Kummissjoni dwar il-pagament.