Left arrow Go Back

STQARRIJA MILL-MINISTERU GĦALL-FINANZI U X-XOGĦOL: Jidħlu fis-seħħ sensiela ta’ miżuri mħabbra fil-Budget 2022

pr220092
Date Icon 24/01/2022

’Il fuq minn €56 miljun f’żidiet lill-pensjonanti, lill-ħaddiema u lill-istudenti

95,000 pensjonant, 53,000 ħaddiem u 15,000 student bejniethom bdew igawdu minn żieda ta’ iktar minn €56 miljun f’miżuri mħabbra fil-Budget 2022, qal il-Ministru għall-Finanzi u x-Xogħol Clyde Caruana waqt konferenza tal-aħbarijiet, li matulha ta ħarsa lejn il-miżuri tal-budget li daħlu fis-seħħ mill-ewwel ta’ Jannar ta’ din is-sena.

Il-Ministru Caruana qal li, “Dawn iż-żidiet, li jammontaw għal xejn inqas minn €56 miljun, se jkunu qed imorru dirett fil-bwiet tal-familji Maltin u Għawdxin. L-għaqal fit-tmexxija ta’ dan il-gvern wassal sabiex l-ekonomija ta’ pajjiżna tkompli tikber u tkun sostnuta waqt ix-xhur tal-pandemija. Il-gvern irnexxielu jżomm l-istruttura tal-ekonomija tkompli għaddejja u b’hekk konna f’pożizzjoni li għal din is-sena nqassmu dawn iż-żidiet. Inħares ’il quddiem sabiex permezz tal-miżuri li qed indaħħlu fis-seħħ, l-ekonomija Maltija tibqa’ fuq sisien sodi biex dak li għamilna din is-sena ma jkunx ta’ darba iżda jiġi repetut f’kull budget”. 

Il-Ministru Caruana spjega li dawk il-ħaddiema kollha li jaħdmu sigħat ta’ overtime, li l-paga bażika tagħhom ma teċċedix l-€20,000 fis-sena u li m’għandhomx pożizzjoni maniġerjali, bdew jiġu ntaxxati b’rata ta’ 15%  fuq l-ewwel €10,000 tad-dħul tagħhom mill-overtime. Din il-miżura qed igawdu minnha ’l fuq minn 30,000 ħaddiem u se tħalli madwar €6 miljun fil-bwiet tal-familji Maltin u Għawdxin. 

Barra minn hekk, dawk il-ħaddiema kollha, li jinkludu anke self-employed, li jaħdmu impjieg part-time, bdew jiġu ntaxxati b’rata fuq id-dħul ta’ 10% minflok 15%. B’din il-miżura, il-gvern se jkun qed jagħti lura lill-ħaddiema €5 miljun fi tnaqqis tat-taxxa fuq id-dħul. Madwar 23,000 ħaddiem qed jibbenefikaw minn din il-miżura. 

Il-Ministru Caruana spjega wkoll li dawk il-ġenturi li jaħdmu, li għandhom tfal taħt it-23 sena u li jibbenefikaw mill-In-Work Benefit, bdew igawdu wkoll minn titjib f’din l-iskema.

- Koppji li jaħdmu t-tnejn, il-limitu tad-dħul tela’ minn €35,000 għal €50,000 fis-sena

- Koppji fejn wieħed mill-ġenituri jaħdem, il-limitu tad-dħul tela’ minn €26,000 għal €35,000 fis-sena 

- Ġenituri waħidhom li jaħdmu, il-limitu tad-dħul tela’ minn €23,000 għal €35,000.

Ir-rati minimi l-ġodda għal madwar 7,000 familja li se jibdew jibbenefikaw mit-twessigħ tal-limiti ta’ din l-iskema huwa ta’ €200 fis-sena, filwaqt li r-rati kollha li kienu eżistenti żdiedu b’€100 fis-sena għal kull wild. B’hekk il-gvern se jkun qed jagħti €2 miljun f’żieda lil dawn il-familji għal nefqa totali ta’ €12.5 miljun fis-sena.

Mill-ewwel ta’ Jannar ukoll, il-pensjonanti kollha li jirċievu pensjoni tal-irtirar, tar-romol, tal-invalidità u pensjoni mhux kontributorja tal-età, bdew jibbenefikaw minn żieda ta’ €24 miljun. Barra minn hekk, bdiet tingħata wkoll żieda lil dawk kollha li jirċievu l-għajnuna supplimentari u l-pensjoni tas-servizz, filwaqt li r-romol se jsirilhom aġġustament tal-pensjoni b’mod gradwali. Il-bonus għall-għoli tal-ħajja lill-pensjonanti se jibda jingħata sħiħ ukoll għal dawk kollha li rtiraw wara l-2008. B’hekk, iż-żieda totali fuq dawn il-miżuri lill-pensjonanti taqbeż it-€38 miljun.   

Il-Ministru Caruana spjega wkoll li mill-bidu tas-sena, madwar 15,000 student bdew jibbenefikaw minn żieda ta’ 10% fl-istipendju tagħhom. Barra minn hekk, l-istipendju se jibqa’ jingħata wkoll lil dawk l-istudenti li jaħdmu sa massimu ta’ 25 siegħa fil-ġimgħa. B’hekk il-gvern se jkun qed jagħti lill-istudenti żieda totali ta’ €5 miljun.

STQARRIJA MILL-MINISTERU GĦALL-FINANZI U X-XOGĦOL: Jidħlu fis-seħħ sensiela ta’ miżuri mħabbra fil-Budget 2022
STQARRIJA MILL-MINISTERU GĦALL-FINANZI U X-XOGĦOL: Jidħlu fis-seħħ sensiela ta’ miżuri mħabbra fil-Budget 2022
Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow