Left arrow Go Back

STQARRIJA MILL-MINISTERU GĦALL-AGRIKOLTURA, IS-SAJD U D-DRITTIJIET TAL-ANNIMALI Responsabbiltà tas-Sigurtà fl-Ikel

pr240836
Date Icon 16/05/2024

Il-Gvern jirreferi għall-istqarrija li saret mill-Malta Environmental Health Officers Association (MEHOA) dwar ir-responsabbiltà tas-Sigurtà fl-Ikel.

Il-kontrolli tas-sigurtà tal-ikel f'Malta dejjem kienu r-responsabbiltà kondiviża ta' tliet Ministeri, jiġifieri l-Ministeru responsabbli għall-Ikel u l-Agrikoltura, is-Saħħa u l-Ħarsien tal-Konsumatur u li huma mifruxa fi ħdax-il entità b' sorveljanza frammentata. Huwa għalhekk li fil-Manifest Elettorali tal-2022, il-Gvern ippropona l-konsolidazzjoni tal-kontrolli tal-ikel taħt entità waħda.

Bħala riżultat ta' dan, il-Ministeru għall-Agrikoltura, s-Sajd u d-Drittijiet tal-Annimali, li huwa responsabbli għall-portafoll tal-ikel, ġie assenjat il-kompitu li jikkonsolida l-funzjonijiet tal-kontroll tal-ikel. Għal dan il-għan, il-Kummissjoni għas-Sigurtà fl-Ikel (KSI) li kienet stabbilita fl-2002 u li l-mandat tagħha huwa li tissorvelja, tikkoordina u żżomm taħt reviżjoni l-prattiki, l-operat u l-attivitajiet kollha relatati mal-ikel, ġiet assenjata bħala parti mill-Portafoll tal-Ministeru għall-Agrikoltura, s-Sajd u d-Drittijiet tal-Annimali minn April 2022.

F'konformità mal-Programm ta' Ħidma tal-Gvern ibbażat fuq il-Manifest Elettorali tal-2022, il-Ministeru għall-Agrikoltura, s-Sajd u d-Drittijiet tal-Annimali bdiet inizjattiva trasformattiva biex tistabbilixxi awtorità ġdida bir-responsabbiltà li tissorvelja s-sostenibbiltà, is-sikurezza, u s-sigurtà fl-ikel fil-pajjiż. Dan juri livell għoli ta' impenn għas-sikurezza, il-kwalità u s-sigurtà fl-ikel u jipprovdi approċċ integrat għat-teħid ta' deċiżjonijiet ibbażati fuq ir-riskju, l-allokazzjoni tar-riżorsi u l-azzjoni tul il-katina tal-ikel kollha mir-razzett sal-mejda.

Saret analiżi ta' livell għoli u pjan li jinkludi l-istrateġija, l-istruttura u s-sistemi proposti li se jservu bħala l-pedament għall-awtorità ġdida, li għandha tiġi ffurmata permezz tal-konsolidament ta' entitajiet eżistenti.

Il-proċess tmexxa mill-KSI li fiha ġew ikkonsultati l-partijiet interessati rilevanti kollha fejn ntalbu jipprovdu l-informazzjoni meħtieġa għal dan l-eżerċizzju. B' differenza mill-istqarrija magħmula mill-MEHOA, il-Ministeru għall-Agrikoltura, s-Sajd u d-Drittijiet tal-Annimali ltaqa' mal-mexxejja tagħha sa minn Ġunju 2022, fejn ġew infurmati dwar il-proċess ta' implimentazzjoni tal-miżura tal-manifest.

It-twaqqif ta' awtorità unika responsabbli għas-sikurezza u s-sigurtà fl-ikel mhux biss mhux se ddgħajjef is-sikurezza tal-ikel u l-professjoni ta' dawk involuti, iżda ser twassal għal tisħiħ, billi ġġib flimkien il-funzjonijiet kollha ta' kontroll tal-katina tal-ikel f'amministrazzjoni waħda, skont il-loġika tar-Regolament tal-Unjoni Ewropeja 2017/625. Dan se jġib diversi vantaġġi għall-uffiċjali tal-awtorità, il-partijiet interessati u l-konsumaturi permezz tas-simplifikazzjoni tal-proċeduri amministrattivi, l-applikazzjoni armonizzata tar-regolamenti u l-proċessi ta' kontroll, il-kondiviżjoni tal-għarfien u l-kompetenza miżjuda bi rwoli, u b'responsabbiltà definiti b'mod ċar.

Il-Gvern dejjem saħaq il-fatt li kif ġara fil-passat bit-twaqqif tad-diversi awtoritajiet u aġenziji pubbliċi, hekk kif preskritt fil-leġiżlazzjoni Maltija, l-uffiċjali pubbliċi li se jkunu assenjati fi ħdan l-awtorità l-ġdida se jżommu d-drittijiet u dmirijiet kollha bħala uffiċjali pubbliċi u li t-termini u l-kondizzjonijiet tas-servizz tagħhom ma għandhomx ikunu inqas favorevoli minn dawk li huma mehmuża mal-ħatra tagħhom fis-servizz pubbliku. Bl-istess mod jingħad għal professjoni tal-uffiċjali involuti f' dan il-proċess u li bħal ma dejjem sar, jitkomplew id-diskussjonijiet mal-partijiet kollha interessati.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow