STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Iż-żgħażagħ fiċ-ċentru taċ-ċinematografija permezz tal-inizjattiva ta’ Aġenzija Żgħażagħ ‘Jumpstart Youth Film Festival’
Is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti attenda għall-premjazzjoni tar-rebbieħa tal-Jumpstart Youth Film Festival organizzat minn Aġenzija Żgħażagħ b'kollaborazzjoni mal-iskejjel.
Dan il-festival ittella' bil-għan li jħeġġeġ żgħażagħ ta' bejn il-15 u s-16-il sena jiżviluppaw interess fil-produzzjoni tal-films u jifhmu l-proċessi ta' wara l-kwinti. Din l-inizjattiva trawwem ukoll il-kreattività u l-espressjoni artistika fost iż-żgħażagħ.
Il-festival ospita 10 skejjel, li kollettivament issottomettew 26 film. Din l-inizjattiva kienet tinvolvi d-dedikazzjoni u l-passjoni tal-istudenti li ħadmu bla heda fuq il-proġetti tagħhom, u l-għalliema tagħhom li kienu strumentali biex jiggwidaw lill-istudenti lejn il-kisba tal-għanijiet kreattivi tagħhom.
Is-Segretarju Parlamentari Azzopardi Tanti spjega li l-benefiċċji edukattivi tal-produzzjoni tal-films jestendi lil hinn mill-forma tal-arti nnifisha. Kompla jispjega li l-parteċipazzjoni fi proġetti tal-films tgħin lill-istudenti jiżviluppaw diversi ħiliet fosthom, time management, ħiliet fil-qasam tal-komunikazzjoni u kif taħdem f'tim.
“Il-festival mhuwiex biss dwar il-wiri tal-films, iżda wkoll jixpruna passjoni għar-rakkontar tal-istejjer, il-kreattività u l-kollaborazzjoni. Huwa essenzjali li nkomplu nappoġġaw u nrawmu t-talent taż-żgħażagħ, filwaqt li niżguraw li dawn ikollhom l-għodod u l-opportunitajiet biex jirnexxu fil-futur," temm jgħid is-Segretarju Parlamentari Azzopardi Tanti.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261928