Left arrow Go Back

STQARRIJA MILL-MINISTERU GĦALL-WIRT NAZZJONALI, L-ARTI U L-GVERN LOKALI Jitnieda l-Karnival 2023

pr230218
Date Icon 09/02/2023

Il-Ministru għall-Wirt Nazzjonali, l-Arti u l-Gvern Lokali Owen Bonnici ħabbar li wara sentejn ta’ edizzjonijiet ridotti, din is-sena l-Karnival ta’ Malta ser jirritorna fil-format oriġinali tiegħu bejn is-17 u l-21 ta’ Frar 2023.

Waqt konferenza tal-aħbarijiet, li matulha ngħataw dettalji tal-Karnival 2023, il-Ministru Bonnici sostna li l-Karnival huwa wieħed mill-iżjed appuntamenti importanti fil-kalendarju kulturali Malti, u għalhekk il-Gvern hu kommess li jkompli jinvesti fih.

“Dan ma jingħadx bil-kliem biss iżda nuruh bil-fatti wkoll permezz tal-investiment ta’ €1.2 miljun fi tractors u trailers biex jintużaw mill-karristi fil-Karnival ta’ Malta,” qal il-Ministru Bonnici, filwaqt li sostna li l-Karnival ta’ Malta huwa s-suċċess li hu għaliex fih hemm ħafna artisti b’talent kbir li jagħtu ħinhom għal dan l-avveniment tant maħbub mal-familji Maltin u Għawdxin u t-turisti li jżuruna.

Iċ-Chairman ta’ Festivals Malta Aaron Zahra qal li, “Il-livell tal-Karnival ta’ Malta diġà huwa wieħed għoli imma permezz tal-investimenti li Festivals Malta qed jagħmel f’dan il-festival, persważ li ser inkomplu ngħolluh. Din is-sena ser norganizzaw Karnival li jħares il-miżuri ambjentali, Karnival sostenibbli, u Karnival li jagħti importanza massima lis-saħħa u s-sigurtà tal-parteċipanti u lill-udjenza numeruża li tattendi bi ħġarha għal dan il-festival.”

Is-Sur Zahra tenna li, wara nuqqas ta’ sentejn milli jiġi ċċelebrat b’mod normali, l-aspettattiva u l-istennija għall-Karnival ta’ din is-sena hija waħda kbira. Huwa ħeġġeġ lill-pubbliku sabiex jattendi bi ħġaru għall-attivitajiet li hemm imħejjija għall-Karnival ta’ din is-sena, li se jkun wieħed mill-akbar Karnivali li qatt ġew organizzati.

Id-direttur artistiku tal-Karnival, Jason Busuttil, tkellem dwar il-programm estensiv ta’ din is-sena. “Dan il-programm ma setax ikun possibbli mingħajr id-dedikazzjoni kbira ta’ kull min jaħdem fuq dan il-festival minn wara l-kwinti, speċjalment il-parteċipanti li jinvestu tant ħin fil-kreazzjonijiet tagħhom. Ta’ kull sena l-parteċipanti jgħollu l-livell tal-karrijiet, taż-żfin u l-kostumi li jipproduċu, però din is-sena l-livell huwa wieħed impekkabbli,” qal is-Sur Busuttil.

Annabelle Stivala, il-Kap Eżekuttiv ta’ Festivals Malta, qalet li l-Karnival ta’ Malta huwa wieħed mill-akbar u l-eqdem festivals li jorganizza Festivals Malta, b’hekk l-aġenzija ser tkompli taħdem biex dan jibqa’ jiżviluppa maż-żminijiet filwaqt li jżomm qrib it-tradizzjonijiet tiegħu.

“Il-Karnival ta’ Malta huwa uniku ħafna, partikolarment minħabba t-tradizzjonijiet, il-karrijiet spettakolari, u l-kostumi elaborati, tant li jattira ħafna turiżmu matul staġun normalment kwiet. Festivals Malta se jkompli jaħdem id f’id mal-parteċipanti biex inkomplu nissuperaw l-aspettattivi, filwaqt li nkunu ta’ eżempju f’dak li għandu x’jaqsam mas-sigurtà u s-sostenibbiltà,” qalet is-Sinjura Stivala.

Din is-sena Festivals Malta ser ikun qed jintroduċi miżuri ġodda għall-ġbir tal-iskart permezz ta’ kontenituri apposta waqt il-Karnival ta’ Malta, kif diġà sar waqt in-Notte Bianca. Din l-inizjattiva qiegħda ssir biex l-iskart li jiġi ġġenerat mill-festival jiġi miġbur u separat b’mod responsabbli sabiex il-festival ikun iktar sostenibbli.

Għall-programm uffiċjali tal-Karnival, idħol fuq http://www.festivals.mt/karnival.

STQARRIJA MILL-MINISTERU GĦALL-WIRT NAZZJONALI, L-ARTI U L-GVERN LOKALI Jitnieda l-Karnival 2023
Share this Press Release Icon socials Icon socials Icon socials Icon socials

Other Press Releases:

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA  Id-Dipartiment tar-Radjoloġija f’San Vinċenz mistenni jaqbeż l-20,000 eżami fl-2026

PR261943

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

More Press Releases Right arrow