Left arrow Go Back

​ STQARRIJA MILL-UFFIĊĊJU TAL-PRESIDENT Il-President jiltaqa’ mal-membri tal-Awtorità għall-Użu Responsabbli tal-Kannabis

pr220081
Date Icon 21/01/2022

Il-President George Vella ltaqa’ mal-membri tal-Awtorità għall-Użu Responsabbli tal-Kannabis. Għal din il-laqgħa kien ukoll preżenti l-Ministru għall-Ugwaljanza, ir-Riċerka u l-Innovazzjoni Owen Bonnici.

Il-President Vella saħaq dwar l-importanza tal-professjonalità għal min jaħdem f’dan il-qasam u esprima sodisfazzjon li l-membri tal-awtorità kollha għandhom kwalifiki, għarfien u esperjenza wiesgħa fl-oqsma tal-mediċina, tal-psikoloġija, u professjonijiet oħra marbuta mas-saħħa. Huwa ħeġġeġ lill-awtorità biex taħdem b’mod serju, awtonomu u indipendenti. Tkellem ukoll dwar il-ħtieġa li ż-żgħażagħ isibu ambjent li jixprunahom lejn attivitajiet li jsaħħuhom fiżikament u mentalment u li bl-ebda mod ma jippromwovi l-użu tal-kannabis. Il-President spjega li fil-fehma tiegħu, l-awtorità għandha tieħu rwol attiv u titkellem u żżomm djalogu kontinwu ma’ dawk li esprimew tħassib serju dwar il-liġi kkonċernata. Il-President Vella saħaq b’mod partikolari dwar il-bżonn ta’ edukazzjoni wiesgħa dwar il-perikli tat-teħid ta’ sustanzi psikotropiċi.

Il-Ministru Owen Bonnici għarraf lill-President li f’diskussjonijiet li kellu mal-membri tal-awtorità, huwa saħaq dwar l-importanza li tiġi osservata l-liġi, filwaqt li tinżamm l-awtonomija tagħha. Huwa spjega wkoll li fil-preżent għaddejjin numru ta’ laqgħat ma’ esperti barranin u li se jkunu qed ikomplu jagħtu lill-awtorità qafas b’saħħtu biex tħaddem il-liġi.

Mariella Dimech, iċ-Chairperson tal-Awtorità, spjegat li se tkun qed tisħaq li jkun hemm serjetà assoluta f’kif se topera t-tmexxija tal-assoċjazzjonijiet, li tinkludi l-liċenzjar u r-riċerka. Spjegat ukoll li diġà daħlet fi djalogu ma’ gruppi li esprimew tħassib dwar din il-liġi u li għandha l-ħsieb tkompli dawn id-diskussjonijiet. Is-Sinjura Dimech qablet li l-edukazzjoni se tkun kruċjali u li tinsab sodisfatta li l-membri tal-Bord huma kommessi jaħdmu id f’id biex jippromwovu l-ġid tas-soċjetà.

Il-President Vella rringrazzja mill-ġdid lil dawk kollha preżenti u reġa’ saħaq dwar il-bżonn li l-awtorità tadotta metodi xjentifiċi u awtonomija fl-operat tagħha. 

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow