Left arrow Go Back

STQARRIJA MILL-UFFIĊĊJU TAL-PRESIDENT Il-President jirċievi l-kredenzjali mingħand tliet Kapijiet ta’ Missjoni ġodda

pr211854
Date Icon 07/10/2021

Tliet Kapijiet ta’ Missjoni ġodda ppreżentaw il-kredenzjali diplomatiċi tagħhom lill-President ta’ Malta George Vella fil-Palazz ta’ Sant’Anton nhar il-Ħamis 7 ta’ Ottubru 2021.

L-Ambaxxatriċi tar-Repubblika tal-Iraq, Safia Taleb Al-Souhail, kienet l-ewwel waħda li ppreżentat l-Ittri tal-Kredenzjali tagħha. Il-President Vella esprima l-appoġġ tiegħu lill-poplu tal-Iraq hekk kif jinsab fit-triq ta’ rikostruzzjoni u għaqda nazzjonali. Huwa esprima wkoll it-tama li din l-inizjattiva tiġi sfruttata biex jissaħħu r-relazzjonijiet bilaterali ma’ Malta. L-Ambaxxatriċi Al-Souhail tat ħarsa ġenerali lejn il-proċess tar-riforma li għaddej bħalissa, li jinkludi miżuri politiċi, ekonomiċi, u rikonċiljatorji maħsuba biex jiġu ssodisfati l-bżonnijiet tal-popolazzjoni. It-tnejn qablu dwar il-bżonn li fil-Golf ikun hemm relazzjonijiet tajbin bejn il-pajjiżi ġirien, fid-dawl tal-influwenza tar-reġjun fuq l-istabbiltà globali.

Ippreżentat l-Ittri tal-Kummissjoni tagħha wkoll il-Kummissarju Għoli tar-Repubblika tal-Afrika t’Isfel, Nosipho Nausca Jean Ngcaba. Il-President Vella qal li Malta tilqa’ t-tisħiħ tal-kuntatti fl-oqsma kollha u rrefera għax-xejra soda ta’ kooperazzjoni mil-lat multilaterali, primarjament permezz tal-Unjoni Ewropea u l-Commonwealth. Il-Kummissarju Għoli Ngcaba informat lill-President li l-Afrika t’Isfel tinsab ħerqana li taqsam ma’ Malta l-aħjar prattiki u esperjenzi fl-oqsma tal-provvista tal-ilma, tas-sajd, tar-riċerka medika, u tal-enerġija rinnovabbli. Hija rreferiet ukoll għar-rekord prominenti ħafna li Malta għandha fit-tbaħħir fil-livell internazzjonali u ddeskrivietu bħala wieħed mill-interessi l-kbar tal-Afrika t’Isfel.

It-tielet Kap ta’ Missjoni li ppreżenta l-ittri tal-kredenzjali tiegħu kien l-Ambaxxatur tar-Renju tal-Iżvezja, Andrés Jato. Il-President Vella feraħ lill-Iżvezja talli matul din is-sena qiegħda tippresjedi l-Organizzazzjoni għas-Sigurtà u l-Kooperazzjoni fl-Ewropa. Huwa rrefera wkoll għall-interessi komuni ta’ Malta u l-Iżvezja biex tiġi żgurata l-istabbiltà fil-pajjiżi li jinsabu fin-Nofsinhar u fil-Lvant tat-territorju tal-Unjoni Ewropea. L-Ambaxxatur Jato qabel mal-President Vella li ż-żewġ pajjiżi għandhom l-istess tħassib dwar l-isfidi internazzjonali komuni, filwaqt li rrefera b’mod partikolari għall-iżviluppi fl-Afganistan u l-kwistjoni tal-migrazzjoni.

Matul ikla ta’ ħidma mal-Ambaxxaturi u l-Kummissarju Għoli l-ġodda, il-President Vella ferħilhom għall-ħatriet distinti tagħhom u ħa l-opportunità biex awguralhom kull suċċess fil-ħidma tagħhom.

STQARRIJA MILL-UFFIĊĊJU TAL-PRESIDENT Il-President jirċievi l-kredenzjali mingħand tliet Kapijiet ta’ Missjoni ġodda
STQARRIJA MILL-UFFIĊĊJU TAL-PRESIDENT Il-President jirċievi l-kredenzjali mingħand tliet Kapijiet ta’ Missjoni ġodda
STQARRIJA MILL-UFFIĊĊJU TAL-PRESIDENT Il-President jirċievi l-kredenzjali mingħand tliet Kapijiet ta’ Missjoni ġodda
STQARRIJA MILL-UFFIĊĊJU TAL-PRESIDENT Il-President jirċievi l-kredenzjali mingħand tliet Kapijiet ta’ Missjoni ġodda
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow