STQARRIJA MILL-MINISTERU GĦALL-ĠUSTIZZJA U R-RIFORMA TAS-SETTUR TAL-KOSTRUZZJONI Il-Ministru għall-Ġustizzja jilqa’ lid-Delegati għat-18-il Konferenza Reġjonali Ewropea tal-Assoċjazzjoni Internazzjonali tal-Prosekuturi f’Malta

Il-Ministru għall-Ġustizzja u r-Riforma tas-Settur tal-Kostruzzjoni Jonathan Attard għamel diskors tal-ftuħ fit-18-il Konferenza Reġjonali Ewropea tal-Assoċjazzjoni Internazzjonali tal-Prosekuturi (IAP). Din hija l-ewwel darba li Malta ospitat dan l-avveniment prestiġjuż. Il-konferenza laqqgħet flimkien prosekuturi minn madwar l-Ewropa u lil hinn minnha bil-għan li titrawwem il-kollaborazzjoni u jiġu kondiviżi l-aħjar prattiki fl-insegwiment tal-ġustizzja.

Fid-diskors tiegħu, il-ministru ta merħba f'pajjiżna lil dawn il-mistednin distinti, filwaqt li enfasizza l-valuri komuni li jgħaqqdu lill-professjonisti legali fl-impenn tagħhom lejn il-ġustizzja.

Il-ministru saħaq fuq is-sinifikat tal-IAP bħala pjattaforma vitali biex jiġu indirizzati l-isfidi ffaċċjati f'xenarju legali li dejjem qed jevolvi. Huwa għamel enfasi fuq kemm huwa importanti li matul il-konferenza jkun hemm diskussjonijiet sinifikanti u skambju ta' ideat innovattivi, li fl-aħħar mill-aħħar se jtejbu l-ħidma tal-prosekuturi u jsaħħu l-integrità tas-sistema ġudizzjarja.

Il-Ministru Jonathan Attard ħa l-opportunità biex juri l-avvanzi ta' Malta fil-qasam tal-prosekuzzjoni, u ta wkoll dettalji dwar ir-riformi kontinwi li nbdew fl-2019. Huwa enfasizza l-istabbiliment tal-Uffiċċju tal-Avukat tal-Istat, li ppermetta li l-Uffiċċju tal-Avukat Ġenerali jiffoka biss fuq il-prosekuzzjonijiet, u b'hekk issimplifika l-proċedimenti legali. Din il-bidla ppermettiet lill-Uffiċċju jittratta każijiet kriminali serji b'mod aktar effettiv, inklużi omiċidji volontarji, terroriżmu, frodi, approprjazzjoni indebita, u ħasil tal-flus.

Il-ministru ddeskriva r-riformi kontinwi li seħħew, filwaqt li nnota ż-żieda fl-għadd ta' prosekuturi minn 18 fl-2019 għal 70 sal-aħħar ta' Settembru 2024. Huwa rrikonoxxa l-isforzi kollaborattivi bejn l-Uffiċċju tal-Avukat Ġenerali u l-Pulizija, li wasslu għall-iżvilupp ta' Proċeduri Operattivi Standard biex jiġu żgurati sforzi kkoordinati fil-ġlieda kontra l-kriminalità.

Huwa enfasizza wkoll il-passi sinifikanti li saru fl-iżvilupp professjonali, bl-involviment ta' Maniġer tat-Taħriġ biex iwettaq analiżi annwali tal-ħtiġijiet ta' taħriġ għall-prosekuturi. Din l-inizjattiva tirrifletti l-impenn tal-gvern li jsaħħaħ il-kapaċitajiet tal-professjonisti legali u jiżgura l-indipendenza operattiva fi ħdan l-Uffiċċju tal-Avukat Ġenerali.

Waqt li indirizza r-riformi li għaddejjin fis-settur tal-Ġustizzja, il-Ministru Jonathan Attard semma l-ħolqien ta' maġistrati assenjati u riformi ppjanati mmirati lejn it-titjib tal-proċedura tal-kumpilazzjonijiet. Dawn il-bidliet huma mfassla biex itejbu l-effiċjenza u r-responsabbiltà fi ħdan il-qafas legali.

Fl-għeluq, il-ministru rringrazzja lill-parteċipanti kollha għall-impenn u d-dedikazzjoni tagħhom għall-prinċipji tal-ġustizzja. Huwa faħħar lill-Avukat Ġenerali Victoria Buttigieg, għall-kontribuzzjonijiet imprezzabbli tagħha fl-arena internazzjonali.

Il-konferenza sservi bħala pjattaforma kruċjali għal kollaborazzjoni u diskussjonijiet produttivi, li twitti t-triq għal avvanzi kontinwi fl-insegwiment tal-ġustizzja madwar l-Ewropa.

Il-konferenza kienet indirizzata wkoll mill-Imħallef Ramona Frendo, Imħallef tal-Qorti tal-Ġustizzja tal-Unjoni Ewropea (CJEU).