Left arrow Go Back

STQARRIJA MIS-SEGRETARJAT PARLAMENTARI GĦALL-GVERN LOKALI Imħabbra skemi għall-kunsilli lokali għal proġetti u inizjattivi fil-qalba tal-komunitajiet

pr230372
Date Icon 10/03/2023

Waqt konferenza tal-aħbarijiet, is-Segretarju Parlamentari għall-Gvern Lokali Alison Zerafa Civelli ħabbret l-iskemi għall-kunsilli lokali għal din is-sena. L-għan ewlieni ta' dawn l-iskemi huwa li l-kunsilli lokali jkollhom l-għodda neċessarja sabiex jindirizzaw il-bżonnijiet tal-lokalitajiet li jinbidlu maż-żminijiet u b'hekk ikomplu jtejbu l-kwalità tal-ħajja tar-residenti tagħhom.

“Permezz ta' dawn l-iskemi li qed inniedu llum, qed niddelegaw il-fiduċja tagħna fil-kunsilli lokali. Il-ħidma tal-kunsilli fil-qalba tal-lokalitajiet u mal-komunitajiet f'pajjiżna tikkumplimenta dik tal-gvern. Għaldaqstant dawn l-iskemi finanzjarji se jkunu qed jgħinu sabiex dan ikompli jsir," saħqet is-Segretarju Parlamentari Zerafa Civelli.

L-iskemi ta' finanzjament għall-kunsilli lokali għal din is-sena jinkludu:

  • Skema għall-Attivitajiet Kulturali Annwali u Attivitajiet tal-Milied
  • Skema għall-Komunitajiet Aktar Siguri u Organizzati
  • Fond ta' Manutenzjoni u Sostenn ta' Proġetti Infrastrutturali Maġġuri li ġew imwettqa mill-Gvern Ċentrali
  • Skema għal Spazji Aktar Miftuħa, Rikreattivi u Aċċessibbli
  • Espressjoni ta' Interess għal Servizz ta' Manutenzjoni fil-Libreriji Lokali u Reġjonali fil-lokalitajiet madwar Malta u Għawdex
  • Espressjoni ta' Interess għall-Inizjattivi għal World Cleanup Campaign 2023
  • Espressjoni ta' Interess għall-Implimentazzjoni tal-Kunċett School Grannies

Is-Segretarju Parlamentari spjegat li t-triq 'il quddiem hija li tinvolvi mekkaniżmu ġdid għall-finanzjament tal-iskemi għall-kunsilli lokali. “Mekkaniżmu li għandu jinvolvi l-evalwazzjoni ta' ħtiġijiet proposti mil-pjan ta' ħidma mfassal mill-kunsilli lokali u reġjonali nfushom" stqarret is-Segretarju Parlamentari Zerafa Civelli.

Ġie mħabbar ukoll li għal din is-sena l-kunsilli reġjonali ġew iffinanzjati ftit aktar minn €2 miljun, hekk kif kien imwiegħed fil-miżuri elettorali. Dan sabiex fil-lokalitajiet tagħna jiġu introdotti latrini pubbliċi b'sistemi ta' tindif awtomatiċi bl-użu tal-aħħar teknoloġija disponibbli. Ser tiġi mġedda wkoll l-iskema finanzjarja tar-Reġjun Kulturali għas-sena 2024, b'finanzjament ta' €250,000. L-impjiegi tal-ħaddiema taħt l-iskema Community Inclusive Employment Scheme ser jiġu mġedda b'finanzjament ta' madwar €350,000.

Min-naħa tiegħu, id-Direttur Ġenerali tad-Diviżjoni tal-Gvern Lokali Natalino Attard qal li “permezz ta' dawn l-iskemi l-kunsilli lokali qed jagħtu mhux biss servizz addizzjonali, iżda qed jirnexxielhom isostnu drawwiet u tradizzjonijiet, u kif ukoll jieħdu inizjattivi favur il-benesseri tar-residenti tagħhom."

Għall-konferenza tal-aħbarijiet kien hemm preżenti wkoll id-Direttur għall-Implimentazzjoni tal-Istrateġija u l-Politika fi ħdan id-Diviżjoni tal-Gvern Lokali u diversi presidenti tal-kunsilli reġjonali, sindki u segretarji eżekuttivi.

STQARRIJA MIS-SEGRETARJAT PARLAMENTARI GĦALL-GVERN LOKALI Imħabbra skemi għall-kunsilli lokali għal proġetti u inizjattivi fil-qalba tal-komunitajiet
STQARRIJA MIS-SEGRETARJAT PARLAMENTARI GĦALL-GVERN LOKALI Imħabbra skemi għall-kunsilli lokali għal proġetti u inizjattivi fil-qalba tal-komunitajiet
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra jisħaq fuq il-vulnerabbiltajiet klimatiċi ta’ Malta u r-rwol tal-parlamenti waqt laqgħa parlamentari tal-IPU marbuta mal-COP31 fit-Turkija

PR261942

STQARRIJA MILL-UFFIĊĊJU TAL-ISPEAKER L-Ispeaker tal-Kamra jisħaq fuq il-vu...

More Press Releases Right arrow