STQARRIJA MILL-UFFIĊĊJU NAZZJONALI TAL-VERIFIKA Information Technology Audit: Online Malta Census of Population and Housing 2021
L-Awditur Ġenerali, is-Sur Charles Deguara, illum ippreżenta lill-Ispeaker tal-Kamra tad-Deputati r-rapport tal-Uffiċċju Nazzjonali tal-Verifika (NAO) dwar it-Teknoloġija tal-Informatika bl-isem “Online Malta Census of Population and Housing 2021". Essenzjalment ir-Rapport fittex li janalizza l-komponent online tal-istħarriġ nazzjonali. Dan kien jinkludi l-evalwazzjoni tal-fażijiet tal-ippjanar u l-implimentazzjoni taċ-Ċensiment, inkluż il-ġbir tad-dejta, l-integrità u s-sigurtà tad-dejta, l-isfidi teknoloġiċi, u l-ispejjeż ta' dan il-proġett.
Fost is-sejbiet u r-rakkomandazzjonijiet ewlenin li saru mill-NAO f'dan ir-rapport tal-awditjar, hemm referenza għal dan li ġej:
Ir-rata ta' sottomissjoni tat-tweġibiet għall-kwestjonarju taċ-Ċensiment kienet ta' 56% tat-total ta' dawk li wieġbu. Dan kien ikkunsidrat mill-NAO bħala wieħed mill-fatturi ta' suċċess ta' dan l-eżerċizzju. Tabilħaqq, din ir-rata ta' sottomissjoni online taqbeż dik miksuba minn pajjiżi oħra fl-ewwel tentattiv tagħhom li jniedu sottomissjonijiet online u tqabbel sew ma' dik miksuba mill-istess pajjiżi f'tentattivi sussegwenti.
L-NAO rrakkomanda bil-qawwa li l-NSO jkompli fl-isforzi tiegħu biex jintroduċi l-użu ta' reġistri amministrattivi għall-ġbir tad-dejta taċ-Ċensiment aktar milli joħroġ kwestjonarji biex jimtlew mill-parteċipanti taċ-Ċensiment. L-NAO kkummenta wkoll li mossa bħal din tista' tiġi kkunsidrata biss ladarba jiġi żgurat li l-format u l-kwalità tad-dejta fir-reġistri amministrattivi jaqbel ma' dak meħtieġ għaċ-Ċensiment. Il-benefiċċji antiċipati tal-implimentazzjoni ta' mossa bħal din ikunu l-iffrankar fl-ispejjeż tar-riżorsi u aktar faċilità ta' aċċess għad-dejta meħtieġa.
Barra minn hekk, l-NAO rrakkomanda li jitwaqqaf kumitat inter-ministerjali biex jissorvelja l-bidla msemmija hawn fuq lejn l-implimentazzjoni ta' Ċensiment ibbażat fuq reġistru u reġistru tal-popolazzjoni. Il-kumitat ikun inkarigat li jiżgura li:
• il-bidliet kollha meħtieġa relatati mal-leġiżlazzjoni, ir-reġistri tad-dejta attwali u s-sistemi tal-IT relatati jiġu identifikati, dokumentati u implimentati
• l-isforzi tal-partijiet interessati ewlenin li jipprovdu s-sorsi tad-dejta meħtieġa biex jinbena r-reġistru tal-popolazzjoni huma kkoordinati tajjeb.
Dan ir-Rapport huwa aċċessibbli mill-websajt tal-Uffiċċju Nazzjonali tal-Verifika www.nao.gov.mt jew mill-paġna ta' Facebook www.facebook.com/NAOMalta.
Other Press Releases:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946