Left arrow Go Back

STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tkompli tippromwovi l-paċi

pr220542
Date Icon 02/05/2022

“Malta kienet, għadha u se tibqa’ tippromwovi l-paċi biex kemm jista’ jkun malajr naraw li jintemm il-kunflitt bejn ir-Russja u l-Ukrajna”, saħaq il-Ministru għall-Affarijiet Barranin u Ewropej u l-Kummerċ Ian Borg waqt laqgħa bilaterali mal-Ministru Federali għall-Unjoni Ewropea u l-Kostituzzjoni tar-Repubblika tal-Awstrija, Karoline Edtstadler.

Matul il-laqgħa kienu diskussi bosta suġġetti ta’ interess għaż-żewġ pajjiżi. Min-naħa tiegħu, il-Ministru Ian Borg tkellem rigward l-aħħar żviluppi fil-kunflitt tal-Ukrajna u spjega li Malta temmen li hemm bżonn ta’ aktar żviluppi diplomatiċi milli sforzi militari. Għal darb’oħra, reġa’ esprima s-solidarjetà ta’ Malta mal-Ukrajna u qal li pajjiżna se jkun qed ikompli jadotta s-sanzjonijiet maqbula fuq livell ta’ Unjoni Ewropea.

Dr Borg tkellem ukoll dwar is-suġġett tal-migrazzjoni mal-Ministru Edstadler. Huwa tenna li Malta se tkun qed tibqa’ tmexxi ’l quddiem il-pożizzjoni tagħha u talab lill-Awstrija biex anke fuq fora internazzjonali jkunu solidali ma’ pajjiżna u jappoġġaw mekkaniżmi differenti ta’ rilokazzjoni.

Il-Ministru Borg tkellem ukoll dwar il-kandidatura ta’ Malta għal siġġu mhux permanenti fil-Kunsill tas-Sigurtà tan-Nazzjonijiet Magħquda li se tkun qed tiffoka fuq tliet temi prinċipali: is-Sigurtà, is-Sostenibbiltà u s-Solidarjetà.

Il-Ministru Karoline Edtstadler sostniet li huwa ta’ pjaċir għaliha li ttemm it-‘Tour de Capital’ tagħha f’pajjiżna b’din iż-żjara uffiċjali. Hija awgurat kull suċċess lill-Ministru Borg fil-kariga l-ġdida tiegħu u saħqet li Malta u l-Awstrija għandhom ħafna in komuni u b’hekk temmen li hemm lok biex iż-żewġ pajjiżi jintensifikaw il-ħidma bilaterali tagħhom flimkien f’bosta oqsma.

Saħqet li Malta u l-Awstrija lkoll iħaddnu l-prinċipju tan-newtralità fil-kostituzzjoni tagħhom u se jaraw li jkomplu jaħdmu favur aktar kollaborazzjoni u tisħiħ ta’ dan il-prinċipju, aktar minn qatt qabel. Il-Ministru Borg u l-Ministru Edstadler qablu li għandu jkun hemm aktar inizjattivi sabiex in-newtralità tal-pajjiżi tkompli tissaħħaħ.

STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tkompli tippromwovi l-paċi
STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tkompli tippromwovi l-paċi
STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tkompli tippromwovi l-paċi
STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tkompli tippromwovi l-paċi
Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Ċertifikazzjoni internazzjonali tal-ogħla livell għad-dipartiment tar-radjoterapija fiċ-Ċentru tal-Onkoloġija Sir Anthony Mamo

PR261947

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...

STQARRIJA MILL-MINISTERU GĦALL-EDUKAZZJONI U L-ISPORT  Aktar minn 1,800 student jiggradwaw mill-Università ta’ Malta

PR261946

STQARRIJA MILL-MINISTERU GĦALL-EDUKAZZJONI U L-ISPORT Aktar minn 1,800 stu...

More Press Releases Right arrow