Left arrow Go Back

STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Qed tinbena mill-ġdid Triq tas-Sejba fl-Imqabba: triq kruċjali għall-konnettività bejn tlett irħula

PR230318
Date Icon 02/03/2023

Għaddejjin xogħlijiet minn Infrastructure Malta fi Triq tas-Sejba fl-Imqabba wara li sofriet ħsarat estensivi. Din it-triq kienet qed tintuża bħala rotta ta' devjazzjoni minħabba x-xogħlijiet li għaddejjin biswit l-ajruport u hija waħda kruċjali għall-konnettività, b'mod partikolari għar-residenti tal-Imqabba, il-Qrendi u s-Siġġiewi. Permezz ta' investiment ta' €1.5 miljun, l-aġenzija qed tibni struttura indipendenti għal din it-triq b'pedamenti msaħħa.

Ġie spjegat li t-triq innifisha kienet f'riskju li tiġġarraf u għaldaqstant, fid-dawl ta' dan id-dannu għas-sigurtà pubblika, Infrastructure Malta llimitat l-aċċess għall-vetturi f'din iż-żona u bdiet ix-xogħlijiet meħtieġa ta' konsolidazzjoni u rikostruzzjoni tat-triq immedjatament.

Waqt żjara li għamel f'din it-triq flimkien mal-Kap Eżekuttiv ta' Infrastructure Malta Ivan Falzon, il-Ministru għat-Trasport, l-Infrastruttura u l-Proġetti Kapitali Aaron Farrugia enfasizza li s-sigurtà tar-residenti u dawk li jaħdmu fil-garaxxijiet f'din it-triq, kien ta' prijorità assoluta.

“Numru ta' residenti u ħaddiema fl-inħawi qalulna kif din it-triq ġarrbet numru ta' ħsarat matul is-snin iżda dejjem sar xogħol temporanju fuq l-istess ħsara. Kien għalhekk li ttieħdet id-deċiżjoni li din id-darba x-xogħol li jsir ikun wieħed li jieħu aktar fit-tul iżda jservi ferm aktar. B'hekk mhux qed noffru biss serħan il-moħħ lil kull min juża t-triq, iżda wkoll qed nintervjenu issa għall-futur," stqarr il-Ministru Farrugia.

Fl-aħħar ta' Diċembru tas-sena li għaddiet, il-kuntrattur tal-aġenzija beda t-testijiet ġeotekniċi preparatorji fuq il-post qabel ma jkunu jistgħu jibdew ix-xogħlijiet strutturali meħtieġa. Dawn it-testijiet ikkonfermaw li t-triq kienet mibnija fuq sisien dgħajfa. Immedjatament wara, beda il-proċess tat-tħaffir biex jitpoġġew strutturi tal-konkos fil-forma ta' kolonni.

Il-pedamenti ġodda tat-triq, se jkunu magħmula minn 49 kolonna tal-konkrit rinforzat bl-azzar li jvarjaw minn 8.5 metri (3 sulari) sa 40 metru (12-il sular) fit-tul. Sa issa tpoġġew 60% ta' dawn il-kolonni f'posthom. Dawn il-kolonni se jkunu miksija bl-azzar biex ikun żgurat pedament aktar b'saħħtu għal din it-triq. Xogħlijiet oħra f'dan il-proġett jinkludu konnessjonijiet tad-drenaġġ, tat-telekomunikazzjoni u tal-elettriku mill-ġdid, qabel it-tqegħid ta' wiċċ ġdid tal-asfalt.

Infrastructure Malta qed tippjana li tlesti x-xogħlijiet fit-tieni kwart ta' din is-sena.

STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Qed tinbena mill-ġdid Triq tas-Sejba fl-Imqabba: triq kruċjali għall-konnettività bejn tlett irħula
STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Qed tinbena mill-ġdid Triq tas-Sejba fl-Imqabba: triq kruċjali għall-konnettività bejn tlett irħula
STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Qed tinbena mill-ġdid Triq tas-Sejba fl-Imqabba: triq kruċjali għall-konnettività bejn tlett irħula
Share this Press Release Icon socials Icon socials Icon socials Icon socials

Other Press Releases:

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA  Id-Dipartiment tar-Radjoloġija f’San Vinċenz mistenni jaqbeż l-20,000 eżami fl-2026

PR261943

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

More Press Releases Right arrow