Left arrow Go Back

STQARRIJA MILL-MINISTERU GĦAT-TURIŻMU 31 ristorant lokali rikonoxxuti fil-Michelin Guide

pr220481
Date Icon 20/04/2022

31 ristorant lokali ġew rikonoxxuti mill-Michelin Guide li ta’ kull sena tirrikonoxxi l-kwalità u l-ħiliet kulinari ta’ wħud mill-aqwa ristoranti fid-dinja, inkluż dawk li jinsabu fil-Gżejjer Maltin. 

Fuq bażi anonima, spetturi ta’ din id-ditta mondjali ġew f’pajjiżna biex jaraw ir-rendiment tas-settur gastronomiku ta’ pajjiżna. 

Għal din is-sena, jispikkaw il-ħames ristoranti li kisbu t-titlu prestiġjuż ta’ “One-MICHELIN Star Status” li huma Under Grain, Noni, ION-The Harbour, De Mondion u Bahia, kif ukoll ir-ristoranti taħt il-kategorija ta’ “Bib Gourmand”: Grain Street, Terrone, Rubino u Commando. 

Dawn id-dettalji tħabbru waqt il-preżentazzjoni uffiċjali ta’ dawn il-premijiet mill-Ministru għat-Turiżmu Clayton Bartolo fil-preżenza taċ-Chairman tal-Awtorità Maltija għat-Turiżmu Gavin Gulia. 

Il-Ministru għat-Turiżmu Clayton Bartolo saħaq dwar kif il-mixja tal-Michelin Guide f’Malta hija turija ċara ta’ kemm Malta bħala destinazzjoni għandha għal qalbha l-kwalità u t-turiżmu sostenibbli. 

“Dawn ir-ristoranti għarfu l-importanza li jkunu minn ta’ quddiem biex jissodisfaw l-aktar klijenti esiġenti. Tajjeb ninnotaw li pajjiżna minkejja ċ-ċokon tiegħu rnexxielu jkollu livell ta’ ristoranti li huma rikonoxxuti mill-Michelin Guide”, kompla jgħid il-Ministru Clayton Bartolo. 

Huwa tkellem ukoll dwar kif il-viżjoni tal-gvern għall-industrija tat-turiżmu hija li Malta tkun destinazzjoni ta’ kwalità li toffri esperjenzi differenti għal dawk li jżuruna, ewlenija fosthom l-esperjenza gastronomika. 

“Ir-ristorantiera huma ambaxxaturi ta’ “prodott Malta”. Għalhekk, jeħtieġ li biex niksbu turiżmu f’din in-niċċa partikolari, l-gvern u l-industrija jkomplu jaħdmu id f’id biex isem Malta dejjem ikun ippożizzjonat ‘il fuq, fuq il-mappa turistika”, temm jgħid il-Ministru għat-Turiżmu Clayton Bartolo. 

Min-naħa tiegħu, iċ-Chairman tal-Awtorità Maltija għat-Turiżmu Gavin Gulia esprima s-sodisfazzjon tiegħu għall-mod kif kull ma jmur, il-preżenza ta’ ristoranti lokali fil-Michelin Guide qiegħda tiżdied. 

“Bħala awtorità ninsabu pożittivi meta tqis li l-ammont ta’ ristoranti li jissemmew fil-Michelin Guide qiegħed dejjem jiżdied. Dan jipprometti tajjeb għal dak li hu l-għan aħħari tagħna, li l-Gżejjer Maltin isiru destinazzjoni tal-aqwa kwalità għal kull min jagħżel li jżur lil pajjiżna għall-vakanza tiegħu”, temm jgħid is-Sur Gavin Gulia.

STQARRIJA MILL-MINISTERU GĦAT-TURIŻMU 31 ristorant lokali rikonoxxuti fil-Michelin Guide
STQARRIJA MILL-MINISTERU GĦAT-TURIŻMU 31 ristorant lokali rikonoxxuti fil-Michelin Guide
STQARRIJA MILL-MINISTERU GĦAT-TURIŻMU 31 ristorant lokali rikonoxxuti fil-Michelin Guide
Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Ċertifikazzjoni internazzjonali tal-ogħla livell għad-dipartiment tar-radjoterapija fiċ-Ċentru tal-Onkoloġija Sir Anthony Mamo

PR261947

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...

STQARRIJA MILL-MINISTERU GĦALL-EDUKAZZJONI U L-ISPORT  Aktar minn 1,800 student jiggradwaw mill-Università ta’ Malta

PR261946

STQARRIJA MILL-MINISTERU GĦALL-EDUKAZZJONI U L-ISPORT Aktar minn 1,800 stu...

More Press Releases Right arrow