Left arrow Go Back

STQARRIJA MIS-SEGRETARJAT PARLAMENTARI GĦAĊ-ĊITTADINANZA U L-KOMUNITAJIET Malta tara influss stabbli ta' digital nomads

pr220072
Date Icon 19/01/2022

Malta, bħal pajjiżi oħra Ewropej, qed tara żieda ta' digital nomads, hekk kif ir-remote working qed isir dejjem aktar popolari fid-dawl tal-pandemija. Hekk kif min iħaddem qiegħed jirrikonoxxi l-vantaġġi, il-valur u l-produttività tar-remote working, individwi li jinteressahom jaħdmu barra minn pajjiżhom qed iħarsu lil hinn mill-fruntieri tagħhom biex jgħaqqdu x-xogħol, l-ivvjaġġar u d-divertiment f'dik li tissejjaħ workaction.

Malta għarfet din l-opportunità u f'Ġunju tal-2021 ingħaqdet ma' pajjiżi oħra tal-UE biex toffri permess ta' residenza temporanja lid-digital nomads bit-tnedija tan-Nomad Residence Permit.

F'Malta diġà teżisti komunità stabbilita ta' digital nomads li ġejjin minn pajjiżi tal-UE. Dawn l-individwi ma għandhomx bżonn permessi peress li jgawdu l-libertà ta' moviment madwar ix-Schengen. Il-permess ta' Residenza Malta issa jestendi din il-possibbiltà ta' remote working minn Malta wkoll għal ċittadini ta' pajjiżi terzi.

Sal-lum, Residenza Malta rċeviet 180 applikazzjoni, medja ta' waħda kull jum tax-xogħol. L-Aġenzija rċeviet ukoll numru kbir ta' rikjesti għal informazzjoni, li hija tittama li jissarrfu f'applikazzjonijiet fi stadju aktar tard, meta r-restrizzjonijiet tal-ivvjaġġar jittaffew u s-sitwazzjoni tal-COVID titjieb.

Il-maġġoranza tal-applikanti ġejjin mir-Renju Unit u l-Istati Uniti. L-applikanti għandhom età medja ta' 37 sena u huma fil-biċċa l-kbira rġiel. Il-maġġoranza tal-applikanti huma impjegati u jaħdmu għal rashom, segwiti minn freelancers. Is-setturi popolari huma l-IT, il-management u l-marketing, iżda setturi oħra huma rrappreżentati wkoll, bl-element komuni jkun li x-xogħol jista' jsir minn distanza.

“Bi dħul medju ta' €60,000 u applikanti li għandhom edukazzjoni terzjarja, Malta qed tattira applikanti ta' kwalità li kapaċi jikkontribwixxu għall-ekonomija lokali", qal Charles Mizzi, il-Kap Eżekuttiv ta' Residenza Malta.

“Il-gvern dejjem kien pront biex jagħraf u jifhem tendenzi globali", qal is-Segretarju Parlamentari għaċ-Ċittadinanza u l-Komunitajiet Alex Muscat. “In-nies qed iħaddnu mod ġdid ta' kif jaħdmu, u Malta riedet tieħu din l-opportunità biex tilqa' digital nomads minn pajjiżi terzi."

“Din l-inizjattiva teħtieġ sforz relattivament żgħir mill-gvern filwaqt li l-pajjiż jiggwadanja mill-istil ta' ħajja ta' dawn l-individwi meta jikru appartamenti jew jużaw AirBnBs, meta jużaw trasport pubbliku u taxis, jieklu u jixorbu, jonfqu l-flus fuq divertiment u ristoranti u jesploraw siti ta' kultura. Fl-istess ħin, il-pajjiż qed jattira ideat, ħiliet u talenti ġodda. Id-digital nomads għandhom reputazzjoni li huma wkoll intraprendituri u avventurużi filwaqt li lesti li jniedu l-ideat tagħhom fi swieq ġodda."

“L-istorja tagħna għadha qed tiżvolġi u ladarba l-pandemija tispiċċa, in-numri jistgħu biss jikbru. Fl-istess ħin qed infittxu residenti ta' kwalità. Aħna ċerti wkoll li l-applikanti rreġistrati formalment tagħna huma biss parti mill-istorja u li digital nomads f'Malta hawn ħafna aktar", kompla s-segretarju parlamentari.

Dwar in-Nomad Residence Permit

Biex ikunu eliġibbli, l-applikanti iridu ikunu individwi minn pajjiżi terzi bi dħul ta' EUR2,700 fix-xahar. Huma jridu jkunu jaħdmu għal kumpanija rreġistrata barra l-pajjiż, iwettqu attivitajiet ta' negozju għal kumpanija rreġistrata barra (eż. sieħeb jew azzjonist), jew joffru servizzi freelance jew ta' konsulenza lil klijenti barra minn Malta.

Barra minn hekk, l-applikanti għandu jkollhom dokument validu tal-ivvjaġġar u kopertura tal-assigurazzjoni tas-saħħa. Għandhom ukoll jipprovdu indirizz f'Malta u jgħaddu minn proċess ta' verifikazzjoni.

STQARRIJA MIS-SEGRETARJAT PARLAMENTARI GĦAĊ-ĊITTADINANZA U L-KOMUNITAJIET Malta tara influss stabbli ta' digital nomads
STQARRIJA MIS-SEGRETARJAT PARLAMENTARI GĦAĊ-ĊITTADINANZA U L-KOMUNITAJIET Malta tara influss stabbli ta' digital nomads
Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow