STQARRIJA MILL-MINISTERU GĦALL-AMBJENT, L-ENERĠIJA U L-INDAFA PUBBLIKA U MILL-MINISTERU GĦAT-TRASPORT, L-INFRASTRUTTURA U X-XOGĦLIJIET PUBBLIĊI

Malta tissieħeb fl-inizjattiva Clean Energy Marine Hubs biex taċċellera fi fjuwils aktar sostenibbli fis-settur marittimu

Malta ngħaqdet ma’ pajjiżi oħra fosthom il-Kanada, in-Norveġja u l-Greċja fl-inizjattiva Clean Energy Marine Hubs (CEM-Hubs). Din l-inizjattiva hija sforz globali li għandha l-għan li taċċellera l-produzzjoni, il-ġarr u l-użu ta’ fjuwils aktar sostenibbli fuq skala industrijali.

Ġeografikament, il-Gvern jirrikonoxxi li pajjiżna għandu opportunità unika biex jaċċellera fil-produzzjoni, il-ġarr u l-użu ta’ fjuwils aktar sostenibbli fil-qasam marittimu. Dan minbarra l-ħidma importanti li diġà bdiet biex nilqgħu għal din l-isfida bi prattiċi aktar indaf u sostenibbli.

“Kburin li ninsabu parti mill-inizjattiva Clean Energy Marine Hubs, pass trasformattiv li jgħaqqad l-isforzi globali għal futur aktar nadif u sostenibbli. Din il-kollaborazzjoni se tippermettilna li naqsmu l-aħjar prattiċi, nallinjaw il-politiki tagħna u nsaħħu l-investimenti fl-infrastruttura ta’ fjuwils li jniġġsu anqas, sabiex nassiguraw li Malta jkollha rwol attiv fit-tranżizzjoni globali fl-enerġija marittima,” qalet il-Ministru għall-Enerġija Miriam Dalli.

Il-Ministru Dalli rrimarkat kif is-sħubija ta’ pajjiżna fis-CEM-Hubs, huwa pass importanti li jindirizza l-ewwel pilastru tal-Viżjoni Malta 2050, jiġifieri li pajjiżna jimraħ fit-Tkabbir Ekonomiku Sostenibbli f’oqsma bħalma huma s-setturi tas-servizzi finanzjarji, l-innovazzjoni u l-marittimu fost oħrajn.

Il-Ministru għat-Trasport, l-Infrastruttura u x-Xogħlijiet Pubbliċi Chris Bonett qal “Li Malta tingħaqad fl-inizjattiva CEM-Hubs ikompli jikkonferma l-impenn tagħna biex inkomplu nkunu fuq quddiem nett fl-innovazzjoni tas-settur marittimu. Din hija opportunità għal pajjiżna sabiex jagħti kontribut fil-ħolqien tat-tranżizzjoni globali fl-enerġija marittima flimkien ma’ gvernijiet u mexxejja ewlenin fl-industrija madwar id-dinja. Bla dubju, dan huwa pass kruċjali lejn settur marittimu aktar reżiljenti u sostenibbli għal ġenerazzjonijiet futuri.”

Billi ngħaqdet ma’ din il-koalizzjoni internazzjonali, Malta terġa’ tikkonferma l-impenn tagħha li timbotta ’l quddiem soluzzjonijiet sostenibbli fil-qasam tal-enerġija u tħeġġeġ aktar kollaborazzjoni bejn il-pajjiżi.

L-inizjattiva CEM-Hubs, immexxija minn gvernijiet fosthom il-Kanada, in-Norveġja, il-Greċja, il-Brażil u l-Emirati Għarab Magħquda, flimkien ma’ organizzazzjonijiet ewlenin fl-industrija bħall-International Chamber of Shipping (ICS) u l-International Association of Ports & Harbours (IAPH), isservi bħala pjattaforma dinamika li tgħaqqad flimkien stakeholders minn diversi oqsma, inklużi dawk tal-enerġija, il-marittimu, u l-finanzi. Il-missjoni tagħha hi li tnaqqas ir-riskji fl-investiment u żżid l-iżvilupp ta’ hubs ta’ enerġija nadifa madwar id-dinja. Dan filwaqt li fjuwils sostenibbli jsiru aktar aċċessibbli u affordabbli għall-industrija.

Il-parteċipazzjoni ta’ Malta tenfasizza l-pożizzjoni strateġika tagħna fil-Mediterran bħala ċentru li qed jissaħħaħ fl-innovazzjoni fl-enerġija nadifa. Din l-inizjattiva tmur id f’id mal-viżjoni ta’ Malta li l-Mediterran isir Hub ta’ enerġija nadifa, li jippromwovi settur marittimu sostenibbli li jiffaċilita tranżazzjoni globali lejn ekonomija dikarbonizzata.