Left arrow Go Back

STQARRIJA MILL-MINISTERU GĦALL-AFFARIJIET BARRANIN U EWROPEJ: Malta tniedi l-Istrateġija tal-Politika Barranija

pr220180
Date Icon 09/02/2022

Malta nediet id-Dokument ta’ Strateġija tal-Politika Barranija tagħha, li jirrifletti s-suġġerimenti u l-kummenti, wara li aktar qabel kien tnieda dokument għall-konsultazzjoni pubblika fl-10 ta’ Novembru 2021. Il-politika l-ġdida hija maħsuba biex taqdi lin-nazzjon u liċ-ċittadini tiegħu, ikunu fejn ikunu.

Il-politika barranija hija maħsuba li tiżgura u tiżviluppa relazzjonijiet bilaterali u multilaterali ta’ benefiċċju u paċifiċi mal-ġirien tagħna fl-Ewropa, fil-Mediterran u fl-Afrika, u mal-akbar numru possibbli ta’ pajjiżi li jikkontribwixxu għall-benefiċċju ġenerali taċ-ċittadini Maltin. Il-politika barranija ta’ Malta sservi wkoll biex iżżid il-prosperità u ttejjeb l-għajxien taċ-ċittadini tagħha. Flimkien ma’ partijiet interessati oħrajn, politika barranija effettiva tattira l-investiment u żżid il-kummerċ, u tappoġġja l-isforzi tan-negozji Maltin fis-swieq barranin, bl-għan li jiżdiedu l-ġid, il-prosperità u l-intrapriża f’Malta, b’investiment f’pajjiżna u lil hinn minnu.

Il-valuri tan-newtralità minquxa fil-Kostituzzjoni ta’ Malta u s-sħubija tagħha fl-Unjoni Ewropea, li t-tnejn kienu tqiesu kontroversjali waqt l-introduzzjoni tagħhom, issa huma meqjusa bħala integrali għall-pożizzjonament ta’ Malta fuq il-front internazzjonali.

Il-Ministru għall-Affarijiet Barranin u Ewropew Evarist Bartolo qal li l-politika barranija ta’ Malta għandha taqdi l-interessi tal-pajjiż u taċ-ċittadini tiegħu, filwaqt li tippromwovi l-valuri, it-twemmin u l-identità tagħna. Biex nagħmlu dan, jeħtieġ li nkomplu ninvestu f’relazzjonijiet bilaterali u multilaterali b’saħħithom mar-reġjuni kollha tad-dinja, fi spirtu ta’ kollaborazzjoni għall-integrità, il-prosperità u l-istabbilità.

Il-Ministru Bartolo rrimarka li l-viċinat immedjat tagħna għandu jkun prijorità. Peress li gżira-stat tal-Mediterran, qal il-Ministru Bartolo, aħna mdawrin b’baħar li jista’ jifred, iżda li jista’ wkoll jgħaqqad. Ir-reġjun għaddej minn perjodu ta’ instabbilità, u t-tagħlim biex ngħixu flimkien – il-ħolqien ta’ għaqda mid-diversità tagħna – jista’ jkun l-akbar sfida taż-żminijiet li ġejjin. Malta tfittex li tkompli taqdi rwol importanti fil-bini tal-paċi u li tħeġġeġ id-djalogu, bħala sieħeb newtrali u affidabbli.

L-istatistiku Dr Vincent Marmara spjega l-eżiti ta’ stħarriġ li sar dwar il-perċezzjonijiet taċ-ċittadini Maltin dwar diversi elementi tal-Politika Barranija ta’ Malta, bħar-rwol ta’ Malta fil-politika globali, fl-UE u fil-Mediterran; in-newtralità ta’ Malta; relazzjonijiet bilaterali ma’ diversi pajjiżi; Maltin li jgħixu barra; u kwistjonijiet oħrajn. Dan l-istħarriġ ġie kkummissjonat mill-MFEA, u huwa essenzjali biex wieħed jifhem aħjar il-fehmiet u l-perċezzjonijiet taċ-ċittadini Maltin, flimkien mal-aspettattivi tagħhom mill-Politika Barranija u Ewropea ta’ Malta.

Is-Sur Christopher Cutajar, Segretarju Permanenti fil-Ministeru għall-Affarijiet Barranin u Ewropej, qal li din il-politika tfassal il-mod kif Malta, bħala stat sovran, tkompli tiddetermina postha fid-dinja. Din il-politika mhix biss tentattiv biex titfassal strateġija waħedha, iżda tikkuntestwalizza l-eko-sistema li fiha jrid jopera l-pajjiż, ankrata sew f’sett ta’ valuri li jagħmlu minn Malta stat nazzjon konsistenti u kredibbli.

STQARRIJA MILL-MINISTERU GĦALL-AFFARIJIET BARRANIN U EWROPEJ: Malta tniedi l-Istrateġija tal-Politika Barranija
STQARRIJA MILL-MINISTERU GĦALL-AFFARIJIET BARRANIN U EWROPEJ: Malta tniedi l-Istrateġija tal-Politika Barranija
STQARRIJA MILL-MINISTERU GĦALL-AFFARIJIET BARRANIN U EWROPEJ: Malta tniedi l-Istrateġija tal-Politika Barranija
Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow