Left arrow Go Back

STQARRIJA MILL-MINISTERU GĦALL-FINANZI U X-XOGĦOL Il-Budget huwa l-ewwel pass għas-suq tax-xogħol ta’ għada

pr211911
Date Icon 20/10/2021

F’konferenza tal-aħbarijiet bit-tema ‘Malta li rridu għal uliedna’, il-Ministru għall-Finanzi u x-Xogħol Clyde Caruana tkellem dwar kif il-Budget għas-sena 2022 se jkompli jsaħħaħ is-suq tax-xogħol fil-preżent u kif ukoll għas-snin li ġejjin.

Il-Ministru Caruana qal li, “Il-miżuri li ħa l-gvern sabiex jissalvagwardja x-xogħol u l-għajxien ta’ eluf ta’ familji Maltin u Għawdxin fi żmien il-pandemija, illum, sena u nofs wara, qed isarrfu f’figuri li juru kemm dawn tassew ħadmu – b’iktar nies fid-dinja tax-xogħol, u inqas nies qiegħda.” Huwa tkellem dwar kif dawn iż-żewġ fatturi jkomplu juru kemm pajjiżna għandu suq tax-xogħol b’saħħtu, kif ukoll jippermetti għall-miri u tbassir kunfidenti ta’ tkabbir ta’ 6.5% u defiċit ta’ 5.6% għas-sena li ġejja. 

Il-Budget għall-2022 introduċa miżuri li se jkomplu jżidu l-produttività tal-pajjiż, jinkoraġixxu lill-ħaddiema Maltin u Għawdxin, kif ukoll jagħmlu l-qasam tax-xogħol iktar attraenti. Il-Ministru Caruana semma numru ta’ miżuri, bħall-introduzzjoni tar-roħs fuq it-taxxa tal-part-time minn 15% għal 10% u t-twessigħ fin-numru ta’ sigħat li wieħed jista’ jagħmel f’over-time b’rata ta’ taxxa ta’ 15%. Huwa spjega wkoll kif, fuq medda ta’ ħames snin, se jkun qed jitnaqqas l-ammont ta’ taxxa għal dawk il-pensjonanti li jagħżlu li jibqgħu fid-dinja tax-xogħol, filwaqt li dawk il-ħaddiema li jaħdmu ma’ kuntratturi li jagħtu servizz lill-gvern se jkunu qed jitħallsu b’rata doppja fil-Ħdud u l-festi. 

Il-Ministru Caruana tkellem ukoll dwar kif il-Budget ippreżentat mill-gvern jinkorpora rakkomandazzjonijiet mid-dokument tal-Politika Nazzjonali għas-Suq tax-Xogħol għad-disa’ snin li ġejjin. Huwa qal li kmieni s-sena d-dieħla, il-gvern se jibda jilqa’ għall-ikbar sfida tas-suq tax-xogħol – it-titjib fil-ħiliet tal-ħaddiema. “Fil-Budget, ħabbarna ċensiment li se jkun l-ewwel tax-xorta tiegħu kemm f’pajjiżna kif ukoll fl-Ewropa. Dan se jagħti stampa ċara tal-ħiliet li jħaddnu l-ħaddiema Maltin u Għawdxin, fejn huma n-nuqqasijiet u kif ukoll fejn għandu jsir l-investiment,” qal il-Ministru Caruana. 

Barra minn hekk, fil-Budget tħabbar ukoll kif il-gvern se jkun qed jinvesti €2 miljun sabiex il-kumpaniji jkunu jistgħu jagħtu t-taħriġ neċċessarju lill-ħaddiema tagħhom. Se jsir ukoll Digital Audit ta’ kull post tax-xogħol – eżerċizzju sabiex jassigura li l-opportunitajiet li d-dinja diġitali mistennija toħloq fid-dinja tax-xogħol jkunu jistgħu jinħatfu minn ħaddiema Maltin. Dan fid-dawl li dawn ix-xogħlijiet bi bżonn ta’ iktar ħiliet u pagi aħjar iwasslu għall-mobiltà soċjali vera.

Il-Ministru sejjaħ dan il-Budget bħala l-ewwel pass f’dak li se jkun eżerċizzju li se jieħu numru ta’ snin sabiex ikompli jilħaq l-aspettativi tan-nies – pagi ogħla u livell ta’ għajxien aħjar għall-familji Maltin u Għawdxin.

STQARRIJA MILL-MINISTERU GĦALL-FINANZI U X-XOGĦOL Il-Budget huwa l-ewwel pass għas-suq tax-xogħol ta’ għada
STQARRIJA MILL-MINISTERU GĦALL-FINANZI U X-XOGĦOL Il-Budget huwa l-ewwel pass għas-suq tax-xogħol ta’ għada
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow