Left arrow Go Back

STQARRIJA MILL-UFFIĊĊJU TAD-DEPUTAT PRIM MINISTRU L-MINISTERU GĦAS-SAĦĦA Inawgurata sala ġdida fl-Isptar Mater Dei

pr211852
Date Icon 07/10/2021

Id-Deputat Prim Ministru u Ministru għas-Saħħa Chris Fearne inawgura sala ġdida speċjalizzata fl-Isptar Mater Dei biex tilqa’ fiha pazjenti li jkollhom bżonn kura aktar intensiva wara jew qabel operazzjoni maġġuri.

Il-pazjenti fis-Surgical High Dependency Unit ikollhom bżonn kura iżjed minn sala normali, iżda mhux daqs kemm tingħata fl-ITU.

“Din is-sala se tkun qed tippermetti li nagħmlu iżjed operazzjonijiet maġġuri, kien hemm każijiet fis-snin u xhur li għaddew fejn operazzjonijiet kellhom jitħassru minħabba li l-pazjent wara l-operazzjoni jkollu bżonn kura instensiva u ma jkunx hemm post l-ITU għax ikun meħud b’każijiet aktar urġenti, għaldaqstant din is-sala se tgħin biex dawn il-pazjenti jkunu jistgħu jiġu kkurati. Din is-sala tagħti anke serħan il-moħħ lit-team ta’ kirurgi f’Mater Dei li jafu li wara l-operazzjoni l-pazjenti tagħhom se jkollhom sala u team dedikat ta’ nies iħarsu l-bżonnijiet tagħhom. Hija ta’ importanza wkoll hekk kif illum ninsabu f’punt fil-pandemija fejn qegħdin nirkupraw mill-interventi kirurġiċi li tlifna fis-snin u xhur ta’ qabel sabiex stajna nieħdu ħsieb pazjenti bil-Covid-19 speċjalment dawk fl-ITU”, qal id-Deputat Prim Ministru.

Żied jgħid li minħabba l-kura intensiva li kellu jagħti l-isptar lill-pażjenti bil-COVID-19 fl-eqqel tal-pandemija, żdied ż-żmien ta’ stennija għall-maġġoranza tal-operazzjonijiet f’Mater Dei, għal żmien li huwa itwal minn dak li stabbilit fil-Patient Charter. Spjega li f’Lulju 2021, meta pajjiżna beda jirkupra mill-pandemija, kien hemm 5,954 pazjent jistennew operazzjoni, u li biż-żieda fl-ammont ta’ operazzjonijiet li jsiru ta’ kull ġimgħa, sa Settembru 2021 din il-figura naqset għal 3,380. 

“Fil-ġimgħat u x-xhur li ġejjin l-impenn tagħna hu li nnaqsu l-listi ta’ stennija għal li kienu qabel il-pandemija jew aħjar. Din is-Surgical High Dependency Unit hija waħda mill-fatturi li se twassal għal dan.  Fost oħrajn bħalissa qegħdin nagħmlu operazzjonijiet anke fil-Ħdud u l-festi pubbliċi, kif ukoll qed nagħmlu operazzjonijiet fi sptarijiet privati mħallsa mill-Gvern”, qal Chris Fearne.

Id-Deputat Prim Ministru rringrazzja lill-Clinical Chairperson tal-Isptar Mater Dei, Mr Gordon Caruana Dingli, u lill-kirurgu responsabbli mis-sala, Mr Jo Etienne Abela.

Il-programm ta’ tilqim tal-booster dose miexi b’ritmu tajjeb 

Intant, waqt li ta l-aħħar żviluppi f’dak li għandu x’jaqsam mal-pandemija, id-Deputat Prim Ministru qal li 96% tal-anzjani fid-djar tal-anzjani u 71% ta’ dawk li huma immunosopressi ngħataw il-booster dose tal-vaċċin. 

Fearne innota li l-booster dose qiegħda taħdem sew hekk kif b’mod drastiku naqsu l-każijiet tal-COVID-19 fid-djar tal-anzjani. Huwa ħabbar li mill-bidu ta’ Diċembru se jibdew jingħataw il-booster dose il-ħaddiema fil-kura tas-saħħa, il-carers li jaħdmu fid-djar tal-anzjani, l-ispiżjara li jaħdmu fil-komunità, persuni li jgħixu fl-istituzzjonijiet u kif ukoll l-għalliema. 

Id-Deputat Prim Ministru ħabbar ukoll li se jibda jinħareġ iċ-ċertifikat tat-tilqim lil dawk ir-residenti Maltin li jkunu ħadu l-ewwel doża tal-vaċċin f’ pajjiż ieħor Ewropew u t-tieni doża tal-vaċċin f’pajjiżna. 

Dwar l-użu tal-maskri mill-istudenti fl-iskejjel, il-Ministru għas-Saħħa qal li waqt il-vaganzi ta’ Novembru se tkun analizzata d-data dwar il-każijiet pożittivi tal-COVID fl-iskejjel biex b’hekk ikun deċiż jekk għandhomx jieqfu jkunu obbligatorji l-maskri fil-klassijiet. Dwar każijiet pożittivi fl-iskejjel, id-Deputat Prim Ministru qal li l-kuntatti ta’ tfal pożittivi jistgħu jagħmlu sebat ijiem kwarantina jekk it-tfal u l-ġenituri jkunu mlaqqma.

STQARRIJA MILL-UFFIĊĊJU TAD-DEPUTAT PRIM MINISTRU L-MINISTERU GĦAS-SAĦĦA Inawgurata sala ġdida fl-Isptar Mater Dei
STQARRIJA MILL-UFFIĊĊJU TAD-DEPUTAT PRIM MINISTRU L-MINISTERU GĦAS-SAĦĦA Inawgurata sala ġdida fl-Isptar Mater Dei
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow