Left arrow Go Back

DISKORS TAL-ONOR. JOHN DALLI, MINISTRU GĦALL-POLITIKA SOĊJALI WAQT IL-KONFERENZA NAZZJONALI DWAR IL-FAMILJA, NEW DOLMEN HOTEL, QAWRA - IL-ĠIMGĦA, 22 TA’ JANNAR 2010

PR0124
Date Icon 22/01/2010

Mr Speaker, Onorevoli Membri Parlamentari 

Il-familja, il-bieraħ, illum u għada, kienet għadha u tibqa s-sies tas-soċjeta’ Maltija. Kienet għadha u tibqa’ ċ-ċellulla li tmantni s-soċjeta’ u l-istituzzjoni li tibni lill-pajjiżna.  

Għalhekk hu d-dmir tagħna bħala Gvern u d-dmir tas-soċjeta’ kollha li f’dak kollu li nagħmlu, kull dettall tal-politika li noħolqu u nattwaw, tkun indirizzata biex insaħħu l-familja. 

Mill-ħamsinijiet ’l hawn, ir-rata li biha qed tinbidel il-familja Maltija u l-familja fl-Ewropa żdiedet. Il-kuntest li fih qed tiżviluppa l-familja qed jinbidel ukoll u dan qed iġib miegħu sfidi ġodda li jġibu magħhom bżonnijiet speċifiċi.  

Fost it-tibdil wieħed jista’ jinnota li: 

·        Qed jitwieldu anqas tfal

·        Qed jitwieldu aktar tfal barra ż-żwieġ

·        Il-koppji qed idumu aktar biex jibda jkollhom it-tfal

·        Qed jinfirdu aktar familji

·        Qed ikun hemm aktar tfal imrobbija minn ġenitur wieħed

·        Hemm aktar ugwaljanza bejn in-nisa u l-irġiel.  

Dan it-tibdil qed ikollu effett fuq it-trobbija tat-tfal u fuq il-ħajja li qed jgħixu fiha t-tfal tagħna. Malta minn dejjem kienet kburija bil-familji sodi u responsabbli li wettqu dmirijiethom lejn il-membri vulnerabbli tal-familji bħat-tfal u l-anzjani, u dan il-gvern iħossu responsabbli li jwettaq dak li hemm bżonn biex il-familji tagħna jkunu jistgħu jkomplu r-rwol importanti tagħhom fis-soċjeta’. 

Illum qed jinħolqu forom ta’ relazzjonijiet. Nemmen li l-Gvern għandu l-obbligu li jħares l-interessi ta’ kull ċittadin f’pajjiżna u għandu jibni dawk l-istrutturi civili biex jassigura li r-responsabbiltajiet li ċ-ċittadini jassumu bejniethom jiġu onorati u biex jassigura wkoll li kulħadd jidħol fil-qafas ta’ infrastruttura soċjali li bnejna u li se nkomplu nibnu f’pajjiżna.  

Jiena nemmen li flimkien, aħna nistgħu naffaċjaw l-isfidi li ġejjin mit-tibdil li għaddejja minnu l-familja. Illum, nixtieq nerġa nappella għal sforz ġenwin u qawwi bejn il-forzi politiċi, ekonomiċi u soċjali kollha biex il-familja f’pajjiżna tkompli tissaħħaħ billi nagħmlu għażliet responsabbli li jħarsu lejn il-ġejjieni tal-familji tagħna.  

Waħda mill-isfidi ewlenin hija li l-familja tkompli taqdi b’mod sħiħ ir-rwol tagħha fis-soċjeta’ u fl-istess ħin tlaħħaq mal-ispejjeż tal-ħajja. L-isfida mhix waħda ekonomika biss imma hija relatata mad-diffikulta tal-bilanċ bejn familja u xogħol. Din il-kwistjoni ta’ bilanċ ma tikkonċernax biss lill-mara li taħdem iżda tikkonċerna l-irġiel ukoll. Aħna nemmnu fil-valuri tax-xogħol u tal-edukazzjoni li jistgħu jwasslu li l-familji jkunu jistgħu jipprovdu huma stess għall-bżonnijiet tagħhom.  

Il-familja dejjem kienet in-nieqa tat-trobbija u l-formazzjoni ta’ uliedna. Għalhekk: 

Irridu nsaħħu l-familja fejn ġenituri, bil-kwalitajiet differenti imma kumplimentari tagħhom joffru l-aqwa ambjent li fih it-tfal tagħhom ikunu jistgħu jikbru u jgħarrfu lilhom infushom.  

Irridu nagħtu sostenn sħiħ lill-familji fejn ġenitur wieħed qed jerfa r-responsabbilta’ ta’ tnejn.  

Irridu nerġgħu nibdew insaħħu r-rabta inter-ġenerazzjonali tal-familji.  

Jiena nifhem illi f’dawn il-jumejn tal-konferenza se jqumu diversi opinjonijiet minn persuni diversi u nawgura li permezz ta’ din il-konferenza nifhmu sew xi tfisser din l-istituzzjoni għas-soċjeta’ tagħna u naraw x’nistgħu nagħmlu aktar biex inkomplu nsaħħuha.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL  Tittella’ r-raba’ edizzjoni ta’ Porkilicious: inizjattiva li tgħaqqad il-gastronomija u s-sostenibbiltà tal-ikel mal-appoġġ għall-Malta Community Chest Fund

PR261991

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...

STQARRIJA MILL-MINISTERU GĦALL-EDUKAZZJONI U L-ISPORT  “L-intelliġenza artifiċjali għandha tkun għodda mħaddma tajjeb, filwaqt li qatt ma tista’ tieħu r-rwol fundamentali tal-edukaturi” – Il-Ministru Byron Camilleri fi Brussell

PR261990

STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...

More Press Releases Right arrow