Left arrow Go Back

STQARRIJA MILL-MINISTERU GĦALL-AGRIKOLTURA, IS-SAJD, L-IKEL U D-DRITTIJIET TAL-ANNIMALI: Kummerċ agrikolu u negozjati ma’ pajjiżi terzi

pr220077
Date Icon 20/01/2022

Il-Ministru għall-Agrikoltura, is-Sajd, l-Ikel u d-Drittijiet tal-Annimali Anton Refalo pparteċipa fil-laqgħa tal-Kunsill tal-Ministri fi Brussell, fejn ġie diskuss il-kummerċ agrikolu u n-negozjati ma’ pajjiżi terzi. Dawn id-diskussjonijiet huma ta’ benefiċċju għal katina tal-ikel aktar reżiljenti u sostenibbli. Il-Ministru Anton Refalo enfasizza li prodotti li ġejjin minn pajjiżi terzi għandhom ikunu soġġetti għall-istess kriterji u standards bħal dawk fl-Unjoni Ewropea, sabiex nissalvagwardjaw il-kompetittività tal-produtturi Għawdxin u Maltin. 

F’din l-ewwel laqgħa ministerjali, il-Presidenza Franċiża tal-Kunsill tal-Unjoni Ewropea ppreżentat il-prijoritajiet tagħha f’dan is-settur. Fost id-diskussjonijiet issemmiet ukoll is-sitwazzjoni tas-suq, li għadu qed jaffaċċja l-effetti li qed tħalli l-pandemija tal-COVID-19. L-instabbiltà fis-swieq internazzjonali tal-ikel flimkien mad-diffikultajiet fl-industrija tal-loġistika u t-trasport qed jikkawżaw firxa wiesgħa ta’ konsegwenzi għal pajjiżi żgħar bħal Malta li jiddependu fuq l-importazzjoni. Il-Ministru Anton Refalo enfasizza li ż-żieda sinifikanti fil-prezzijiet tal-ġwież tirrikjedi għajnuna diretta addizzjonali permezz ta’ pjan ħolistiku li joffri għajnuna lir-raħħala biex jilqgħu għall-inflazzjoni.

Waqt il-laqgħa ġiet diskussa wkoll il-Komunikazzjoni tal-Kummissjoni Ewropea dwar iċ-Ċikli Sostenibbli tal-Karbonju bħala mudell ta’ negozju ekoloġiku fl-agrikoltura. L-għan ta’ din il-komunikazzjoni huwa mhux biss li jiġu kkumpensati l-emissjonijiet, iżda wkoll li tiġi restawrata ħamrija degredata, tittejjeb il-produzzjoni tar-raba’ u tiżdied l-attività mikro-organika tal-ħamrija. Malta saħqet fuq il-bżonn li din il-prattika ssir aktar vijabbli u sostenibbli, filwaqt li jinħoloq bilanċ sabiex jiġu evitati diskriminazzjonijiet, inugwaljanzi u nuqqasijiet fil-bażi tal-għarfien fis-settur. 

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow