Left arrow Go Back

STQARRIJA MILL-MINISTERU GĦAS-SOLIDARJETÀ U L-ĠUSTIZZJA SOĊJALI, IL-FAMILJA U D-DRITTIJIET TAT-TFAL Aktar miżuri soċjali jidħlu fis-seħħ fi Frar

pr220154
Date Icon 04/02/2022

Għat-tieni sena konsekuttiva, se tidħol fis-seħħ il-miżura biex jitjiebu d-dħul u l-għajxien ta’ persuni li għalkemm kellhom mill-anqas 10 snin bolol, ma kinux qed jikkwalifikaw għall-pensjoni. Din il-miżura tolqot l-aktar lin-nisa miżżewġa, li jekk ħallsu mill-anqas 10 snin bolol, anke jekk hemm minnhom qabel l-età ta’ 19-il sena jew jekk ma ħallsux bolol wara Jannar tal-1979, qed jingħataw id-dritt li jikkwalifikaw għall-minimu ridott tal-pensjoni taż-żewġ terzi.

Il-proċess biex dan iseħħ mistenni jintemm sa Marzu. B’kollox, fuq sentejn, madwar 2,000 persuna se jkunu gawdew minn din il-miżura u qed jirċievu pensjoni għall-ewwel darba ta’ madwar €50 fil-ġimgħa. Il-Ministru Michael Falzon qal li fi tmiem din il-ġimgħa se tkun implimentata din il-miżura li verament turi l-qalb soċjali ta’ dan il-gvern u l-viżjoni li għandu biex jagħti aktar għajnuna lil dawk l-aktar fil-bżonn.   

Dawn id-dettalji tħabbru f’konferenza tal-aħbarijiet mill-Ministru għas-Solidarjetà u l-Ġustizzja Soċjali, il-Familja u d-Drittijiet tat-Tfal, Michael Falzon, u mis-Segretarju Permanenti, Mark Musù. Waqt il-konferenza ngħataw iktar dettalji dwar benefiċċji oħra li se jingħataw fix-xahar ta’ Frar. Se tkun implimentata l-għotja li jirċevuha persuni fl-età ta’ 75 sena u aktar li jgħixu fi djarhom jew mal-qraba. Mill-2020, bdiet tingħata wkoll lil dawk l-anzjani li jħallsu minn buthom biex jgħixu fi djar privati tal-anzjani. 

Dawk fl-età ta’ bejn 75 u 79 sena jieħdu għotja ta’ €300 fis-sena, u fl-istess waqt jekk ikunu intitolati, jitħallsu l-bonus għal min ma jikkwalifikax għal pensjoni kontributorja. L-għotja għall-benefiċjarji ta’ 80 sena u aktar żdiedet għal darba oħra b’€50 għal €400 fis-sena.

Is-Segretarju Permanenti Mark Musù qal li l-pensjonanti romol se jitħallsu żidiet oħra dovuti bis-saħħa ta’ miżura li daħlet fis-seħħ din is-sena biex fuq medda ta’ snin, il-pensjoni tagħhom gradwalment tiżdied sakemm tilħaq il-pensjoni sħiha tal-konjuġi tagħhom. Madwar 12,000 pensjonanti romol se jibbenefikaw minn titjib fir-rati tal-pensjoni sa madwar €5 fil-ġimgħa.

B’hekk, flimkien maż-żieda normali fil-pensjoni tagħhom li diġà bdew jirċievu, iż-żieda globali tagħhom tista’ titla’ b’kollox sa madwar €10 fil-ġimgħa jew €520 fis-sena. In-nefqa fuq din il-miżura se tilħaq aktar minn €3 miljun.

Intant, bis-saħħa ta’ żewġ miżuri oħra, aktar minn 3,200 pensjonant tas-servizz se jibdew igawdu minn żidiet fil-pensjoni tas-sigurtà soċjali tagħhom. Il-Carer’s Grant se tiżdied b’€200 u se titla’ għal €500 fis-sena. Din l-għotja titħallas lil dawk il-ġenituri li jkollhom jibqgħu d-dar biex jikkuraw ulied adulti b’diżabilità severa. Persuni li jirċievu l-Pensjoni għal Korriment fuq Xogħol mhux se jkollhom aktar tnaqqis minn benefiċċji kontributorji oħra li jistgħu japplikaw għalihom. 

“Permezz tal-implimentazzjoni ta’ dawn il-miżuri sal-aħħar ta’ Frar, se jkunu implimentati diġà 71.4% tal-miżuri soċjali tal-Baġit 2022. Din hi xhieda ċara ta’ kemm dan il-gvern qed jaħdem fil-qasam soċjali u li ma jieqaf qatt jindirizza każijiet li jeħtieġu għajnuna u mbuttatura ’l quddiem”, ikkonkluda l-Ministru Michael Falzon. 

STQARRIJA MILL-MINISTERU GĦAS-SOLIDARJETÀ U L-ĠUSTIZZJA SOĊJALI, IL-FAMILJA U D-DRITTIJIET TAT-TFAL Aktar miżuri soċjali jidħlu fis-seħħ fi Frar
STQARRIJA MILL-MINISTERU GĦAS-SOLIDARJETÀ U L-ĠUSTIZZJA SOĊJALI, IL-FAMILJA U D-DRITTIJIET TAT-TFAL Aktar miżuri soċjali jidħlu fis-seħħ fi Frar
Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow